Asebter amenzawi
Amɛawen gar Lezzayer d Paris i uṣeggem n temdint
LEZZAYER TAMANEɣT – Yebder-d uwali n Lezzayer, Abdelkader Zoukh, tamsalt n usseǧhed n umɛawen gar twilayt n Lezzayer d temdint n Paris deg wayen yerzan aṣeggem n temdint, deg umyager-nnes ass n lḥedd d tselwayt n tɣiwant d yimḍebbren n Paris.
« Aql-aɣ la nzerrew (nadrus) ttawilat n usseǧhed n umɛawen gar snat-a n tmunaɣ, ladɣa deg wayen yerzan aɛawed n uṣeggem n temdint » i lmend n ussefɛel n uɣawas (muxaṭṭaṭ) n temdint n Lezzayer n 2030 aydeg ad d-yili, ladɣa, ussileɣ n yikataren d trarast n tmussniwin-nsen, ɣef wakken ay d-yenna uwali n Lezzayer, Abdelkader Zoukh, mi yemmuger taselwayt n tɣiwant n Paris, Massa Anne Hidalgo deg uxxam n twilayt.
« Nemsefham nekk d tselwayt n tɣiwant n Paris akken ad gen yikataren (iṭarat) issilɣen (takwinat) d trarast n tmussniwin-nsen deg Uɣerbaz n Yijenyuṛen n Temdint n Paris akken ad kemmlen aɛawed n uṣeggem n lbenyan aqbur, yerna ad xedmen ɣef yisenfaren niḍen », ɣef wakken ay d-iwekked uwali.
Yesmekti-d uwali d akken Lezzayer Tamaneɣt testenya d Paris yiwen n leɛqed n tammidwa (ṣadaqa) deg 2003, yerna msefhament, seg yimir-nni d asawen, akken ad gent isenfaren d imeqranen n umɛawen, gar-asen aɛawed n uṣeggem n Wurti n Termitin n Lḥamma d ussebded n Uɣerbaz n Tezdeg deg Lezzayer Tamaneɣt, ay ireẓmen deg 2007.
Mass Zoukh d Massa Hidalgo nnan-d d akken tirzi-a n sin n wussan tella-d d tagnit i ussefɛel n yisenfaren imaynuten n umɛawen.
Teḥdeṛ daɣ tselwayt n tɣiwant i uqeddem awezlan n uɣawas n Lezzayer Tamaneɣt n 2030 ad yefken azal i ussifses n tiddit deg temdint, aḥuddu n twennaḍt, asnulfu n yimukan n zzhu d ussefti adamsan, ladɣa deg uḥric n yimeẓla (xadamat).
