Asebter amenzawi

Aneẓruf Utrim: Juppe yebded ɣer yidis n Ross deg uxeddim-nnes i ferru taluft-a

LEZZAYER TAMANEɣT – Iwekked-d uselway n tɣiwant n Bordeaux (Fṛansa), Alain Juppe, ass n ttlata deg Lezzayer Tamaneɣt, abdad-nnes ɣer wussisen (maǧhudat) n Christopher Ross, amazun (mabɛut) udmawan n umaru amatu n Yiɣlanen Yeddukklen, i ferru n taluft n Uneẓruf Utrim.

« Aql-iyi beddeɣ ɣer yidis n yisurifen n Umazun udmawan n umaru amatu n Tuddsa n Yiɣlanen Yeddukklen i Uneẓruf Utrim, Christopher Ross » i lmend n tifin n tifrat i taluft-a ay yeqqimen acḥal n yiseggasen, ɣef wakken ay d-yenna Mass Juppe deg yiwen n usarag ay d-yellan deg uɣlif n tɣawsiwin n uzɣar, aydeg ḥedṛen yinelmaden n Usudu Adiplumati n Wassaɣen Igraɣlanen (IDRI) d Uɣerbaz Unnig n Yiweẓla (ESA), ɣer yidis n uneɣlaf n tɣawsiwin n uzɣar, Ramtane Lamamra.

I usmekti, Tuddsa n Yiɣlanen Yeddukklen tenna-d d akken ad tkemmel ad twet ɣef uzref n Mass Ross akken ad yerzu ɣef wakal n Uneẓruf Utrim, s uqader n lewṣaya-nnes ay as-d-yefka Useqqamu n Tɣellist (amn).

« Nekkni nwet yerna mazal ad nkemmel ad nwet ɣef uzref n Ross akken ad yerzu akk imukan n wakal-a (aṣeḥrawi), yellan d aḥric seg lewṣaya-nnes », ɣef wakken ay d-yenna Farhan Haq, amalal n umutlay (naṭiq) n Ban Ki-moon, deffir ma ugin yiduba n tuḍḍfa imeṛṛukiyen ad fken ttesriḥ i umazun udmawan n Ban Ki-moon akken ad yeddu ɣer Uneẓruf Utrim.

Aneẓruf Utrim yettwammeṛka seg 1966 deg wumuɣ n yikalen ur yesɛin tafulmant (ḥukm dati), yerna s waya, terza-t temsalt n tneɣtust (qarar) 1514 n Ugraw Amatu n Yiɣlanen Yeddukklen i tukci n uzarug i yikalen d yiɣrefan yellan ddaw tehrest. Aneẓruf Utrim d netta ay d tahrest taneggarut akk deg Tefriqt yerna teḍḍef-it Meṛṛuk seg 1975, s lemɛawna n Fṛansa.