Asebter amenzawi

Tɛeyyen-d Startfor ɣef lmaḍerra n tgermant taserdasant deg Libya

WAcINṭN – Tɛeyyen-d tnarit tusligt n wumel (istixbarat) n Stratfor d akken lemmer ad d-tili tgermant (tadaxxul) taserdasant tamaynut deg Libya, am deg 2011, aya yezmer ad yeswaɣ tamurt-a yerna ad as-yergel abrid, i ussebded n udabu alemmas iǧehden.

Deg yiwen n uṛabul ɣef tegnit n tɣellist (amn) deg Libya ay d-tessuffeɣ seg melmi kan tnarit-a n wumel, tenna-d Stratfor d akken acqirrew ameqran akk deg Libya, lemmer ad d-tili tgermant taserdasant niḍen netta d « assebded n unegraw (niḍam) asertan » ad yeddren yerna ad idum.

« Imi Iwanaken Yeddukklen d yimsisan-nsen (ḥulafa’) uṛufiyen la ssewjaden iman-nsen i tgermant deg Libya, yessefk ad ilin zemren ad sneqsen tizemmar n yiǧihadiyen akken ad ḍḍfen ikalen. D acu kan, yessefk daɣ ad qablen acqirrew-nni ay qublen deg 2011: lebni n unegraw asertan urkid seg yixerban ay d-yeggran seg wayen yellan zik d awanak (dawla) », ɣef wakken ay d-yebder uṛabul-a.

Scott Stewart, win ay yuran aṛabul-a umi isemma « Tezmer ad d-tettwassegrew Libya?», yesmekti-d d akken iɛeyyen-d yagi, deg 2011, ɣef lmaḍerra ayyes tezmer ad d-teglu tgermant n Temsisit Taṭlasit.

« Deg wayyur n Fuṛaṛ n 2011 neɣ ayyur uqbel ma tger-d iman-nnes temsisit tagraɣlant yellan ddaw ṛṛay n Temsisit Taṭlasit deg ṭṭrad aɣarim deg Libya, uriɣ-d yagi d akken asseɣli n Kadhafi yezmer ad iger Libya deg urway ad yeǧǧen iǧihadiyen ad nnernin », ɣef wakken ay d-yura umazzay-a (xabir) ay ixedmen d asestan (muḥaqqiq) deg Ugezdu n Uwanak yerna yessedda tisestanin n txazzabit tamezwarut ay iḥuzan World Trade Center, deg New York, deg 1993.