Asebter amenzawi

Taṛmist tanagdudt n yiferki n Ǧiǧel ad tesnerni assiǧew ɣer tmura niḍen

ǦIǦEL – Tesselha teṛmist tanagdudt (ɛumumiyya) n « Jijel Liege Etancheite » igmaḍ-nnes deg ussiǧew n yiferki deg 2015, yerna tessaweḍ ad tessiǧew 13 n yimelyunen n yidinaṛen n yiferki, deg wakud aydeg deg 2014, tessaǧew ala 2,5 n yimelyunen n yidinaṛen, ɣef wakken ay aɣ-d-yenna uselway-anemhal amatu n teṛmist-a, Mohamed Kobbi, ass n laṛebɛa.

Imectura imeqranen n teṛmist-a d Ṭṭalyan, Spenyul d Fṛansa, yerna uɣen ajemmal n 394 n yimitren igasasen (m3) n yiferki aberkan, ɣef wakken ay aɣ-d-yenna Mass Kobbi.

Timerniwt-a deg ussiǧew tella-d daɣ s tmerniwt « tameqrant » deg uzwil n yiweẓla (raqm aɛmal). Deg 2015, yewweḍ uzwil-a ɣer 190 n yimelyunen n yidinaṛen, yili deg 2014, azwil n yiweẓla n teṛmist-a yewweḍ ɣer 50 n yimelyunen n yidinaṛen. Timerniwt-a tella-d s ussidef n yirmuden (nacaṭat) yimaynuten am ussersi n yiferki deg lbenyanat, ɣef wakken ay d-yenna Mass Kobbi.

Iwekked-d daɣ Mass Kobbi dakken taṛmist n yiferki n Ǧiǧel tɛawen-tt Tegrawt Tadzayrit n Tesmedna n Ugama (EAGR) wuɣur teqqen teṛmist-a, yerna d aya ay yeǧǧan taneggarut-a ad tessiweḍ ɣer « yigmaḍ d isebɣasen (mucaǧǧiɛa) ».

Nnig waya, taṛmist n yiferki n Ǧiǧel tessebded-d tasertit tamsenzit (tiǧariyya) aydeg la tɛerreḍ ad tqerreb ɣer yimectura, yerna terẓem snat n tenqiḍin n ussenzi, yiwet deg Ldzayer Tamaneɣt, ma d tayeḍ, deg Wehṛan.

Taṛmist n yiferki n Ǧiǧel (yettwassnen zik s yisem n ENL, neɣ Taṛmist Taɣelnawt n Yiferkiyen), tebda axeddim deg 1978. Aseggas-a, la tessefray ad tessefti azal n 20 n yimelyunen n yidinaṛen i ussersi n tmacinin timaynutin i « ussired n wawwu », akken ad tessenqes awwu-nni ay d-yetteffɣen seg tesfiɣin-nnes (madaxin), ladɣa imi imezdaɣen ay iqerben ɣer lluzin-nnes ttcetkin-d ɣef waya, ɣef wakken ay d-yenna Mass Kobbi.