Asebter amenzawi
Adrar: Yessefk ad d-tedduqqes tmerrit « s tidet » s uqader n yilugan igraɣlanen
ADRAR – Yenna-d uneɣlaf n uheyyi n wakal d tmerrit (siyaḥa), Amar Ghoul, ass n lḥedd deg Timimun (Adrar) d akken yessefk ad d-tedduqqes tmerrit « s tidet » yerna s uqader n tegna (maɛayir) tigraɣlanin.
« Yessefk ad naweḍ ɣer usduqqes n tidet n tmerrit ɣef leḥsab n tegna tigraɣlanin, s ussebded n temṣukiwin (hayakil) n tmerrit d tegnatin n ummager ay iwatan ccuruḍ n tmerrit tatrart », ɣef wakken ay d-yenna uneɣlaf deg yijifeṛ n ussefqed n temṣukiwin n tmerrit deg twilayt n Udrar.
Dɣa iḥettet-d, Mass Ghoul, d akken yessefk ad d-myezgen yimeẓla (xadamat) n tmerrit d ssumat ɣef leḥsab n wayen ay ḥwaǧen yimerrayen (suyyaḥ), ama d wid n daxel tmurt, ama d wid n beṛṛa, i lmend n uqabel n wuguren ay d-yettmagar uḥric-a, am wakken ay yessefk ad ttwaɣelltent tesnatwilin titrarin n teɣwalt deg ussenzi n yifarisen n tmerrit.
Yessefk daɣ ad yettwasnefli ussileɣ (takwin) deg uḥric n tmerrit i usselhu n yimeẓla n yisensa (fanadiq) d ussefrek-nsen s ubrid asaduran, ɣef wakken ay d-yenna uneɣlaf.
Mass Ghoul yebda-d tirzi-nnes n uxeddim s ussersi n uẓru amezwaru i lebni n yiwet n taddart tamerrayant n uneẓruf (ṣaḥra’) aydeg ad ilin 560 n wusuten. Taddart-a ad tt-yessefrek Udiwan Aɣelnaw n Tmerrit, ad tettwabnu deg wadaf n ugafa (camal) n Timimun yerna ad d-tesqam ugar n umelyaṛ n yidinaṛen.
Taddart-a ad teḍḍef tajumma n 15 n yiqeṭṭaren, yerna ad ilint deg-s aṭas n temṣukiwin, gar-asent asalay (mutḥaf), amkan i ussenzi n tɣawsiwin n tenḍi (ṣinaɛa taqlidiyya), amkan aydeg ad d-ttilint tedyanin d tmeɣriwin d wurti n tezdayin i umerreḥ, ɣef wakken ay d-tebder tsentut tatwilant n usenfar-a.
Asenfar-a amerrayan ad d-yili d rrbeḥ ameqran i temnaḍt-a yerna ad yettekki mliḥ deg usnefli-nnes (tanmiya), ladɣa imi ad yefk azal i tmerrit tagensit (daxiliyya), ɣef wakken ay d-yenna Mass Ghoul ay d-yernan d akken awanak yefka azal i tmerrit deg unẓul n tmurt yerna taddart tamerrayant am ta iban ad d-tejbed aṭas n yimerrayen.
Yerza daɣ uneɣlaf ɣef usensu uslig n « Massine » deg Timimun, d win ay yettwabnan deg 2011, yesɛa 44 n texxamin, 3 n tmudrutin d 100 n wusuten.
Yessefqed daɣ uneɣlaf asensu n « Gourara » yeqqnen ɣer umezrar n yisensa n El-Djazair, yerna xebbren-t din ɣef yimeẓla n usensu-a.
Wa d asensu yesɛan 98 n texxamin, snat n tmudrutin, snat n texxamin i yimeɛdaṛ, 3 n tzeɣwin n yisaragen d yiwet n tneččit.
