ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴰⵥⴻⴹⴹⴰ ⵏ ⵢⵉⴱⵔⵉⴷⴻⵏ ⵢⴻⵙⵙⴻⴼⴽ ⴰⴷ ⵢⴻⵙⵙⴻⴵⵀⴻⴷ ⵜⴰⴷⴰⵎⵙⴰ ⵜⴰⵖⴻⵍⵏⴰⵡⵜ

ⵎⴻⵙⵜⵖⴰⵏⴻⵎ – ⵉⵡⴻⴽⴽⴻⴷ-ⴷ ⵓⵏⴻⵖⵍⴰⴼ ⵏ ⵢⵉⵎⴰⵀⵉⵍⴻⵏ ⵉⵏⴰⴳⴷⵓⴷⴻⵏ (ⴰⵛⵖⴰⵍ ⵄⵓⵎⵓⵎⵉⵢⵢⴰ), ⴰⴱⴷⴻⵍⴽⴰⴷⴻⵔ ⵧⵓⴰⵍⵉ, ⴰⵙⵙ ⵏ ⵍⴰⵕⴻⴱⵄⴰ ⵜⴰⵎⴻⴷⴷⵉⵜ ⴷⴻⴳ ⵎⴻⵙⵜⵖⴰⵏⴻⵎ, ⴷⴰⴽⴽⴻⵏ ⴰⵥⴻⴹⴹⴰ ⵏ ⵢⵉⴱⵔⵉⴷⴻⵏ ⵢⴻⵙⵙⴻⴼⴽ ⴰⴷ ⵢⴻⵙⵙⴻⴵⵀⴻⴷ ⵜⴰⴷⵓⵎⵚⵓⴽⴰ ⵏ ⵍⵍⵙⴰⵙ ⵏ ⵜⴷⴰⵎⵙⴰ ⵜⴰⵖⴻⵍⵏⴰⵡⵜ.

ⴰⵢⴻⵏ ⵢⴻⵍⵍⴰⵏ ⴷ ⵉⴱⵔⵉⴷⴻ ⴰⵙⵙ-ⴰ ⵢⴻⵣⵎⴻⵔ ⴰⴷ ⵢⴻⵙⵙⴻⴱⵖⵙⴻⵙ (ⵢⵓⵛⴰⴵⴵⵉⵄ) ⴰⵙⵙⴻⴼⵜⵉ ⵢⴻⵔⵏⴰ ⴰⴷ ⵢⴻⵜⵜⴻⴽⴽⵉ ⴷⴻⴳ ⵜⴷⴰⵎⵙⴰ ⵜⴰⵖⴻⵍⵏⴰⵡⵜ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ ⵎⴰⵙⵙ ⵧⵓⴰⵍⵉ ⴷⴻⴳ ⵡⴰⵙⵙ-ⵏⵏⴻⵙ ⴰⵎⴻⵣⵡⴰⵔⵓ ⵏ ⵜⴻⵔⵣⵉ ⵉ ⵓⵙⵙⴻⵏⴼⵇⴻⴷ ⵏ ⵜⵡⵉⵍⴰⵢⵜ-ⴰ.

ⵢⴻⵏⵏⴰ-ⴷ ⵓⵏⴻⵖⵍⴰⴼ ⴷⴰⴽⴽⴻⵏ ⵜⴰⵡⵉⵍⴰⵢⵜ ⵏ ⵎⴻⵙⵜⵖⴰⵏⴻⵎ ⵜⴻⵡⵊⴻⴷ ⴰⴽⴽⴻⵏ ⴰⴷ ⴷ-ⵜⴻⴱⴷⵓ ⵜⴰⵍⵍⵉⵜ ⵜⴰⵎⴰⵢⵏⵓⵜ ⵉⵎⵉ ⴰⵢ ⴷ-ⵢⴻⵡⵊⴻⴷ ⵢⴰⴳⵉ ⵓⵥⴻⴹⴹⴰ ⵏ ⵢⵉⴱⵔⵉⴷⴻⵏ ⵢⴻⵍⵍⴰⵏ ⴷ ⵜⴰⴷⵓⵎⵚⵓⴽⴰ (ⴱⵓⵏⵢⴰ ⵜⴰⵃⵜⵉⵢⴰ) ⴰⴷ ⵢⴻⵜⵜⴻⴽⴽⵉⵏ ⴷⴻⴳ ⵓⵙⵏⴻⵔⵏⵉ ⴰⴷⴰⵎⵙⴰⵏ ⴷ ⵓⵙⵏⵓⵍⴼⵓ ⵏ ⵢⵉⵎⵓⴽⴰⵏ ⵏ ⵓⵅⴻⴷⴷⵉⵎ, ⵢⴻⵔⵏⴰ ⵉⵡⴻⴽⴽⴻⴷ-ⴷ ⴷⴰⴽⴽⴻⵏ ⴰⴼⵎⵉⴹⵉ (ⵏⵉⵙⴱⴰ) ⵏ ⵍⴻⵀⵀⵓ ⵏ ⵢⵉⴱⵔⵉⴷⴻⵏ ⵏ ⵜⵡⵉⵍⴰⵢⵜ-ⴰ ⵍⴰ ⵜⴻⵜⵜⴻⵣⵣⵉ ⴳⴰⵔ 80 ⴷ 100% ⵙⴻⴳ ⵢⵉⴷⵉⵙ ⵏ ⵓⵚⴻⴳⴳⴻⵎ ⴷ ⵜⵖⴰⵔⴰ, ⵢⴻⵔⵏⴰ ⵢⴻⵍⵍⴰ-ⴷ ⵡⴰⵢⴰ ⴷⴻⴳ ⵓⴽⴰⵜⴰⵔ ⵏ ⵡⴰⵀⵉⵍ ⵏ ⵢⵉⵎⴰⵀⵉⵍⴻⵏ ⵉⵏⴰⴳⴷⵓⴷⴻⵏ ⵏ ⵜⴰⵍⵍⵉⵜ ⵏ 1999-2014 ⴰⵢ ⴷ-ⵢⴻⵙⵇⴰⵎⴻⵏ, ⵙ ⵓⵊⴻⵎⵎⴰⵍ, ⵓⴳⴰⵔ ⵏ 80 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⴷⵉⵏⴰⵕⴻⵏ.

