ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵜⴰⵣⵣⴰⵢⵔⵉⵜ ⵏ ⵡⴰⵎⴰⵏ ⵍⴰ ⴷ-ⵜⴻⵜⵜⵎⴰⴳⴰⵔ « ⵓⴳⵓⵔⴻⵏ ⴷ ⵉⵡⴻⵄⵕⴰⵏⴻⵏ »

ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⵢⴻⵏⵏⴰ-ⴷ ⵓⵏⴻⵎⵀⴰⵍ ⴰⵎⴰⵜⵓ ⵏ ⵜⴻⵕⵎⵉⵙⵜ (ⵛⴰⵔⵉⴽⴰ) ⵏ ⵜⴷⵣⴰⵢⵔⵉⵜ ⵏ ⵡⴰⵎⴰⵏ (ⴰⴷⴻ), ⴰⵙⵙ ⵏ ⵍⴻⵅⵎⵉⵙ ⴷⴻⴳ ⵍⴷⵣⴰⵢⴻⵔ ⵜⴰⵎⴰⵏⴻⵖⵜ, ⴷⴰⴽⴽⴻⵏ ⵜⴰⵕⵎⵉⵙⵜ-ⴰ ⵍⴰ ⴷ-ⵜⴻⵜⵜⵎⴰⴳⴰⵔ ⵓⴳⵓⵔⴻⵏ ⴷ ⵉⵡⴻⵄⵕⴰⵏⴻⵏ, ⵢⴻⵔⵏⴰ ⴰⵍⴰ ⵍⴻⵎⵄⴰⵡⵏⴰ ⵙⵖⵓⵔ ⵢⵉⴷⵓⴱⴰ ⵉⵏⴰⴳⴷⵓⴷⴻⵏ (ⵙⵓⵍⵓⵟⴰⵜ ⵄⵓⵎⵓⵎⵉⵢⵢⴰ) ⴰⵢ ⵉⵣⴻⵎⵔⴻⵏ ⴰⴷ ⵜⵜ-ⵉⵄⴰⵡⴻⵏ ⴰⴽⴽⴻⵏ ⴰⴷ ⵜⴻⴽⴽ ⵉ ⵜⴰⵍⵍⵉⵜ-ⴰ ⵜⴰⵡⴻⵄⵕⴰⵏⵜ.

ⵢⴻⵏⵏⴰ-ⴷ ⵎⴰⵙⵙ ⵎⴻⵔⴰⵀ ⴰⵢⴰ ⴷⴻⴳ ⵢⵉⵡⴻⵏ ⵏ ⵓⵎⵢⴰⴳⴻⵔ ⴰⵢⴷⴻⴳ ⵜⵜⴻⴽⴽⴰⵏ ⴰⵣⴰⵍ ⵏ 100 ⵏ ⵢⵉⴽⴰⵜⴰⵔⴻⵏ (ⵉⵟⴰⵔⴰⵜ) ⵏ ⵢⵉⵏⵎⵓⵍⴰ (ⵏⴰⵇⴰⴱⴰⵜ), ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵢⵉⵡⴻⵏ ⵏ ⵓⵍⵖⵓ ⵏ ⵜⴻⵕⵎⵉⵙⵜ-ⴰ.

ⵖⴻⴼ ⵍⴻⵃⵙⴰⴱ ⵏ ⵓⵏⴻⵎⵀⴰⵍ ⴰⵎⴰⵜⵓ ⵏ ⵜⴷⵣⴰⵢⵔⵉⵜ ⵏ ⵡⴰⵎⴰⵏ, ⵓⵙⵙⴰⵏ-ⴰ, ⵜⴰⵕⵎⵉⵙⵜ-ⴰ ⵜⴰⵏⴰⴳⴷⵓⴷⵜ ⵍⴰ ⵜⵅⴻⵚⵚⴻⵔ 30 ⵏ ⵢⵉⴷⵉⵏⴰⵕⴻⵏ ⵉ ⵓⵎⵉⵜⵔ ⴰⴳⴰⵙⴰⵙ (ⵎ3) ⵏ ⵡⴰⵎⴰⵏ ⵢⴻⵜⵜⵡⴰⴼⴻⵔⵇⴻⵏ.

