Asebter amenzawi

300.000 n yixeddamen ur yesɛin tacehṛit ay yettwammeṛkan ɣer ḍḍmana deg 2015

LEZZAYER TAMANEɣT – Azal n 300.000 n yixeddamen ur yesɛin tacehṛit ay yettwammeṛkan ɣer Usenduq Aɣelnaw n Tɣellist Tanmettit n Wid ur yesɛin tacehṛit (CASNOS) seg wasmi ay yettwassefɛel lqanun n ussmad n tedrimt n 2015, ɣef wakken ay d-yenna, ass n letniyen deg Lezzayer Tamaneɣt, Chawki Acheuk-Youcef, anemhal amatu n usenduq-a.

Ammeṛki n yixeddamen-a d ayen ad yeǧǧen Asenduq ad d-yejmeɛ 23 n yimelyaṛen n yidinaṛen, ɣef wakken ay aɣ-d-yenna, am wakken ay yerna dakken 100.000 n yixeddamen imaynuten ay yernan mmeṛkan-d armi d Fuṛaṛ n 2016.

Yerna-d umasay-a dakken tamhelt-a (ɛamaliyya) ad teǧǧ ixeddamen ur yesɛin tacehṛit ad xellṣen tabzart-nsen yerna ad sɛun ahil i uxelleṣ n tebzar ay ttwalasen, am wakken ad ttwaɛfun seg lexḍeyya d temqasit n uɛeḍḍel.

Yenna-d Mass Acheuk-Youcef dakken Asenduq-a yesɛa 1,6 d amelyun n yixeddamen war tacehṛit, gar-asen ugar n 750.000 n yixeddamen ur yettwalasen ara deg tebzart.

Igmaḍ-a llan-d daɣ s yiḥezziben ay yeddem usenduq, ladɣa timhal n usḥulfu n yixeddamen d uɛawed n ussuddes (tanḍim) n usenduq s ussebded n tmehliwin (mudiriyyat) deg twilayin, dɣa d aya ay yeǧǧan asenduq-a ad iqerreb ugar ɣer yixeddamen s urẓam n 131 n tnariyin timaynutin deg temnaḍin yemgerraden n tmurt.