ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

2015 ⴷ ⴰⵙⴻⴳⴳⴰⵙ ⴰⵡⴻⵄⵕⴰⵏ ⵖⴻⴼ ⵜⴷⴰⵎⵙⴰ ⵜⴰⴼⴰⵍⴻⵙⵟⵉⵏⵉⵜ

ⵍⵇⵓⴷⵙ ⵢⴻⵜⵜⵡⴰⵟⵟⴼⴻⵏ – ⵢⴻⵏⵏⴰ-ⴷ ⵓⵙⴻⵏⴷⵓⵇ ⵏ ⵜⴻⴷⵔⵉⵎⵜ ⴰⴳⵔⴰⵖⵍⴰⵏ, ⴰⵙⵙ ⵏ ⵍⴻⵅⵎⵉⵙ, ⴷ ⴰⴽⴽⴻⵏ ⴰⵙⴻⴳⴳⴰⵙ ⵏ 2015 « ⴰⵡⴻⵄⵕⴰⵏ » ⵖⴻⴼ ⵜⴷⴰⵎⵙⴰ ⵜⴰⴼⴰⵍⴻⵙⵟⵉⵏⵉⵜ, ⴷⴻⴳ ⵡⴰⴽⵓⴷ ⴰⵢⴷⴻⴳ ⴰⵏⵏⴻⵔⵏⵉ ⵏ ⵜⴷⴰⵎⵙⴰ-ⴰ ⵢⴻⵡⵡⴻⴹ ⴽⴰⵏ ⵖⴻⵔ 2,8%.

ⴷⴻⴳ ⵢⵉⵡⴻⵏ ⵏ ⵓⵍⵖⵓ (ⴱⴰⵢⴰⵏ) ⴰⵢ ⴷ-ⵢⴻⴼⴼⵖⴻⵏ ⴷⴻⴼⴼⵉⵔ ⵜⴻⵔⵣⵉ ⵏ ⴷⴷⵓⵕⵜ ⴰⵢ ⴷ-ⵢⴻⵍⵍⴰⵏ ⵖⴻⴼ ⵓⴳⴻⵎⵎⴰⴹ ⵓⵜⵔⵉⵎ, ⵢⴻⵏⵏⴰ-ⴷ ⵓⵙⴻⵏⴷⵓⵇ ⵏ ⵜⴻⴷⵔⵉⵎⵜ ⴰⴳⵔⴰⵖⵍⴰⵏ ⴷ ⴰⴽⴽⴻⵏ 2015 ⵢⴻⵍⵍⴰ-ⴷ « ⴰⵙⴻⴳⴳⴰⵙ ⴰⵡⴻⵄⵕⴰⵏ ⵏⵉⴹⴻⵏ ⵉ ⵜⴷⴰⵎⵙⴰ ⵜⴰⴼⴰⵍⴻⵙⵟⵉⵏⵉⵜ », ⵢⴻⵔⵏⴰ ⵢⴻⴱⴷⴻⵔ-ⴷ ⴷ ⴰⴽⴽⴻⵏ ⴳⴰⵔ ⵙⵙⴻⴱⴱⴰⵜ ⵏ ⵓⵏⵏⴻⵔⵏⵉ-ⴰ ⵓⴹⵄⵉⴼ ⴷ ⵍⴻⵅⵚⴰⵚ ⵏ ⵓⵙⵙⴻⴼⵜⵉ ⴷ ⵓⵏⵇⴰⵙ ⵏ ⵢⵉⴷⵔⵉⵎⴻⵏ ⴰⵢ ⵍⴰ ⴷ-ⵢⴻⵜⵜⵡⴰⵙⴻⴷⴷⴰⵇⴻⵏ ⵙⴻⴳ ⵓⵣⵖⴰⵔ.

ⴷⴻⴳ ⵖⴻⵣⵣⴰ, ⵓⵍⴰ ⵎⴰ ⵢⴻⵍⵍⴰ-ⴷ ⵓⵄⴰⵡⴻⴷ ⵏ ⵍⴻⴱⵏⵉ ⵏ ⴽⵔⴰ ⵙⴻⴳ ⵢⵉⵎⵓⴽⴰⵏ ⴰⵢ ⵜⴻⵔⵥⴰ ⵉⵙⵕⴰⵢⵉⵍ ⴷⴻⴳ ⵓⵏⴻⴱⴷⵓ ⵏ 2014 ⵉ ⵍⵎⴻⵏⴷ ⵏ ⵓⵙⴷⵓⵇⵇⴻⵙ ⵏ ⵜⴷⴰⵎⵙⴰ, ⵜⴻⵍⵍⴰ-ⴷ « ⵜⴰⵥⴻⵢⵜ ⴷⴻⴳ ⵓⵙⵙⵉⵡⴻⴹ ⵏ ⵍⴻⵎⵄⴰⵡⵏⴰ », ⵉⵙⵕⴰⵢⵉⵍ ⵜⴻⵃⵕⴻⵙ ⴰⴵⴰⵡ ⵏ ⵜⵏⴻⴳⵡⴰ (ⵎⴰⵡⴰⴷⴷ) ⵏ ⵍⴻⴱⵏⵉ ⵢⴻⵔⵏⴰ ⵜⴰⴳⵏⵉⵜ ⵏ ⵢⵉⵎⴻⵣⴷⴰⵖⴻⵏ ⵏ Ɣⴻⵣⵣⴰ ⵜⴻⵡⵡⴻⴹ ⵖⴻⵔ ⵜⵡⴰⵖⵉⵜ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵙⴻⵏⴷⵓⵇ ⵏ ⵜⴻⴷⵔⵉⵎⵜ ⴰⴳⵔⴰⵖⵍⴰⵏ.

