Asebter amenzawi

Lezzayer terna Maṣer yernu terbeḥ Taqbuct n Umaḍal n Tkuba n 2016

LEZZAYER TAMANEɣT– Terna teɣlamt n Lezzayer n yirgazen (ilemẓiyen) n tkuba Maṣer yernu terbeḥ-d Taqbuct n Umaḍal n Tkuba (asurif n Lezzayer Tamaneɣt) s ugmuḍ n 45 n tnaliyin ɣer 38 deg tneggarut n teɣlamin ay d-yellan ass n lḥedd deg tzeqqa n Harcha-Hacene, deg Lezzayer Tamaneɣt.

S waya, ssawḍen 3 n yinaddalen idzayriyen, Zin Eddine Heroui, Ugo Daniel Gamberoni d Akram Bounabi, ad rebḥen timlilit-nsen taweɛṛant mgal teɣlamt tamaṣrit aydeg llan Moataz Medhat, Nouredine Nouredine d Mokhtar Wafaey.

Naqal d Maṣer ay d-yebdan urar s ugmuḍ yelhan, imi ay tewweḍ ɣer 17 n tnaliyin, maca ssawḍen Yidzayriyen ad d-refden iman-nsen yernu rebḥen amyager s 45 ɣer 38.

« Imenɣi yella-d yewɛeṛ seg tazwara ɣer tgara. Inaddalen-nneɣ yerna uswir-nsen yerna ssawḍen ad bedden deg wudem n Yimaṣriyen ay iɛerḍen ad d-uɣalen. S wugar n uxeddim d uslummes, ad ssiwḍen ad ddun ɣer sdat. Tthenniɣ akk taɣlamt », ɣef wakken ay aɣ-d-yenna Ukubi Salazar Guzman, asleɣmay (mudarrib) n teɣlamt tadzayrit.

Ma d Tunes, teḍḍef amkan wis 3 deg Teqbuct-a n teɣlamin deffir ma terna Luṛdun s 45 n tnaliyin ɣer 41.

Deg yimenɣi aterrasan (fardi), d Atunsi Fares Ferjani (d wis 8 deg umaḍal) ay irebḥen Taqbuct n Umaḍal mi yerna, deg tneggarut, Amaṣri Mokhtar Wafaey s 15 ɣer 9 n tnaliyin.