ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

7 ⵏ ⵜⵎⵓⵔⴰ ⴰⴷ ⵢⴻⵜⵜⴻⴽⴽⵉⵏ ⴷⴻⴳ ⵜⴻⵍⵖⵓⵖⴰ ⵜⴰⴼⵔⵉⵇⵉⵜ ⵏ ⵜⵛⵉⵔⵜ ⵜⴰⵎⴰⴼⴰⴳⵜ ⵏ ⵜⵙⴻⴷⵏⴰⵏ ⵉ ⵓⵄⴻⴷⴷⵉ ⵖⴻⵔ ⵔⵉⵧ

ⵢⴰⵧⵓⵏⴷⴻ – 7 ⵏ ⵜⵎⵓⵔⴰ ⵜⵉⴼⵔⵉⵇⵉⵢⵉⵏ, ⴳⴰⵔ-ⴰⵙⴻⵏⵜ ⵍⴻⵣⵣⴰⵢⴻⵔ, ⴰⴷ ⵢⴻⵜⵜⴻⴽⴽⵉⵏ ⴷⴻⴳ ⵜⴻⵍⵖⵓⵖⴰ ⵏ ⵓⵄⴻⴷⴷⵉ ⵏ ⵜⵛⵉⵔⵜ ⵜⴰⵎⴰⴼⴰⴳⵜ ⵏ ⵜⵙⴻⴷⵏⴰⵏ ⴰⴽⴽⴻⵏ ⵄⴻⴷⴷⵉⵏⵜ ⵖⴻⵔ ⵡⵓⵔⴰⵔⴻⵏ ⵓⵍⵉⵎⵒⵉⵢⴻⵏ ⵏ ⵔⵉⵧ ⴰⴷ ⴷ-ⵢⴻⴱⴷⵓⵏ ⴰⵙⵙ ⵏ ⵍⵊⴻⵎⵄⴰ ⴷⴻⴳ ⵍⴻⵇⵚⴻⵔ ⵏ ⵡⴰⴷⴷⴰⵍⴻⵏ ⵏ ⵢⴰⵧⵓⵏⴷⴻ, ⴷⴻⴳ ⴽⴰⵎⵔⵓⵏ.

ⵎⴻⵏⵖⵉⵔ ⴽⴰⵎⵔⵓⵏ, ⵜⴰⵎⵓⵔⵜ ⵜⵉⵎⵙⵓⴷⴷⴻⵙⵜ, ⵜⴰⵍⵖⵓⵖⴰ-ⴰ ⴰⴷ ⵜⵜⴻⴽⴽⵉⵏⵜ ⴷⴻⴳ-ⵙ ⵍⴻⵣⵣⴰⵢⴻⵔ, ⴽⴻⵏⵢⴰ, ⵎⴰⵚⴻⵔ, ⵜⵓⵏⴻⵙ, ⵓⴳⴰⵏⴷⴰ ⴷ ⴱⵧⵜⵙⵡⴰⵏⴰ.

