Asebter amenzawi

Beddu n ussileɣ n yixeddamen i uṣeggem n yiɣrem n Waregla (tiddukla)

WAREGLA – Yebda ussileɣ (takwin) n yixeddamen deg ṣṣenɛa n uṣeggem n yiɣerman deg Waregla i lmend n uṣeggem n yiɣrem aqbur n Waregla, ɣef wakken ay aɣ-d-tenna tiddukla n yiɣrem-a.

Assileɣ-a yella-d d aḥric seg wahil n udhal (daɛm) n uḥuddu d uqeyyem n tgemmi (turat) adelsan n Ldzayer, ay d-yebda uɣlif n yidles s lemɛawna n Tdukli Tuṛufit, yerna ad ttekkin azal n 40 n yilemẓiyen deg ussileɣ-a aydeg ad d-lemden ttejṛiba taqburt n lebni d wamek ad d-xeddmen tinegwa n lebni tiqburin, ɣef wakken ay d-yenna uselway n tiddukla n yiɣrem aqbur n Waregla, Hassen Boughaba.

Assileɣ-a ad yeṭṭef 18 n wayyuren, yerna ad d-yili ɣef 3 n yiḥricen. Amezwaru d asḥulfu d uwehhi n yimezdaɣen n temnaḍt-a akken ad sseqdacen tinegwa n lebni ay d-yettwaxdamen din, yerna ad d-yili waya s temliliyin, tisaragen d tuffɣiwin ɣer unrar (6 n wayyuren), akken ad asen-d-sseknen i medden d akken aqeyyem d uṣeggem n tgemmi-a tadelsant yesɛa azal.

Aḥric wis sin d aheyyi n wahil n ussileɣ s umɛawen d yimawlan n ṣṣenɛa, gar-asen ula d isdawanen (ǧamiɛiyyin).

Ma d aḥric wis 3 d tizrawin (dirasat) i wid yettekkan deg ussileɣ d tuffɣa ɣer unrar akken ad sfeɛlen ayen ad d-lemden.

Assileɣ-a ad yeṭṭef, s ujemmal, 9 n wayyuren yerna ad d-yili s umɛawen d yiɣerbazen n ṣṣenɛa. Wid ad yettekkin deg-s ad d-awin agerdas n llsas deg lebni amensay (taqlidi) d tnegwa n lebni tidiganin (maḥaliyya), ɣef wakken ay d-yenna Mass Boughaba.