Asebter amenzawi

Talɣuɣa « Ireẓmen » n Uɛumu ad d-tili dduṛt ay d-yetteddun deg Sḍif

LEZZAYER TAMANEɣT – Talɣuɣa n Lezzayer n Uɛumu « Ireẓmen » n tegrest ad d-tili gar 9 d 13 Fuṛaṛ deg tnerdabt (masbaḥ) tamaynut n El Bez, deg Sḍif, ɣef wakken ay d-tenna Tfidiṛalit Tadzayrit n Uɛumu ass n lḥedd.

Talɣuɣa-a ad ttekkin deg-s iɛewwamen imxeyyren n tmurt yerna yella ḍḍmeɛ ad d-ilin yigmaḍ igerrzen deg-s, ɣef wakken ay d-tenna tfidiṛalit ay la yessaramen ad d-yili uswir d unnig n umsizwer deg telɣuɣa-a.

Txebber-d Tfidiṛalit d akken talɣuɣa-a ad ttekkin deg-s yiɛewwamen am Oussama Sahnoune, Belkhodja Nazim, Balamane Moncef, Ardjoune Abdellah, Afane Abdelkader, Khendriche Lounis,aytmaten Djendouci d Chouchar Imad (ɣer yirgazen), Nefsi Rania, Chabaraka Majda, Cherouati Souad, Melih Amel, Medjahed Nesrine d Taleb-Bendiab Hannah (ɣer tsednan).

Aṭas n teɣlamin ay yebɣan ad ḍḍfent imukan imezwura, gar-asent Amsegraw Anaddal n Yipitṛulyen (GS Petroliers) d USM Lezzayer yellan gar teɣlamin tuẓwirin akk, am wakken ad ttekkint daɣ NR Dili Bṛahim, SA Bab Zzewwaṛ, ASPTT Lezzayer, WA Tlemsan, RT Ɛin Ṭṭerk, OC Lezzayer d El Bahia n Wehṛan.

Seg yidis niḍen, nnan-d yimasayen (mas’ulin) n Tfidiṛalit d akken fernen tanerdabt n El Bez, deg Sḍif, imi ay tesɛa « ttawil yelhan », yerna tamdint n Sḍif tesɛa daɣ tizemmar yelhan n ummager.