Asebter amenzawi

Tebda Isṛayil tbennu 1.800 n yixxamen deg Ugemmaḍ Utrim

LQUDS yettwaṭṭfen– Bdan yiduba (suluṭat) n tuḍḍfa tisṛayilit bennun 1.800 n yixxamen deg Ugemmaḍ Utrim i yimharsen (mustawṭinin) udayen, ɣef wakken ay d-tenna tuddsa n « Peace Now ».

ɣef leḥsab n yiwen n uṛabul n tuddsa-a tarnabaḍt (ɣar ḥukumiyya), 69% seg yizudaɣ-a (ɛimarat) la ten-bennun deg tehras tudayin yettwaɛezlen d-yusan deg temnaḍin ayseg, lemmer d lebɣi, ad teffeɣ Isṛayil lemmer ad d-yili umtawa n talwit d Yifalesṭiniyen.

Seg yidis niḍen, ifuk uheyyi n yiwen n uɣawas (muxaṭṭaṭ) i lebni n 734 n yixxamen yernu ur yettɛeḍḍil ara ad yebdu lebni-nsen.

265 n yixxamen ay yettwebnan yagi i Wudayen deg yimukan umi ur tefki ara Isṛayil « ttesriḥ », yili, deg tidet, akk tihras (mustawṭanat) ay bnan Yisṛayiliyen deg Ugemmaḍ Utrim ffɣent i lqanun agraɣlan.

Ula ma anabaḍ (ḥukuma) yenna-d dakken yeḥbes lebni n tehras, lebni-a mazal-it yettkemmil deg unrar, ɣef wakken ay d-tenna tuddsa n Peace Now.

ɣef leḥsab n uṛabul n Peace Now, seg 2009 ar ass-a, Isṛayil tebna tinezduɣin i wazal n 40.000 n yimehrasen imaynuten, ula ma, lemmer d lebɣi, akal aydeg ay tettwebna tnezduɣt-a ad ffɣen seg-s Wudayen lemmer ad d-yili umtawa ad tt-id-yefrun ɣef uzekka n Falesṭin.

Nnig waya, Peace Now tezzem ɣef Isṛayil ay la d-yettgen iɛewwiqen deg unrar akken ur tferru ara temsalt tafalesṭinit s talwit.