Asebter amenzawi

Beddu n tzikkent n « Tẓuri n udlis islaman » deg Tesdawit n Lezzayer 1ut

LEZZAYER TAMANEɣT – Tebda, ass n lḥedd, deg Tesdawit n Lezzayer 1ut, yiwet n tzikkent n tsukan (nusax) n yidlisen islamanen yuran s ufus umi semman « Taẓuri n udlis islaman », yerna tisukan-a wwin-tent-id seg tesdawit tahulandit n Leiden.

Tazikkent-a tga-tt tmahelt n tgelda n Tmuda n Wadda deg Lezzayer, yerna llant deg-s azal n 40 n tsukan n yidlisen n Leqran yettwareqmen d yidlisen ussnanen yettwacebbḥen s tugniwin tixtatasin neɣ s rrqumat.

Aḥric amezwaru n tzikkent-a d win umi semman « Takaligṛafit n Leqran », yerna llan deg-s yifettiten n yisebtar (ṣafaḥat) n tsukan n Leqran n lqern wis 8, ttwarun s tirawt takufit, d tsukan n Leqran n lqern wis 12 d 14 ay d-yusan seg Meṛṛuk d Lhend.

Llan daɣ yidlisen imidrusen (nadira) yeqqnen ɣer tussna deg tzikkent-a ay d-yellan deg temkarḍit (maktaba) n tesdawit, gar-asen tasuɣelt n udlis n yimɣan iɛerqen « Materia Medica » ay d-yettwarun, deg laṣel, deg lqern 1u. Tasuɣelt n udlis-a ɣer taɛṛabt tella-d deg lqern wis 10 yerna ala yiwet n tsukint ay d-yeggran seg-s.

Deg uḥric-a n tzikkent, llan yidlisen ussnanen niḍen am « Udlis n tarrayin tisnajyanin » n Abu El Qasim Al Zahrawi (lqern wis 15) neɣ « Tasnamurt » n Al Istakhti (lqern wis 12).