ⵜⴰⵎⵓⵔⵜ ⴰⴷ ⴷ-ⵢⴻⴼⵔⵓⵔⵉⵏ ⵙⴻⴳ ⵜⴻⵍⵖⵓⵖⴰ-ⴰ ⴰⴷ ⵜⴻⵜⵜⴻⴽⴽⵉ ⴷⴻⴳ ⵡⵓⵔⴰⵔⴻⵏ ⵓⵍⵉⵎⵒⵉⵢⴻⵏ ⵏ 2016, ⵎⴰ ⴷ ⵜⵉⵙ ⵙⵏⴰⵜ ⴷ ⵜⵉⵙ 3 ⴰⴷ ⵜⴻⵏⵜ-ⵉⴷ-ⵜⵚⴰⵃ ⵜⴻⴳⵏⵉⵜ ⵏⵉⴹⴻⵏ ⴰⴽⴽⴻⵏ ⴰⴷ ⵜⵜⴻⴽⴽⵉⵏⵜ ⴷⴻⴳ ⵡⵓⵔⴰⵔⴻⵏ-ⴰ ⴱⴻⵕⵕⴰ ⵉ ⵜⴻⵍⵖⵓⵖⴰ-ⴰ. 7-ⴰ ⵏ ⵜⴻⵖⵍⴰⵎⵉⵏ ⴰⴷ ⵜⵜⵡⴰⴼⴻⵔⵇⴻⵏⵜ ⵖⴻⴼ ⵙⵏⴰⵜ ⵏ ⵜⴽⴻⵎⵎⵓⵛⵉⵏ. ⵜⴰⴳⵔⴰⵡⵜ ⴰ ⴰⴷ ⵉⵍⵉⵏⵜ ⴷⴻⴳ-ⵙ 3 ⵏ ⵜⵎⵓⵔⴰ, ⵎⴰ ⴷ ⵜⴰⴳⵔⴰⵡⵜ ⴱ ⴰⴷ ⵉⵍⵉⵏⵜ ⴷⴻⴳ-ⵙ 4.

ⴽⴻⵏⵢⴰ ⴷ ⵏⴻⵜⵜⴰⵜ ⴰⵢ ⴷ ⵜⴰⵍⵖⵓⵖⵜ ⵏ ⵜⴻⴼⵔⵉⵇⵜ ⵢⴻⵔⵏⴰ ⵢⴻⵍⵍⴰ-ⴷ ⵓⵙⵙⵉⵔⴻⵎ ⴷ ⴰⵎⴻⵇⵔⴰⵏ ⴷ ⵏⴻⵜⵜⴰⵜ ⴰⴷ ⵉⵄⴻⴷⴷⵉⵏ ⵖⴻⵔ ⵡⵓⵔⴰⵔⴻⵏ ⵓⵍⵉⵎⵒⵉⵢⴻⵏ, ⵍⴰⴷⵖⴰ ⵉⵎⵉ ⴰⵢ ⴷ-ⵜⴻⵡⵡⵉ ⴰⵎⴻⵛⵡⴰⵕ ⵉⴼⴰⵣⴻⵏ ⴷⴻⴳ ⵓⵙⴻⴳⴳⴰⵙ ⵏ 2015, ⵢⴻⵔⵏⴰ ⵜⴻⵔⴱⴻⵃ-ⴷ ⵜⴰⵍⵖⵓⵖⴰ ⵏ ⵜⴻⴼⵔⵉⵇⵜ ⵉ ⵜⵉⴽⴽⴻⵍⵜ ⵜⵉⵙ 9, ⴰⵎ ⵡⴰⴽⴽⴻⵏ ⴰⵢ ⵜⴻⵡⵡⵉ ⵜⴰⵣⴰⵍⵖⵉ ⵏ ⵡⵓⵔⴻⵖ ⴷⴻⴳ ⵡⵓⵔⴰⵔⴻⵏ ⵓⵍⵉⵎⵒⵉⵢⴻⵏ.

