Asebter amenzawi
Lebni n yibriden: 85 n yimelyaṛen n yidinaṛen i twilayt n Lezzayer gar 2015-2016
LEZZAYER TAMANEɣT – Tettwaḥaz-d tjellabt n 85 n yimelyaṛen n yidinaṛen i yisenfaren (macariɛ) n lebni n yibriden deg twilayt n Lezzayer i tallit n 2015-2016, ɣef wakken ay aɣ-d-yenna unemhal n yimahilen inagduden (acɣal ɛumumiyya) n twilayt-a, Mohamed Abdennour Rabhi.
Idrimen-a ad ttwasqedcen i ufaki n wahil n uẓeḍḍa asemṣak (muhaykil) n yibriden imeqranen ad izegren akal n tmaneɣt.
Ahil-a n lebni n yibriden n tmaneɣt yerza tin n yiḥricen imeqranen: lebni n tdumṣiwikin (buna taḥtiyya) n llsas i ussemɣer n tezmert n uẓeḍḍa n yibriden, d uṣeggem n tdumṣukiwin yettwabnan.
Deg wayen yerzan aḥric amezwaru, isenfaren imeqranen ay la yettwabnayen deg tmaneɣt ddan « mliḥ » ɣer sdat, ɣef wakken ay d-yenna unemhal-a.
Gar yisenfaren-a, yella win n ussisleg n yibriden n twilayt n tama tagmuḍant (carqiyya) aydeg yella ubrid amadaf agafa-anẓul ay yettawin ɣer yiri n yilel agmuḍan n tmaneɣt, gar-asen 3 n yibriden n twilayt ay iɛeddan ɣef tɣiwanin n Buṛǧ Lkifan, Lḥamiz, Hrawa, Ɛin Ṭaya d Xmis Lxecna (25 n yikilumitren s ujemmal), d ubrid amadaf n unafag (maṭar) ay yeqqnen abrid amazzal amezwaru n unẓul ɣer ubrid amazzal wis sin n unẓul, yerna iɛedda ɣef tɣiwant n Kalitus (ɣezzif 9 n yikilumitren). Asenfar-a ad d-yesqam 3,5 n yimelyaṛen n yidinaṛen.
Asenfar niḍen yebda-d deffir tukci n tnezduɣt i yimezdaɣen n yibeṛṛaken n Ṛṛemli, yerna wa yerza afaki n ubrid n Wad Ucayeḥ s lebni n yiwet n tleggit (ǧisr) d tuqqna n ubrid-a ɣer yibriden imeqranen niḍen. Asenfar-a ad d-yesqam 6 n yimelyaṛen n yidulaṛen yerna ɣezzif 4,5 n yikilumitren.
« Asenfar-a ad d-yili d tifrat n tidet i usnefsusi n tiddit deg tlemmast n Lezzayer Tamaneɣt (asagen [mina’] n Lezzayer) d Usaka n Qsenṭina », ɣef wakken ay d-yenna Mass Rabhi.
Tawilayt n Lezzayer tesfaydi-d daɣ seg usenfar n ufaki n ubrid amadaf n Leɛnaṣer ad yilin d aḥric niḍen i usserreḥ n tiddit deg tlemmast n tmaneɣt gar Tqubbet d Birxadem, yellan d imukan aydeg terna taẓeyt n tiddit n tkeṛṛusin ɣef lǧal tuggta n lbenyan.
Abrid-a ad yeqqen daɣ abrid amazzal n unẓul, deg Ɛin Nneɛǧa, ɣer ubrid aɣelnaw amezwaru, deg unẓul (ǧanub) n Birxadem.
