Asebter amenzawi

Tafidiṛalit Tamaḍlant n Tmeḍrit Tamegdayt tɛawed-d i teɣri i tlelli n Uneẓruf Utrim

MUSKU – Iɛawed twekked-d Useqqamu amatu n Tfidiṛalit Tamaḍlant n Tmeḍrit Tamegdayt abdad-nnes ɣer yidis n uɣref aṣeḥrawi deg yimenɣi-nnes i ugguccelman (taqrir maṣir) d uzarug (istiqlal), yerna yenced Iɣlanen Yeddukklen ad sɛejlen tukksa n ussehres n wakal-a yellan d tahrest taneggarut deg Tefriqt, ɣef wakken ay d-tenna Tnegga n Tɣemsa Taṣeḥrawit (SPS).

Deg yiwen n ulɣu (bayan) ay d-yeffɣen deg tgara n temlilit n useqqamu amatu ay d-yellan deg Musku, tenna-d Tfidiṛalit d akken attan « tebded ɣer yidis n yimenɣi n yilemẓiyen iṣeḥrawiyen mgal tuḍḍfa tameṛṛukit i lmend n ugguccelman d uzarug ».

Tettekka deg temlilit-a tmagla (wafd) n Tdukli n Tmeḍrit Taṣeḥrawit, yerna, mi tt-id-iṣaḥ wawal, tenna-d d akken yessefk ad tettwasseɛjel tukksa n ussehres (istiɛmar) seg Uneẓruf Utrim s ussuddes n tsefrant n ugguccelman i uɣref aṣeḥrawi d uḥuddu n yizerfan n umdan deg yikalen iṣeḥrawiyen yettwaḍḍfen, d uḥbas n tukerḍa ay la tettaker Meṛṛuk tiɣbula tigamanin n wakal aṣeḥrawi s uttekki n teṛmisin tibeṛṛaniyin, ladɣa tiṛmisin tuṛufiyin.

Iskasiyen (niqacat) n useqqamu llan-d ɣef waṭas n temsal, gar-asen ayen yerzan tameḍrit (cabab) d dduṛ-nnes deg temsal timiranin ay yerzan tuddsa-a.

Seg yidis niḍen, tesqerdec tmagla taṣeḥrawit, deg yijifeṛ n temlilit n useqqamu, d tmagliwin n tmeḍrit d yikabaren isertanen irusiyen ɣef temsal d tedyanin tineggura ay d-yellan deg taluft taṣeḥrawit, dduṛ ay tetturar tmeḍrit taṣeḥrawit deg yimenɣi ɣef uslelli (taḥrir) n Uneẓruf Utrim d ussemyuddes (tansiq) i usḥulfu n tmetti tarusit ɣef temsalt n Uneẓruf Utrim, ɣef wakken ay d-tenna tnegga taṣeḥrawit n SPS.