Asebter amenzawi
UNICEF tugad seg tmerniwt n yigerdan gar yiminigen ay la izeggren Agrakal
GENEVE – Yenna-d Usenduq n Yiɣlanen Yeddukklen i Tgerda (UNICEF), ass n ttlata, d akken tecɣeb-it tegnit n tmerniwt n yigerdan ay la izeggren ilel Agrakal gar Ṭṭerk d Legrig.
« Ass-a, igerdan wwḍen ɣer 36% seg wid ay la iɛerrḍen ad gen azgar amihaw (xaṭir) n yilel gar Ṭṭerk d Legrig », ɣef wakken ay d-tenna UNICEF.
Deg uzrug n tlisa gar Legrig d Gevgelilja (deg Masidunya), « igerdan d tsednan wwḍen ɣer 60% » s ujemmal, yerna ɛeddan, i tikkelt tamezwarut, amḍan n yirgazen, ɣef wakken ay d-tenna Sarah Crowe, tamutlayt (naṭiqa) n UNICEF.
Deg Yunyu yezrin, 73% seg yiminigen ay d-yettawḍen ɣer uzrug-a llan d irgazen, yerna ala 10% ay yellan sɛan ddaw 18 n yiseggasen.
Igensasen (mumattilin) n UNICEF wekkden-d d akken igerdan ttenḍerrayen ugar seg tegnatin tiweɛṛanin n uzgar n yilel.
ɣef leḥsab n Tuddsa Tagraɣlant n Yinig, 60 seg 272 n yiminigen ay d-ufan mmuten gar Ṭṭerk d Legrig deg Yennayer llan d igerdan.
Seg yidis niḍen, aṭas n yigerdan ay yewwḍen ɣer Tuṛuft war ma ddan-d yid-sen yimeqranen.
Tanegga n ussemyuddes amsultan n Tuṛuft, Europol, tenna-d, ass n lḥedd, d akken ugar n 10.000 n yigerdan iminigen (ur yesɛin imeqranen yid-sen) ay iɛerqen deg Tuṛuft deg 24 n wayyuren ineggura, yerna d aya ay yeǧǧan ad yili ccek d akken ahat aṭas seg-sen xeḍfen-ten yiẓeḍwan n tejrimt yettwassuddsen akken ad ten-ɣellten, ladɣa deg unrar n wuzuf (ǧins).
Azal n 62.200 n yiminigen d yizrazaɣen, amur ameqran seg-sen usan-d seg Surya, Afɣanistan d Ɛiraq, ay yudfen ɣer Tuṛuft seg tmurt n Legrig deg Yennayer yezrin, ɣef leḥsab n Tuddsa Tagraɣlant n Yinig. 20.000 seg-sen llan d igerdan wukud ur d-ddin yimeqranen, ɣef wakken ay d-tenna Tuddsa-a.
