Asebter amenzawi

Talɣuɣa tamnaḍant n ukungfu-wucu ass n ljemɛa deg Tisemsilt

TISEMSILT, – Talɣuɣa tamnaḍant (ǧihawiyya) n ukungfu-wucu ad tebdu ass n ljemɛa deg tzeqqa takkaddalt n umeɣrus « Alouat Tayeb » n Tsemsilt i taggayin (fi’at) n yilemẓiyen d yimeqranen, ɣef wakken ay aɣ-d-xebbren yimsuddsen.

Tadyant-a ay d-tga Tfidiṛalit Tadzayrit n Tẓuriwin n Yimenɣi s umɛawen d Tseqqamut Taɣelnawt n ukungfu-wucu d tmehla (mudiriyya) n yilemẓiyen d waddal, ad ttekkin deg-s 150 n yinaddalenn, gar-asen yirgazen d tsednan, seg 18 n teɣlamin n twilayin n Tsemsilt, Tiheṛt, Wehṛan, Cclef d Mɛeskeṛ, ɣef wakken ay d-yenna uselway n useqqamu n ussuddes (tanḍim) n yimsizewren iɣelnawen d yimnaḍanen n tfidiṛalit, Abdelkader Boumezrag.

Ahil n umsizwer-a n sin n wussan ad ilin deg-s yikataten n yiɣaniben yemgerraden, gar-asen wid n ugafa, wid n unẓul, taleggimt n ugafa, agestur, d yimenɣi.

Talɣuɣa-a ad d-siggen fell-as 9 n yinefrayen (ḥukkam) n tfesna tamnaḍant d tɣelnawt, yerna wid ay d-yefrurin deg-s ad ttekkin deg telɣuɣa taɣelnawt ad d-yilin deg Meɣres deg Lezzayer Tamaneɣt.

Tadyant-a taddalant ad d-tili tagnit i tseqqamut taɣelnawt akken ad d-taf inaddalen ayyes ad tesseǧhed taɣlamt-nnes taɣelnawt i uttekki deg yimsizewren igraɣlanen ad d-yilin aseggas-a, ɣef wakken ay d-yenna Boumezrag.

Talɣuɣa-a ad tfak s tfugla (ḥafl) aydeg ad rren tajmilt i yisleɣmayen (mudarribin), inefrayen d yicriken n Tfidiṛalit Tadzayrit n Tẓuriwin n Yimenɣi.