ⴷⴻⴳ ⵎⴰⵢⵓ ⵏ 2015, ⵜⴰⴱⴰⵏⴽⴰ ⵜⴰⵎⴰⴹⵍⴰⵏⵜ ⵜⵄⴻⵢⵢⴻⵏ-ⴷ ⵢⴰⴳⵉ ⵖⴻⴼ « ⵜⴻⵣⵖⵉⵏⵜ (ⴰⵣⵎⴰ) ⵜⴰⴷⵔⵉⵎⴰⵏⵜ » ⴰⵢⴷⴻⴳ ⵜⴻⵍⵍⴰ ⵜⴻⵙⴼⵉⴼⵜ ⵏ Ɣⴻⵣⵣⴰ ⵢⴻⵍⵍⴰⵏ ⴷⴷⴰⵡ ⵜⴰⵔⴳⵓⵍⵜ ⵜⵉⵙⵕⴰⵢⵉⵍⵉⵜ ⵙⴻⴳ 2007. ⴰⵕⴰⴱⵓⵍ-ⴰ ⵢⴻⵏⵏⴰ-ⴷ ⴷ ⴰⴽⴽⴻⵏ ⵢⴻⵙⵙⴻⴼⴽ ⴰⴷ ⵢⵉⵍⵉ ⵓⵏⴰⴱⴰⴹ (ⵃⵓⴽⵓⵎⴰ) ⴰⴼⴰⵍⴻⵙⵟⵉⵏⵉ ⵢⴻⴷⴷⵓⴽⴽⵍⴻⵏ ⵉ ⵍⵎⴻⵏⴷ ⵏ ⵓⵄⴰⵡⴻⴷ ⵏ ⵍⴻⴱⵏⵉ ⵏ ⵡⴰⴽⴰⵍ ⵏ Ɣⴻⵣⵣⴰ, ⴰⵎ ⵡⴰⴽⴽⴻⵏ ⴰⵢ ⴷ-ⵉⴳⴻⵔ ⵜⵉⵖⵔⵉ ⵉ ⵜⵓⴽⴽⵙⴰ ⵏ ⵜⴻⵔⴳⵓⵍⵜ ⴰⴽⴽⴻⵏ ⴰⴷ ⵜⴻⵣⵎⴻⵔ ⴰⴷ ⵜⴰⴷⴻⴼ ⵙⵙⴻⵍⵄⴰ ⴰⵢ ⵜⴻⵃⵡⴰⴵ ⵜⴷⴰⵎⵙⴰ ⵏ Ɣⴻⵣⵣⴰ ⴰⴽⴽⴻⵏ ⴰⴷ ⵜⵜ-ⵉⴷ-ⵜⵓⵖⴰⵍ ⵜⵎⴻⴷⴷⵓⵔⵜ.

ⴰⴼⵎⵉⴹ ⵏ ⵜⵔⴻⴱⴱⴰⵡⵜ (ⴱⴰⵟⴰⵍⴰ) ⵎⴰⵣⴰⵍ-ⵉⵜ ⴷⴰⵖ ⵄⵍⴰⵢ ⴷⴻⴳ ⵓⴳⴻⵎⵎⴰⴹ ⵓⵜⵔⵉⵎ, ⴰⵎ ⵡⴰⴽⴽⴻⵏ ⴰⵢ ⵄⵍⴰⵢ ⵓⴳⴰⵔ ⴷⴻⴳ Ɣⴻⵣⵣⴰ ⴰⵏⴷⴰ ⵙⵉⵏ ⵏ ⵢⵉⵎⵓⵔⴻⵏ ⵖⴻⴼ 3 ⵙⴻⴳ ⵢⵉⵍⴻⵎⵥⵉⵢⴻⵏ ⵓⵔ ⵙⵄⵉⵏ ⴰⵔⴰ ⴰⵅⴻⴷⴷⵉⵎ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵙⴻⵏⴷⵓⵇ ⴰⴳⵔⴰⵖⵍⴰⵏ ⵏ ⵜⴻⴷⵔⵉⵎⵜ.

ⵙⴷⴰⵜ ⵜⴻⴳⵏⵉⵜ ⵜⴰⵙⴻⵔⵜⴰⵏⵜ ⵓⵔ ⵢⴻⴹⵎⵉⵏⴻⵏ ⴰⵔⴰ ⴰⴷ ⵜⴻⵇⵇⵉⵎ ⵜⴻⵔⴽⴻⴷ ⴷ ⵓⴽⴻⵎⵎⴻⵍ ⵏ ⵓⵃⵕⴰⵙ ⵉⵙⵕⴰⵢⵉⵍⵉ, ⵢⴻⵏⵏⴰ-ⴷ ⵓⵙⴻⵏⴷⵓⵇ ⵏ ⵜⴻⴷⵔⵉⵎⵜ ⴰⴳⵔⴰⵖⵍⴰⵏ ⴷ ⴰⴽⴽⴻⵏ ⴰⵏⵏⴻⵔⵏⵉ ⴰⴷⴰⵎⵙⴰⵏ ⵏ ⴼⴰⵍⴻⵙⵟⵉⵏ ⵉ 2016 ⵢⴻⵣⵎⴻⵔ ⴰⴷ ⵢⴰⵡⴻⴹ ⴽⴰⵏ ⵖⴻⵔ 3,3%.