Asebter amenzawi
Rusya ad tɛawen Ɛiraq deg yimenɣi mgal Daɛec
BEɣDAD – Twekked-d Rusya d akken ad tɛawen Ɛiraq deg yimenɣi-nnes mgal tegrawt tarebrabt ay isemman i yiman-nnes « Awanak Islaman » (Daɛec). I usmekti, tagrawt-a tarebrabt tessaweḍ ad teḍḍef timnaḍin d timeqranin seg Ɛiraq.
Deg terzi-nnes ɣef Beɣdad, yessawel unmazul n uneɣlaf amenzu arusi, Dmitri Rogozin, ass n lexmis, d yimḍebbren unnigen n Ɛiraq, yerna gan amtawa (ittifaq) i usseǧhed n wassaɣen ucriken deg yinurar yemgerraden.
« Musku tezmer ad d-tili i lmend n yimḍebbren iɛiraqiyen deg yimenɣi mgal rrebrab s umbaddel n wumlan (istixbarat), assileɣ (takwin) n yiɣallen n tɣellist d tukci n ttawil aserdasan », ɣef wakken ay d-yenna Mass Rogozin deg yiwen n usarag n tɣemsa ucrik ay iga d uneɣlaf aɛiraqi n tɣawsiiwn n uzɣar, Ibrahim al-Jaafari.
Yenna-d daɣ d akken Musku ad d-tɛawen Ɛiraq lemmer « anabaḍ aɛiraqi ad d-yessuter aya s wudem unṣib ».
Rozogin yerza ɣef Ɛiraq d yiwet n tmagla (wafd) n wazal n 100 n yimḍebbren d yimazzayen (xubara’) idamsanen, iserdasanen d yidrimanen irusiyen, yerna yenna-d d akken Rusya d Ɛiraq msefhament ad sǧehdent amɛawen deg yinurar n umesni, adawi d temsafga taɣarimt.
Seg yidis-nnes, yenna-d uneɣlaf aɛiraqi n tɣawsiwin n uzɣar d akken amtawa-a ay d-yellan d Rusya yerza daɣ apitṛul, trisiti, aman d temguri (ṣinaɛa).
Mass Rogozin yewweḍ ɣer Beɣdad ass n laṛebɛa deg terzi n sin n wussan, yerna yemlal daɣ d uselway aɛiraqi Fuad Masoum d uselway n umni (barlaman) Salim al-Jubouri.
