Asebter amenzawi

Taqbuct n umaḍal n yimenɣi s ugestur n 2016: d Atunsi Ferjani ay irebḥen deg Lezzayer

LEZZAYER TAMANEɣT– D Atunsi Fares Ferjani (wis 8 deg usettef amaḍalan) d netta ay irebḥen asurif n Lezzayer Tamaneɣt n Teqbuct n Umaḍal n tkuba (ilemẓiyen, iqcicen) mi yerna Amaṣri Mokhtar Wafaey (wis 23 deg umaḍal) s ugmuḍ n 15 n tnaliyin ɣer 9, deg tneggarut ay d-yellan ass n ssebt deg tzeqqa n Harcha-Hacene n Lezzayer Tamaneɣt.

Tizalɣiwin n ubṛunz wwin-tent Yidzayriyen, Akram Bounabi (ay ixeṣren deg uzgen n tneggarut mgal Wafaey, 15-14) d Zin Eddine Heroui (ay ixeṣren mgal Ferjani s 15 ɣer 6).

Deg tezwara n tneggarut-nni n tkuba, Ferjani (yellan d alɣuɣ n Tefriqt n tkuba n yimeqranen) dindin kan iga agmuḍ yugaren win n Wafaey s 8 ɣer 5, sakkin, ikemmel yessaweḍ agmuḍ-nnes ɣer 15 ɣer 9.

Ma d Idzayriyen niḍen ay yettekkan deg usirif-a n Teqbuct n Umaḍal, Ugo Gamberoni d Hamza Kasdi, ttwafsen (uqṣu) deg tis 4 n tneggarut, deg wakud aydeg Acyl Maaziz d Anis Mairi ffɣen deg tis 8 n tneggarut.

Asleɣmay (mudarrib) n teɣlamt n Lezzayer n ugestur (tamezzugt [ixtiṣaṣ] n tkuba), Akubi Salazar Masso Guzman, yenna-d d akken taɣlamt-nnes la tetteddu ɣer sdat akken yelha yerna inaddalen-nnes sselhan aswir-nsen ɣef leḥsab n usurif yezrin n Teqbuct n Umaḍal.