Asebter amenzawi

Kemmlent tegrawin tifalesṭiniyen lemcawṛat deg Qaṭar

LEZZAYER TAMANEɣT – Kemmlent lemcawṛat gar yimussa (ḥarakat) ifalesṭiniyen, Hamas d Fatah, ass n letniyen, deg Dduḥa (Qaṭar) i wass wis 2 ɣef usref akken ad fakent beḍḍu ay d-yellan gar Yifalesṭiniyen, ladɣa imi iduba n tuḍḍfa isṛayiliyen fuṛsen beḍḍu-a akken ad ssuggten atɛeddi ɣef yikalen yettwaḍḍfen d ussedrem n lbenyanat ifalesṭiniyen.

Timliliyin ay la d-yettilin gar yigensasen (mumattilin) n Fatah d Hamas seg wass n lḥedd yezrin deg tmaneɣt n Qaṭar d akemmel n udiwenni-nni (ḥiwar) amezwaru ay d-bdant yagi deg Yunyu yezrin, yerna yella-d waya d asurif amezwaru i lemcawṛat n tidet ad d-yilin seg-a ɣer sdat.

Deg lemcawṛat-a n wass n letniyen, deg Dduḥa, yal idis iqeddem-d tiɣawsiwin ayɣef ay d-yeccetka. Amussu n Hamas, ay yeḍḍfen tasfift n Ɣezza, yenna-d dakken atan yewjed ad yeqbel amtawa (ittifaq) n umsuɣal, maca yecreḍ-d ad d-yettunefk uzemz (tarix) ibanen i tefranin tiwamniyin d tselwayanin.

Ma d Fatah, ay d-yennan dakken ula d nettat tewjed i lemcawṛat, terna-d daɣ dakken tessaram d nettat ad ikemmlen ad teḥkem Adabu Afalesṭini, d ccerḍ ay iweɛṛen akken ad t-yeqbel umussu n Hamas.

Amyager-a n Dduḥa yezmer ad yerẓem abrid, ɣef wakken ay d-nnan kra n yimanayen (muraqibin), i umyager gar Mahmoud Abbas, aselway n Uwanak Afalesṭini, d Khaled Mechaal, iɣef n tnarit (maktab) tasertant n Hamas.