ⵜⴰⵖⵍⴰⵎⵜ ⵜⴰⴷⵣⴰⵢⵔⵉⵜ, ⵙⴻⴳ ⵢⵉⴷⵉⵙ-ⵏⵏⴻⵙ, ⴷ ⵏⴻⵜⵜⴰⵜ ⴰⵢ ⴷ ⵜⴰⵖⵍⴰⵎⵜ ⵜⴰⴼⵔⵉⵇⵉⵜ ⵜⴰⵡⵃⵉⴷⵜ ⴰⵢ ⵢⴻⵜⵜⴻⴽⴽⴰⵏ ⴷⴻⴳ ⵡⵓⵔⴰⵔⴻⵏ ⵓⵍⵉⵎⵒⵉⵢⴻⵏ ⵏ ⵒⵉⴽⵉⵏ (ⵛⵛⵉⵏⵡⴰ) ⴷ ⵍⵧⵏⴷⵧⵏ (ⴱⵔⵉⵟⴰⵏⵢⴰ ⵜⴰⵎⴻⵇⵔⴰⵏⵜ), ⵢⴻⵔⵏⴰ ⵓⵍⴰ ⴷ ⵏⴻⵜⵜⴰⵜ ⵍⴰ ⵜⴻⵙⵙⴰⵔⴰⵎ ⴰⴷ ⵜⴻⵜⵜⴻⴽⴽⵉ ⴷⴻⴳ ⵡⵓⵔⴰⵔⴻⵏ ⵓⵍⵉⵎⵒⵉⵢⴻⵏ ⵉ ⵜⵉⴽⴽⴻⵍⵜ ⵜⵉⵙ 3. ⵜⵉⵎⴰⵔⵉⵔⵉⵏ ⵜⵉⴷⵣⴰⵢⵔⵉⵢⵉⵏ ⵙⵡⴻⵊⴷⴻⵏⵜ ⵉⵎⴰⵏ-ⵏⵙⴻⵏⵜ ⴷⴻⴳ ⵜⵓⵏⴻⵙ ⵜⴰⵎⴰⵏⴻⵖⵜ ⴰⵏⴷⴰ ⴰⵢ ⵓⵔⴰⵔⴻⵏⵜ 3 ⵏ ⵜⴻⵎⵍⵉⵍⵉⵢⵉⵏ ⵜⵉⵎⵎⵉⴷⵡⴰⵏⵉⵏ ⴷ ⵜⴻⵅⵚⵉⵎⵉⵏ-ⵏⵙⴻⵏⵜ ⵜⵉⵜⵓⵏⵙⵉⵢⵉⵏ ⴰⵢⴷⴻⴳ ⵍⴻⵣⵣⴰⵢⴻⵔ ⵜⴻⵔⴱⴻⵃ ⵜⵉⴽⴽⴻⵍⵜ ⴽⴰⵏ ⵢⴻⵔⵏⴰ ⵜⴻⵅⵚⴻⵔ ⵙⵏⴰⵜ.

ⵎⴰ ⴷ ⵎⴰⵚⴻⵔ, ⴷⴻⴼⴼⵉⵔ ⵎⴰ ⵜⵖⴰⴱ ⴽⵔⴰ ⵏ ⵢⵉⵙⴻⴳⴳⴰⵙⴻⵏ ⵙⴻⴳ ⵜⵖⴻⵔⵖⴻⵔⵜ ⵜⴰⴳⵔⴰⵖⵍⴰⵏⵜ, ⵜⴻⵙⵙⴰⵡⴻⴹ ⴰⴷ ⵜⵄⴻⴷⴷⵉ ⵖⴻⵔ ⵜⴻⵍⵖⵓⵖⴰ ⵏ ⵜⴻⴼⵔⵉⵇⵜ ⵢⴻⵔⵏⴰ ⵓⵍⴰ ⴷ ⵏⴻⵜⵜⴰⵜ ⵜⴻⴹⵎⴻⵄ ⴰⴷ ⵜⵄⴻⴷⴷⵉ ⵖⴻⵔ ⵡⵓⵔⴰⵔⴻⵏ ⵓⵍⵉⵎⵒⵉⵢⴻⵏ ⵙ ⵜⴻⵖⵍⴰⵎⵜ-ⵏⵏⴻⵙ ⵜⴰⵎⴰⵢⵏⵓⵜ. ⵜⵉⵎⴰⵚⵔⵉⵢⵉⵏ ⵙⵡⴻⵊⴷⴻⵏⵜ ⵉⵎⴰⵏ-ⵏⵙⴻⵏⵜ ⴷⴻⴳ ⵙⵍⵓⵠⵉⵏⵢⴰ ⴷⴻⴼⴼⵉⵔ ⵎⴰ ⴽⴽⴰⵏⵜ ⴰⵏⵏⴰⵏ (ⵜⴰⵔⴰⴱⴱⵓⵚ) ⵏ 2 ⵏ ⵡⴰⵢⵢⵓⵔⴻⵏ ⴷⴻⴳ ⵍⵇⴰⵀⵉⵔⴰ.

