ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵉⵣⵣⴰⵢⵔⵉⵢⴻⵏ ⵙⵙⴻⵇⴷⴰⵛⴻⵏ ⵜⵔⵉⵙⵉⵜⵉ 10 ⵏ ⵜⵉⴽⴽⴰⵍ ⵓⴳⴰⵔ ⴰⵢⴻⵏ ⵉⵡⴰⵜⴰⵏ

ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⵉⵅⵅⴰⵎⴻⵏ ⵉⴷⵣⴰⵢⵔⵉⵢⴻⵏ ⵙⵙⴻⵇⴷⴰⵛⴻⵏ ⵜⵔⵉⵙⵉⵜⵉ 10 ⵏ ⵜⵉⴽⴽⴰⵍ ⵓⴳⴰⵔ ⵏ ⵜⴻⴳⵏⴰ (ⵎⴰⵄⴰⵢⵉⵔ) ⵜⵉⴳⵔⴰⵖⵍⴰⵏⵉⵏ ⴷ 2 ⵏ ⵜⵉⴽⴽⴰⵍ ⵓⴳⴰⵔ ⵏ ⵜⵍⴻⵎⵎⴰⵙⵜ ⴷⴻⴳ ⵜⵎⵓⵔⴰ ⵏ ⵍⵎⴻⵖⵔⴻⴱ, ⵖⴻⴼ ⵡⴰⴽⴽⴻⵏ ⴰⵢ ⴰⵖ-ⴷ-ⵢⴻⵏⵏⴰ ⵢⵉⵡⴻⵏ ⵏ ⵓⵎⴰⵙⴰⵢ (ⵎⴰⵙ’ⵓⵍ) ⴰⵢ ⵉⵅⴻⴷⴷⵎⴻⵏ ⵖⴻⵔ ⵜⵏⴻⴳⴳⴰ ⵜⴰⵖⴻⵍⵏⴰⵡⵜ ⵉ ⵓⵙⵎⴰⵍ ⴷ ⵓⵙⵙⴻⵕⵛⴻⴷ ⵏ ⵓⵙⵙⴻⵇⴷⴻⵛ ⵏ ⵜⴻⵥⵡⴻⵔⵜ.

« ⴷⴻⴳ ⵜⵍⴻⵎⵎⴰⵙⵜ, ⴰⵅⵅⴰⵎ ⴰⴷⵣⴰⵢⵔⵉ ⵢⴻⵙⵙⴻⵇⴷⴰⵛ ⴳⴰⵔ 1800 ⴷ 2000 ⵏ ⵢⵉⴽⵉⵍⵓⵡⴰⵟⴻⵏ-ⴰⵙⵔⴰⴳ ⴷⴻⴳ ⵓⵙⴻⴳⴳⴰⵙ, ⵢⵉⵍⵉ ⵜⴰⴳⵏⵓⵜ ⴰⵜⵜⴰⵏ ⴳⴰⵔ 200 ⴷ 250 ⵏ ⵢⵉⴽⵉⵍⵓⵡⴰⵟⴻⵏ-ⴰⵙⵔⴰⴳ ⴷⴻⴳ ⵓⵙⴻⴳⴳⴰⵙ. ⴰⵅⵅⴰⵎ ⴰⴷⵣⴰⵢⵔⵉ ⵢⴻⵙⵙⴻⵇⴷⴰⵛ ⵜⵔⵉⵙⵉⵜⵉ ⵙⵏⴰⵜ ⵏ ⵜⵉⴽⴽⴰⵍ ⵓⴳⴰⵔ ⵏ ⵜⵍⴻⵎⵎⴰⵙⵜ ⵏ ⵓⵅⵅⴰⵎ ⴷⴻⴳ ⵜⵎⵓⵔⴰ ⵏ ⵍⵎⴻⵖⵔⴻⴱ ⵏⵉⴹⴻⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵎⴰⵙⴰⵢ-ⴰ ⴷⴻⴳ ⵢⵉⵊⵉⴼⴻⵕ ⵏ ⵢⵉⵡⴻⵏ ⵏ ⵓⵙⴰⵔⴰⴳ ⵖⴻⴼ ⵜⵎⴻⵍⵍⵉⵍⵜ (ⵏⴰⴵⴰⵄⴰ) ⵜⴰⵥⴻⵡⵔⴰⵏⵜ ⴷⴻⴳ ⵍⴻⴱⵏⵉ, ⴰⵢ ⴷ-ⵢⴻⵍⵍⴰⵏ ⴰⵙⵙ ⵏ ⵜⵜⵍⴰⵜⴰ ⴷⴻⴳ ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ.

ⵙⵙⴻⴱⴱⴰ ⵏ ⵓⵙⵙⴻⵇⴷⴻⵛ-ⴰ ⴰⵎⴻⵇⵔⴰⵏ ⵏ ⵜⵔⵉⵙⵉⵜⵉ ⵏⴻⵜⵜⴰ ⴷ ⴰⵙⵙⴻⵇⴷⴻⵛ ⵏ ⵜⵜⴰⵡⵉⵍⴰⵜ ⴰⵢ ⵢⴻⵜⵜⴻⵜⵜⴻⵏ ⴰⵟⴰⵙ ⵏ ⵜⵔⵉⵙⵉⵜⵉ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ.

