ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴰⵙⴷⵓⵇⵇⴻⵙ ⵏ ⵍⴻⵎⵛⴰⵡⵕⴰⵜ ⴳⴰⵔ ⵢⵉⵙⵓⵔⵉⵢⴻⵏ ⵢⴻⵃⵡⴰⴵ ⴽⵔⴰ ⵏ ⵡⴰⴽⵓⴷ ⵉ ⵓⵙⵙⴻⵡⵊⴻⴷ

ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⵢⴻⵖⵜⴻⵙ (ⵇⴰⵔⵔⴰⵔⴰ) ⵓⵎⴰⵣⵓⵏ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ, ⵙⵜⴰⴼⴼⴰⵏ ⴷⴻ ⵎⵉⵙⵜⵓⵔⴰ, ⴰⴷ ⵢⴻⵙⴱⴻⴽ ⵍⴻⵎⵛⴰⵡⵕⴰⵜ ⵏ ⵜⴰⵍⵡⵉⵜ ⵖⴻⴼ ⵙⵓⵔⵢⴰ ⴷⴻⴳ ⴳⴻⵏⴻⵠⴻ ⴰⵔⵎⴰ ⴷ 25 ⴼⵓⵕⴰⵕ, ⴰⴽⴽⴻⵏ ⵓⵔ ⴷ-ⵢⴻⵜⵜⵉⵍⵉ ⴰⵔⴰ ⵍⵅⵉⵍⴰⴼ ⴷ ⴰⵎⴻⵇⵔⴰⵏ ⴰⵢ ⵉⵣⴻⵎⵔⴻⵏ ⴰⴷ ⵢⴻⵙⵙⴻⵎⴼⴰⵔⴰⵇ ⵉⵅⵚⵉⵎⴻⵏ ⵉ ⵍⴻⴱⴷⴰ.

ⵎⵉⵙⵜⵓⵔⴰ ⵓⵔ ⵢⴻⵙⵙⴰⵡⴻⴹ ⴰⵔⴰ ⴰⴷ ⴷ-ⵢⴻⵙⵙⴻⵎⵍⵉⵍ ⴰⴽⴽⴻⵏ ⵉⵡⴰⵜⴰ ⵉⴷⵉⵙⴰⵏ ⴰⵢ ⵜⴻⵔⵣⴰ ⵜⴻⵎⵙⴰⵍⵜ (ⴰⵏⴰⴱⴰⴹ [ⵃⵓⴽⵓⵎⴰ] ⴷ ⵜⴻⵏⵎⴻⴳⵍⴰ [ⵎⵓⵄⴰⵔⴰⴹⴰ]), ⵢⴻⵔⵏⴰ ⵢⴻⵏⵏⴰ-ⴷ, ⴰⵙⵙ ⵏ ⵍⴰⵕⴻⴱⵄⴰ, ⴷⴰⴽⴽⴻⵏ ⵢⴻⵖⵜⴻⵙ ⴰⴷ ⵢⴻⵙⴱⴻⴽ ⵍⴻⵎⵛⴰⵡⵕⴰⵜ ⵙ ⵜⵉⵏ ⵏ ⵓⵃⴻⵣⵣⴻⴱ.

ⴰⵢⴰ ⵓⵔ ⴷ-ⵢⴻⵍⵍⵉ ⴰⵔⴰ ⴷ ⴰⴼⵛⴰⵍ, ⵡⴰⵏⴰⴳ ⴷ ⴰⵙⴳⵓⵏⴼⵓ ⴽⴰⵏ ⵉ ⵍⵎⴻⵏⴷ ⵏ ⵓⵙⵙⴻⵡⵊⴻⴷ ⵏ ⵜⵖⴰⵡⵙⵉⵡⵉⵏ ⴰⴽⴽⴻⵏ ⵉⵡⴰⵜⴰ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⴷⴻ ⵎⵉⵙⵜⵓⵔⴰ. ⵢⵓⵖ ⵍⵃⴰⵍ, ⵙⴻⴳ ⵡⴰⵙⵎⵉ ⴰⵢ ⵡⵡⴹⴻⵏⵜ ⵜⴻⵎⴰⴳⵍⵉⵡⵉⵏ (ⵡⵓⴼⵓⴷ) ⵏ ⵓⵏⴰⴱⴰⴹ ⴷ ⵜⴻⵏⵎⴻⴳⵍⴰ ⵖⴻⵔ ⴳⴻⵏⴻⵠⴻ ⵓⵙⵙⴰⵏ ⵏ ⵍⵊⴻⵎⵄⴰ ⴷ ⵙⵙⴻⴱⵜ ⵢⴻⵣⵔⵉⵏ, ⵓⵔ ⴷ-ⵍⵍⵉⵏⵜ ⴰⵔⴰ ⴰⴽⴽ ⵍⴻⵎⵛⴰⵡⵕⴰⵜ, ⵢⴻⵔⵏⴰ ⴷ ⴰⵢⴰ ⴰⵢ ⵢⴻⴵⴵⴰⵏ ⵎⴰⵙⵙ ⴷⴻ ⵎⵉⵙⵜⵓⵔⴰ ⴰⴷ ⴷ-ⵢⵉⵏⵉ ⴷⴰⴽⴽⴻⵏ « ⵎⴰⵣⴰⵍ ⵢⴻⴳⴳⵓⵏⵉ ⵛⵛⵖⴻⵍ » ⴰⴽⴽⴻⵏ ⴰⴷ ⴱⴷⵓⵏⵜ ⵍⴻⵎⵛⴰⵡⵕⴰⵜ-ⴰ ⴰⴽⴽⴻⵏ ⵉⵡⴰⵜⴰ.