ⵜⴰⵖⵍⴰⵎⵜ ⵏ ⴽⴰⵎⵔⵓⵏ ⴷ ⵢⵉⵡⴻⵜ ⵙⴻⴳ ⵜⵓⵥⵡⵉⵔⵉⵏ ⴰⵢ ⵢⴻⵙⵙⴰⵔⴰⵎⴻⵏ ⴰⴷ ⵔⴻⴱⵃⴻⵏⵜ. ⵜⵉⴽⴰⵎⵔⵓⵏⵉⵢⵉⵏ ⵔⴻⴱⵃⴻⵏⵜ-ⴷ ⵜⴰⵣⴰⵍⵖⵉ ⵏ ⵓⴱⵕⵓⵏⵣ ⴷⴻⴳ ⵜⴻⵍⵖⵓⵖⴰ ⵏ ⵜⴻⴼⵔⵉⵇⵜ ⵏ ⵢⵉⵖⵍⴰⵏⴻⵏ ⵏ 2015, ⴰⵎ ⵡⴰⴽⴽⴻⵏ ⴰⵢ ⴷ-ⵔⴻⴱⵃⴻⵏⵜ ⵜⴰⵣⴰⵍⵖⵉ ⵏ ⵓⵥⵔⴻⴼ (ⴼⵉⴹⴹⴰ) ⴷⴻⴳ ⵡⵓⵔⴰⵔⴻⵏ ⵉⴼⵔⵉⵇⵉⵢⴻⵏ ⵏ 2015 ⴷⴻⴳ ⴽⵓⵏⴳⵓ.

ⵎⴰ ⴷ ⵜⵓⵏⴻⵙ ⵍⴰ ⵜⴻⵙⵙⴰⵔⴰⵎ ⴰⴷ ⴷ-ⵜⴻⴳ ⵜⴰⴽⵓⵏⵜ (ⵎⵓⴼⴰⴵⴰ’ⴰ) ⵜⵉⴽⴽⴻⵍⵜ-ⴰ, ⴰⴽⴽⴻⵏ ⴰⵢ ⵜⴳⴰ ⴷⴻⴳ 2014, ⴰⵙⵎⵉ ⴰⵢ ⵜⴻⵙⵙⴰⵡⴻⴹ ⴰⴷ ⵜⴻⵔⵏⵓ ⵜⴰⵖⵍⴰⵎⵜ ⵜⴰⴽⵉⵏⵉⵜ ⴷⴻⴳ ⴽⴻⵏⵢⴰ ⵙ ⵜⵉⵎⵎⴰⴷ-ⵏⵏⴻⵙ.

ⴷⴻⴳ ⵜⴳⴰⵔⴰ, ⴱⵧⵜⵙⵡⴰⵏⴰ ⴷ ⵓⴳⴰⵏⴷⴰ ⵙⵙⴰⵔⴰⵎⴻⵏⵜ ⴰⴷ ⴷ-ⵙⵙⴻⴽⵏⴻⵏⵜ, ⵙ ⵓⵜⵜⴻⴽⴽⵉ-ⵏⵙⴻⵏⵜ, ⴷ ⴰⴽⴽⴻⵏ ⴰⵜⴻⵏⵜⵉ ⴳⴰⵏⵜ ⵉⵙⵓⵔⵉⴼⴻⵏ ⵖⴻⵔ ⵙⴷⴰⵜ ⴷⴻⴳ ⵢⵉⵙⴻⴳⴳⴰⵙⴻⵏ-ⴰ ⵉⵏⴻⴳⴳⵓⵔⴰ.