Asebter amenzawi
Tunes: yettwakkes ugdal n tuffɣa deg yiḍ
TUNES – Nnan-d yiduba (suluṭat) itunsiyen, ass n lexmis, dakken yettwakkes ugdal-nni n tuffɣa ay d-gan ass n 22 Yennayer yezrin ɣef lǧal n lmuja-nni n tmesbaniyin timeqranin ay inekren i tikkelt tamezwarut seg wasmi ay d-tella tnekra taɣerfant n 2011.
« Imi ay telha tegnit n tɣellist (amn), yella-d uɣtas ass n lexmis (…) i tukksa n ugdal n tuffɣa deg wakk timnaḍin n Tunes », ɣef wakken ay d-yenna uɣlif atunsi n tɣawsiwin n daxel deg yiwen n ulɣu (bayan).
Deg tazwara, agdal-nni n tuffɣa yella-d seg s8:00 n tmeddit arma d s5:00 n tṣebḥit, sakkin yettwassafses seg 29 Yennayer d asawen, yerna yuɣal ibeddu-d ɣef s12:00 d asawen.
Nekrent, deg Yennayer yezrin, tmesbaniyin d timeqranin deg Tunes, yerna seg wasmi ay d-tella tnekra taɣerfant n 2011, ur iɛawed yenker ccwal ameqran anect wa ay inekren deg Yennayer.
Yebda-d umussu-a (ḥaraka) n tmesbaniyin deffir ma yemmut yiwen n umesbani, Ridha Yahiaoui, ass n 16 Yennayer s trisiti, deg wakud aydeg yella yettcetki-d imi ay kksen isem-nnes seg wumuɣ (qa’ima) n wid ad ssidfen ad xedmen deg twuri tanagdudt.
Urfan n lɣaci zerɛen, deg wussan ay d-iḍefren, ɣer temnaḍin niḍen, yerna yella-d yimenɣi gar yimesbaniyen ay yellan ttzellin iẓra d yiɣallen n tɣellist ay asen-d-yettarran s lgaz n yimeṭṭawen.
Deg yiḍ n 21 d 22 Yennayer, rẓan yimesbaniyen tiḥuna deg yiwen n ugmam (ḥayy) aɣerfan deg Tunes Tamaneɣt (Ettadhamen).
Dɣa, azekka-nni kan, gan-d yiduba itunsiyen agdal n tuffɣa « ɣef lǧal n utɛeddi ɣef wayla anagdud d wuslig », d « umihi » (xaṭar) ɣef tɣellist n tmurt d uɣref.
Uqbel agdal-a n tuffɣa, gan-d yiduba itunsiyen agdal niḍen deg temnaḍt ay d-yezzin ɣef tmaneɣt ass n 24 Nwembeṛ 2015, deffir ma tella-d txazzabit-nni taneɣmant aydeg ttwenɣen yiserdasen n tɣellist taselwayant deg Tunes Tamaneɣt. Ass-nni, 12 n yiserdasen ay yemmuten.