ⴷⴷⵓⵕⵜ ⴰⵢⴰ ⵙⴻⴳ ⵡⴰⵙⵎⵉ ⴰⵢ ⵍⴰ ⵉⵅⴻⴷⴷⴻⵎ ⵎⴰⵙⵙ ⴷⴻ ⵎⵉⵙⵜⵓⵔⴰ ⴰⴽⴽⴻⵏ ⴰⴷ ⴷ-ⵢⴻⴱⴷⵓ ⵍⴻⵎⵛⴰⵡⵕⴰⵜ ⵜⵉⵔⵓⵙⵔⵉⴷⵉⵏ (ⵖⴰⵢⵔ ⵎⵓⴱⴰⵛⵉⵔⴰ) ⴳⴰⵔ ⵢⵉⴷⵉⵙⴰⵏ ⴰⵢ ⵜⴻⵔⵣⴰ ⵜⴰⵍⵓⴼⵜ ⵏ ⵙⵓⵔⵢⴰ, ⴰⴽⴽⴻⵏ ⴰⴷ ⵢⴻⵄⵔⴻⴹ ⴰⴷ ⴷ-ⵢⴻⴱⴷⵓ ⵜⵉⴼⵔⴰⵜ ⵜⴰⵙⴻⵔⵜⵉⵜ ⵉ ⵜⴰⵍⵓⴼⵜ ⵏ ⵙⵓⵔⵢⴰ ⴰⵢ ⵢⴻⴳⵍⴰⵏ ⵢⴰⴳⵉ ⵙ 260.000 ⵏ ⵜⵎⴻⴷⴷⵓⵔⵉⵏ, ⵢⴻⵔⵏⴰ ⵜⴻⵙⵙⴻⵔⵡⴻⵍ ⵉⵎⴻⵍⵢⵓⵏⴻⵏ ⵏ ⵎⴻⴷⴷⴻⵏ ⵙⴻⴳ ⵢⵉⵅⵅⴰⵎⴻⵏ-ⵏⵙⴻⵏ ⴷⴻⴳ ⵜⴰⵍⵍⵉⵜ ⵏ 5 ⵏ ⵢⵉⵙⴻⴳⴳⴰⵙⴻⵏ.

ⵍⴻⵎⵛⴰⵡⵕⴰⵜ ⵏ ⴳⴻⵏⴻⵠⴻ ⵍⵍⴰⵏ-ⴷ ⵉ ⴱⴻⴷⴷⵓ ⵏ ⵓⴽⴰⵍⴰ (ⵎⴰⵙⴰⵔ) ⴰⵙⴻⵔⵜⵉ ⴰⴷ ⵢⴻⵙⵙⵉⵡⴹⴻⵏ ⵖⴻⵔ ⵓⵙⵙⴻⴱⴷⴻⴷ ⵏ ⵓⵏⴰⴱⴰⴹ ⵏ ⵜⵓⴽⴽⵉⵜ ⵙⴻⴳ-ⴰ ⵖⴻⴼ 6 ⵏ ⵡⴰⵢⵢⵓⵔⴻⵏ. ⵎⴰⵛⴰ ⵢⴻⵍⵍⴰ-ⴷ ⵓⵎⴳⴻⵔⵔⴰⴷ ⵖⴻⴼ ⵡⴰⵎⴻⴽ ⴰⴷ ⵢⵉⵍⵉ ⵓⵏⴰⴱⴰⴹ-ⴰ, ⵉⵎⵉ ⵜⴰⵏⵎⴻⴳⵍⴰ ⴷ ⵡⵉⴷ ⵉⴱⴻⴷⴷⴻⵏ ⴷⴻⴼⴼⵉⵔ-ⵙ ⴱⵖⴰⵏ ⴰⴷⴰⴱⵓ ⵏ ⵜⵓⴽⴽⵉⵜ ⴰⵢⴷⴻⴳ ⵓⵔ ⵢⴻⵜⵜⴻⴽⴽⴰⵢ ⴰⵔⴰ ⵓⵙⴻⵍⵡⴰⵢ ⴰⵙⵓⵔⵉ ⴱⴰⵛⵀⴰⵔ ⴰⵍ-ⴰⵙⵙⴰⴷ, ⵎⴰ ⴷ ⴰⵏⴰⴱⴰⴹ ⴷ ⴷⵉⵎⴻⵛⵇ ⴷ ⵢⵉⵎⵙⵉⵙⴰⵏ-ⵏⵏⴻⵙ (ⵃⵓⵍⴼⴰ’), ⵍⴰⴷⵖⴰ ⵔⵓⵙⵢⴰ, ⴱⵖⴰⵏ ⴰⵏⴰⴱⴰⴹ ⵏ ⵎⴻⵏⵡⴰⵍⴰ ⴰⵢⴷⴻⴳ ⴰⴷ ⵜⴻⵜⵜⴻⴽⴽⵉ ⵜⴻⵏⵎⴻⴳⵍⴰ.