ⵏⵏⵉⴳ ⵡⴰⵢⴰ, ⵉⴳⴻⵔ-ⴷ ⵎⴰⵙⵙ ⵧⵓⴰⵍⵉ ⵜⵉⵖⵔⵉ ⵉ ⵜⴻⵕⵎⵉⵙⵉⵏ (ⵛⴰⵔⵉⴽⴰⵜ) ⵏ ⵍⴻⴱⵏⵉ ⵏ ⵢⵉⴱⵔⵉⴷⴻⵏ ⴰⴽⴽⴻⵏ ⴰⴷ ⵜⵜⵇⴰⴷⴰⵔⴻⵏⵜ ⵜⴰⵍⵍⵉⵜ ⴰⵢ ⴰⵙⴻⵏ-ⵢⴻⵜⵜⵓⵏⴻⴼⴽⴻⵏ ⴰⴽⴽⴻⵏ ⴰⴷ ⴱⵏⵓⵏⵜ ⵉⴱⵔⵉⴷⴻⵏ, ⵢⴻⵔⵏⴰ ⵢⴻⵏⵏⴰ-ⴷ ⴷⴰⴽⴽⴻⵏ ⴰⴷ ⵢⵓⵖⴰⵍ ⵓⵡⴰⵏⴰⴽ (ⴷⴰⵡⵍⴰ) ⴰⴷ ⵢⴻⵙⵙⴻⴼⵇⴰⴷ ⵜⵜⴰⵡⵉⵍⴰⵜ ⵏ ⵍⴻⴱⵏⵉ ⵏ ⵜⴻⵕⵎⵉⵙⵉⵏ-ⴰ.

ⵙⴻ ⵢⵉⴷⵉⵙ ⵏⵉⴹⴻⵏ, ⵢⴻⵏⵏⴰ-ⴷ ⴷⴰⴽⴽⴻⵏ, ⵙⴻⴳ-ⴰ ⵖⴻⵔ ⵙⴷⴰⵜ, ⴷ ⵜⵉⵕⵎⵉⵙⵉⵏ ⵜⵉⴷⵣⴰⵢⵔⵉⵢⵉⵏ ⴰⴷ ⵢⵓⵖⴰⵍⴻⵏ ⴰⴷ ⵜⵜⵡⴰⵡⴻⴽⴽⴰⵍⴻⵏⵜ ⵓⴳⴰⵔ ⴰⴽⴽⴻⵏ ⴰⴷ ⴱⴻⵏⵏⵓⵏⵜ ⵉⴱⵔⵉⴷⴻⵏ, ⵢⴻⵔⵏⴰ ⵉⴳⴻⵔ-ⴷ ⵜⵉⵖⵔⵉ ⵉ ⵜⴻⵕⵎⵉⵙⵉⵏ ⵏ ⵜⵎⵓⵔⵜ ⴰⴽⴽⴻⵏ ⴰⴷ ⵎⵙⴻⴳⵔⴰⵡⴻⵏⵜ ⵢⴻⵔⵏⴰ ⴷ ⴷ-ⴳⴻⵏⵜ ⵜⵉⴳⵔⴰⵡⵉⵏ ⴰⴽⴽⴻⵏ ⴰⴷ ⵙⴵⴻⵀⴷⴻⵏⵜ ⵜⵉⵣⴻⵎⵎⴰⵔ ⴷ ⵜⵜⴰⵡⵉⵍⴰⵜ-ⵏⵙⴻⵏⵜ, ⵢⴻⵔⵏⴰ ⴰⴷ ⵓⵖⴰⵍⴻⵏⵜ ⴰⴷ ⵙⵙⴻⵄⵊⴰⵍⴻⵏⵜ ⵜⴰⵍⵍⵉⵜ ⵏ ⵍⴻⴱⵏⵉ ⵢⴻⵔⵏⴰ ⴰⴷ ⴹⴻⵎⵏⴻⵏⵜ ⵜⴰⵖⴰⵔⴰ (ⴵⴰⵡⴷⴰ).

