Asebter amenzawi

Qsenṭina: assenqes n yidrimen n tɣiwanin ɣef lǧal n lqella n uṣerref-nsen

QSENṬINA – Yenna-d umaru amatu n twilayt n Qsenṭina, Abdelkhalek Sayouda, dakken ad sneqsen idrimen ay yettwafraqen ɣef tɣiwanin n Qsenṭina deg 2016 imi tiɣiwanin ur la ttṣerrifent ara akk ayen ay asent-yettwaferqen.

Deg yiwet n tseɣrut (taṣriḥ) ay d-iga i Tnegga n Yisalan n Lezzayer deffir yiwen n useqqamu n tɣiwant ay d-yellan ɣef ussukku n tiṭ ɣef wahilen n usnefli (tanmiya) n tɣiwanen n Ibn Zeyyad d Messaoud-Boudjeriou, yenna-d dakken aseggas-a, snat-a n tɣiwanin fkan-asent tajellabt n 36 n yimelyunen n yidinaṛen.

Tajellabt-a « ur izaden ara » tella-d d « tamqasit » i 12-nni n tɣiwanin n Qsenṭina ur yesqedcen ara idrimen ay asent-yettwaferqen.

Ugar n 80% seg yidrimen ay yettunefken i tɣiwanin n twilayt n Qsenṭina deg 2015 ur ttwasqedcen ara, ɣef wakken ay d-yenna Mass Sayouda, ay d-igren tiɣri i yimasayen (mas’ulin) ay terza temsalt akken ad ɛawden leḥsab yerna ad gen ayen ay la ttṛajun yimezdaɣen seg-sen.

Nnig waya, yenna-d umasay-a dakken ur yessefk ara ad qqimen yimelyunen n yidinaṛen deg lxeznat n tɣiwanin yerna ur ttwaṣerrafen ara i usnefli ɣef lǧal n « tsekkirin tideblanin » (iǧra’at idariyya), yerna iwekked-d dakken seg-a d asawen, tadbelt ur tettɛawad ara ad teɛdeṛ tiɣiwanin ur ixeddmen ara kra izaden s yidrimen ay asent-yettunefken.