ⵢⴻⵔⵏⴰ ⵢⴻⵏⵏⴰ-ⴷ ⴷⴰⴽⴽⴻⵏ ⵍⴻⵅⵚⴰⵔⴰ-ⴰ ⴰⴷ ⵜⴻⵔⵏⵓ ⵖⴻⴼ ⵍⴵⴰⵍ ⵏ ⵜⵎⴻⵔⵏⵉⵡⵜ ⵏ ⵙⵙⵓⵎⴰ ⵏ ⵜⴻⵥⵡⴻⵔⵜ (ⵟⴰⵇⴰ) ⵙ 20% ⴷ ⵓⴳⴰⵣⵡⴰⵍ ⵙ 40%.

ⵙ ⵡⴰⵢⴰ, ⴰⵍⴰ ⵜⵉⴷⴷⵉⵜ ⵉⴵⴻⵀⴷⴻⵏ ⵏ ⵓⵏⵏⴻⵔⵏⵉ ⴰⴷ ⵢⴻⴵⴵⴻⵏ ⵜⴰⴷⵣⴰⵢⵔⵉⵜ ⵏ ⵡⴰⵎⴰⵏ ⴰⴷ ⵜⴻⴽⴽ ⵉ ⵜⴰⵍⵍⵉⵜ-ⴰ ⵏ ⵡⵓⴳⵓⵔⴻⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ.

ⵜⵀⴻⵢⵢⴰ-ⴷ ⵜⴷⵣⴰⵢⵔⵉⵜ ⵏ ⵡⴰⵎⴰⵏ ⴰⵙⵙⵓⴷⴷⴻⵙ (ⵜⴰⵏⴹⵉⵎ) ⴰⵎⴰⵢⵏⵓ ⴰⴽⴽⴻⵏ ⴰⴷ ⵜⴻⵙⵙⴻⴵⵀⴻⴷ ⴰⵙⵙⴻⴼⵔⴻⴽ-ⵏⵏⴻⵙ (ⵜⴰⵙⵢⵓⵔ) ⵙ ⵓⵙⵔⵓⵎⵎⴻⵙ ⴰⴽⴽⴻⵏ ⴰⴷ ⵜⴻⴼⴽ ⴷⴷⵓⵕ ⴷ ⴰⵎⴻⵇⵔⴰⵏ ⵓⴳⴰⵔ ⵉ ⵜⵉⴳⴳⵜⵉⵏ-ⵏⵏⴻⵙ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴻⵎⵀⴰⵍ ⴰⵎⴰⵜⵓ.

ⵙⴻⴳ ⵢⵉⴷⵉⵙ ⵏⵉⴹⴻⵏ, ⵢⴻⵏⵏⴰ-ⴷ ⴷⴰⵖ ⴷⴰⴽⴽⴻⵏ ⵜⴻⴷⴷⴻⵎ ⵜⴻⵕⵎⵉⵙⵜ-ⴰ ⴽⵔⴰ ⵏ ⵢⵉⵃⴻⵣⵣⵉⴱⴻⵏ ⵏⵉⴹⴻⵏ ⵉ ⵍⵎⴻⵏⴷ ⵏ ⵡⴰⵢⴰ, ⴰⵎ ⵓⵄⴰⵡⴻⴷ ⵏ ⵜⵎⵓⵖⵍⵉ ⴷⴻⴳ ⵜⵓⵖⴷⴰⴹⵉⵏ ⵏ ⵡⴰⵙⵓⵏⴻⵏ, ⴰⵙⵜⴻⵏⵢⵉ ⵏ ⵍⴻⵄⵇⵓⴷⴰⵜ ⵏ ⵓⵎⵍⴰⵣⵎⴰⵔ (ⴰⴷⴰ’) ⴷ ⵢⵉⵏⴻⵎⵀⴰⵍⴻⵏ ⵏ ⵜⵉⴳⴳⵜⵉⵏ ⴷ ⵓⵙⵙⴻⵇⴷⴻⵛ ⵏ ⵓⵇⴻⵢⵢⴻⵎ ⵉⵎⵣⵉⵔⴻⴳ (ⵎⵓⵙⵜⴰⵇⵉⵍ).