ⴷⴻⴳ ⵜⴻⵔⵣⵉ-ⵏⵏⴻⵙ, ⵢⴻⵔⵥⴻⵎ ⵓⵏⴻⵖⵍⴰⴼ ⴰⴱⵔⵉⴷ ⴰⵖⴻⵍⵏⴰⵡ 17 ⴰⴱ ⴰⵢⴷⴻⴳ ⴷ-ⵢⴻⵍⵍⴰ ⵓⵅⴻⴷⴷⵉⵎ ⵏ ⵓⵙⵙⴻⵎⵖⴻⵔ ⴷⴻⴳ ⵓⵎⴻⵛⵛⴰⵇ ⵏ 24 ⵏ ⵢⵉⴽⵉⵍⵓⵎⵉⵜⵔⴻⵏ ⴰⴽⴽⴻⵏ ⴰⴷ ⵢⴻⵜⵜⵡⴰⵇⵇⴻⵏ ⵖⴻⵔ ⵓⴱⵔⵉⴷ ⴰⵖⴻⵍⵏⴰⵡ 11 ⴷⴻⴳ ⵜⴻⵎⵏⴰⴹⵜ ⵏ ⵇⴷⴰⴷⵔⴰ, ⵢⴻⵔⵏⴰ ⴰⴷ ⵢⴻⵜⵜⵡⴰⵇⵇⴻⵏ ⵖⴻⵔ ⵓⴱⵔⵉⴷ ⴰⵖⴻⵍⵏⴰⵡ 23 ⴷⴻⴳ ⵜⴻⵎⵏⴰⴹⵜ ⵏ ⴵⴻⴷⵢⴰⵜ, ⴷⴻⴳ ⵜⵖⵉⵡⴰⵏⵜ ⵏ ⵙⵉⵔⴰⵜ.

ⴷⴻⴳ ⵜⵖⵉⵡⴰⵏⵜ ⵏ ⵄⵉⵏ ⴱⵓⴷⵉⵏⴰⵕ, ⵢⴻⵙⵙⴻⵔⵙ ⴷⴰⵖ ⵓⵏⴻⵖⵍⴰⴼ ⴰⵥⵔⵓ ⴰⵎⴻⵣⵡⴰⵔⵓ ⴷⴻⴳ ⵓⵙⴻⵏⴼⴰⵔ ⵏ ⵓⵄⴰⵡⴻⴷ ⵏ ⵓⵀⴻⵢⵢⵉ ⵏ 13 ⵏ ⵢⵉⴽⵉⵍⵓⵎⵉⵜⵔⴻⵏ ⵙⴻⴳ ⵓⴱⵔⵉⴷ ⵏ ⵜⵡⵉⵍⴰⵢⵜ 24 ⵢⴻⵇⵇⵏⴻⵏ ⵜⵉⵎⴷⵉⵏⵉⵏ ⵏ ⵅⵉⵔⴻⴷⴷⵉⵏ ⴷ ⵙⵉⴷⵉ ⴱⴻⵍⵄⴻⵟⵟⴰⵔ.

ⵙⴻⴳ ⵢⵉⴷⵉⵙ ⵏⵉⴹⴻⵏ, ⵢⴻⵃⴷⴻⵕ ⵓⵏⴻⵖⵍⴰⴼ ⵉ ⵓⵇⴻⴷⴷⴻⵎ ⵏ ⵢⵉⵡⴻⵏ ⵏ ⵓⵕⴰⴱⵓⵍ ⵖⴻⴼ ⵢⵉⵙⴻⵏⴼⴰⵔⴻⵏ ⵏ ⵓⵙⵏⴻⴼⵍⵉ (ⵜⴰⵏⵎⵉⵢⴰ) ⴷⴻⴳ ⵓⵏⵔⴰⵔ ⵏ ⵢⵉⵎⴰⵀⵉⵍⴻⵏ ⵉⵏⴰⴳⴷⵓⴷⴻⵏ ⴰⵢⵙⴻⴳ ⴷ-ⵜⴻⵙⴼⴰⵢⴷⵉ ⵜⵡⵉⵍⴰⵢⵜ-ⴰ ⴷⴻⴳ ⵡⴰⵀⵉⵍ ⵏ 5 ⵏ ⵉⵙⴻⴳⴳⴰⵙⴻⵏ ⴰⵏⴻⴳⴳⴰⵔⵓ ⴰⵢⴷⴻⴳ ⴷ-ⵍⵍⴰⵏⵜ 73 ⵏ ⵜⵎⴻⵀⵍⵉⵏ (ⵄⴰⵎⴰⵍⵉⵢⵢⴰⵜ) ⴰⵢ ⴷ-ⵢⴻⵙⵇⴰⵎⴻⵏ, ⵙ ⵓⵊⴻⵎⵎⴰⵍ, 22,7 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⴷⵉⵏⴰⵕⴻⵏ.