« ⵙⵙⵓⵇ ⴰⴷⵣⴰⵢⵔⵉ ⵢⴻⵞⵞⵓⵕ ⴷ ⵉⵙⵏⴻⵣⵡⴰⵢⴻⵏ (ⵎⵓⴽⴰⵢⵢⵉⴼⴰⵜ) ⴷ ⵜⵜⴰⵡⵉⵍⴰⵜ ⵏⵉⴹⴻⵏ ⴰⵢ ⵢⴻⵜⵜⴻⵜⵜⴻⵏ ⴰⵟⴰⵙ ⵏ ⵜⵔⵉⵙⵉⵜⵉ. ⵙ ⵓⵎⴰⵜⴰ, ⵎⴻⴷⴷⴻⵏ ⵍⴰ ⴰⵙⴻⵏ-ⵄⴻⵊⵊⴱⴻⵏ ⵜⵜⴰⵡⵉⵍⴰⵜ-ⴰ ⵔⵅⵉⵙⴻⵏ, ⵎⴰⵛⴰ ⵡⵉ ⵙⴻⴳ ⴳⴰⵔ ⵜⵜⴰⵡⵉⵍⴰⵜ ⴰⵢ ⵢⴻⵜⵜⴻⵜⵜⴻⵏ ⴰⵟⴰⵙ ⴰⴽⴽ ⵏ ⵜⵔⵉⵙⵉⵜⵉ, ⵢⴻⵔⵏⴰ ⵙⵇⴰⵎⴰⵢⴻⵏ-ⴷ ⵖⵍⴰⵢⵉⵜ ⵙ ⵍⵇⵉⵙ ⴰⵖⴻⵣⴼⴰⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ.

ⵖⴻⴼ ⵡⴰⵢⴰ ⴰⵢ ⵍⴰ ⵜⵅⴻⴷⴷⴻⵎ ⵜⵏⴻⴳⴳⴰ (ⵡⴰⴽⴰⵍⴰ) ⵜⴰⵖⴻⵍⵏⴰⵡⵜ ⵉ ⵓⵙⵎⴰⵍ ⴷ ⵓⵙⵙⴻⵕⵛⴻⴷ ⵏ ⵓⵙⵙⴻⵇⴷⴻⵛ ⵏ ⵜⴻⵥⵡⴻⵔⵜ ⵉ ⵓⵙⵙⴻⴱⴷⴻⴷ ⵏ ⵓⵏⴻⴳⵔⴰⵡ (ⵏⵉⴹⴰⵎ) ⵏ ⵓⵚⴻⵏⵏⴻⴼ ⵏ ⵜⵜⴰⵡⵉⵍⴰⵜ ⵏ ⵜⵔⵉⵙⵉⵜⵉ ⵖⴻⴼ ⵍⴻⵃⵙⴰⴱ ⵏ ⵡⴰⵏⴻⵛⵜ ⴰⵢ ⵜⵜⴻⵜⵜⴻⵏ ⵜⵔⵉⵙⵉⵜⵉ, ⴰⴽⴽⴻⵏ ⴰⵢ ⵜⵜⵡⴰⵚⴻⵏⵏⴼⴻⵏ ⴷⴻⴳ ⵜⵎⵓⵔⴰ ⵜⵉⴱⴻⵕⵕⴰⵏⵉⵢⵉⵏ ⵙⴻⴳ ⵜⴰⴳⴳⴰⵢⵜ ⵏ « ⴰ » (ⵓⵔ ⵢⴻⵜⵜⴻⵜⵜⴻⵏ ⴰⵔⴰ ⴰⵟⴰⵙ) ⴰⵔⵎⴰ ⴷ ⵜⴰⴳⴳⴰⵢⵜ « ⴳ » (ⴰⵢ ⵢⴻⵜⵜⴻⵜⵜⴻⵏ ⴰⵟⴰⵙ ⵏ ⵜⵔⵉⵙⵉⵜⵉ).

ⵖⴻⴼ ⵍⴻⵃⵙⴰⴱ ⵏ ⵜⵏⴻⴳⴳⴰ ⵜⴰⵖⴻⵍⵏⴰⵡⵜ ⵉ ⵓⵙⵎⴰⵍ ⴷ ⵓⵙⵙⴻⵕⵛⴻⴷ ⵏ ⵓⵙⵙⴻⵇⴷⴻⵛ ⵏ ⵜⴻⵥⵡⴻⵔⵜ, ⵜⴻⵍⵍⴰ ⵓⵍⴰ ⴷ ⵙⵙⴻⵍⵄⴰ ⴰⵢ ⴷ-ⵢⴻⵜⵜⴰⴷⴼⴻⵏ ⵙ ⵍⴻⴽⵡⴰⵖⴻⴹ ⵏ ⵜⴰⴳⴳⴰⵢⵜ « ⴱ », ⵢⵉⵍⵉ ⵏⴻⵜⵜⴰⵜ, ⴷⴻⴳ ⵜⵉⴷⴻⵜ, ⵙⴻⴳ ⵜⴰⴳⴳⴰⵢⵜ ⵏ « ⴳ ».

ⵖⴻⴼ ⵍⴵⴰⵍ ⵏ ⵓⴷⵖⴰⵍ-ⴰ, ⵜⴻⵙⵙⵓⵜⴻⵔ ⵜⵏⴻⴳⴳⴰ-ⴰ ⵙⴻⴳ ⵓⵖⵍⵉⴼ ⵏ ⵜⵏⴻⵣⵣⵓⵜ (ⵜⵉⴵⴰⵔⴰ) ⴰⴷ ⵢⴻⵙⵄⵓ ⵉⵏⴻⴳⵎⵉⵢⴻⵏ (ⵎⴰⵅⴰⴱⵉⵔ) ⵢⴻⵎⵎⵓⵣⵣⴳⴻⵏ ⵉ ⵓⵄⵇⴰⵍ ⵏ ⵜⴰⴳⴳⴰⵢⵜ ⵏ ⵜⵜⴰⵡⵉⵍⴰⵜ-ⴰ ⴰⵢ ⴷ-ⵢⴻⵜⵜⵡⴰⴵⴰⵡⴻⵏ ⵙⴻⴳ ⵓⵣⵖⴰⵔ.