ⵏⵏⵉⴳ ⵡⴰⵢⴰ, ⵢⴻⵏⵏⴰ-ⴷ ⵎⴰⵙⵙ ⵎⴻⵔⴰⵀ, ⴷⴻⴳ ⵓⵎⵢⴰⴳⴻⵔ-ⴰ, ⴷⴰⴽⴽⴻⵏ ⴰⵜⴰⵏ ⵢⴻⵡⵊⴻⴷ ⴰⴽⴽⴻⵏ ⴰⴷ ⵢⴻⵅⴷⴻⵎ ⵉ ⵍⵎⴻⵏⴷ ⵏ ⵓⵙⵙⴻⵍⵀⵓ ⵏ ⵜⵎⴻⴷⴷⵓⵔⵜ ⴷ ⵓⵎⴻⴷⵅⵓⵍ ⵏ ⵢⵉⵅⴻⴷⴷⴰⵎⴻⵏ, ⵢⴻⵔⵏⴰ ⵢⴻⵏⵏⴰ-ⴷ ⴷⴰⴽⴽⴻⵏ ⵙ ⴽⵔⴰ ⵏ ⵓⵙⵙⴻⵍⵀⵓ ⵏ ⵢⵉⴳⵎⴰⴹ ⴰⴷ ⵜⵜⵡⴰⵅⴻⵍⵍⵚⴻⵏ ⴼⴻⵍⵍ-ⴰⵙ ⵡⵉⴷ ⴰⵢ ⵜ-ⵉⴷ-ⵉⴳⴰⵏ.

ⵢⴰⴳⵉ, ⵙⴻⴳ ⴼⵓⵕⴰⵕ ⴷ ⴰⵙⴰⵡⴻⵏ, ⴰⴷ ⵜⴻⴱⴷⵓ ⵜⴻⵕⵎⵉⵙⵜ-ⴰ ⴰⴷ ⵜⴻⵙⵙⴻⵇⴷⴰⵛ ⴰⵏⴻⴳⵔⴰⵡ ⴰⵎⴰⵢⵏⵓ ⵏ ⵜⵛⴻⵀⵕⵉⵢⵉⵏ ⴰⴷ ⴷ-ⵉⵃⴰⵣⴻⵏ 68% ⵙⴻⴳ ⵢⵉⵅⴻⴷⴷⴰⵎⴻⵏ, ⵢⴻⵔⵏⴰ ⵜⵉⴳⴳⵜⵉⵏ ⵏ ⵜⴷⵣⴰⵢⵔⵉⵜ ⵏ ⵡⴰⵎⴰⵏ ⴰⵢ ⵉⵣⴻⵎⵔⴻⵏ ⴰⴷ ⴱⴷⵓⵏⵜ ⴰⴷ ⵜⵜⵅⴻⵍⵍⵉⵚⴻⵏⵜ ⵜⵉⵛⴻⵀⵕⵉⵢⵉⵏ-ⴰ, ⵢⴻⵜⵜⵓⵏⴻⴼⴽ-ⴰⵙⴻⵏⵜ ⵜⵜⴻⵙⵔⵉⵃ ⴰⴷ ⵅⴻⵍⵍⵚⴻⵏⵜ ⵜⵉⵛⴻⵀⵕⵉⵢⵉⵏ-ⴰ ⵙⴻⴳ ⵢⴻⵏⵏⴰⵢⴻⵔ ⵏ 2016, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴻⵎⵀⴰⵍ.