ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵢⵓⵖⴰⵍ-ⴷ ⵓⵙⵙⵉⵔⴻⵎ ⵖⴻⵔ ⵍⵉⴱⵢⴰ ⵙ ⵓⵀⴻⵢⵢⵉ ⵏ ⵓⵏⴰⴱⴰⴹ ⴰⵎⴰⵢⵏⵓ

ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ - ⵃⴰⵔⴻⵏ ⵎⴻⵍⵎⵉ ⴰⴷ ⵥⵔⴻⵏ ⵢⵉⵍⵉⴱⵉⵢⴻⵏ ⴰⵏⴰⴱⴰⴹ-ⵏⵙⴻⵏ (ⵃⵓⴽⵓⵎⴰ) ⴰⵎⴰⵢⵏⵓ ⵢⴻⴱⴷⴰ ⴰⵅⴻⴷⴷⵉⵎ ⴰⴽⴽⴻⵏ ⴰⴷ ⵢⴻⴼⵔⵓ ⵜⴰⵍⵓⴼⵜ ⴷⴻⴳ ⵜⵎⵓⵔⵜ-ⴰ ⴰⵢ ⵢⴻⴱⴹⴰⵏ ⴰⵢⴷⴻⴳ ⵜⵉⴳⵔⴰⵡⵉⵏ ⵜⵉⵔⴻⴱⵔⴰⴱⵉⵏ (ⵍⴰⴷⵖⴰ ⵜⴰⴳⵔⴰⵡⵜ ⴰⵢ ⵉⵙⴻⵎⵎⴰⵏ ⵉ ⵢⵉⵎⴰⵏ-ⵏⵏⴻⵙ « ⴰⵡⴰⵏⴰⴽ ⵉⵙⵍⴰⵎⴰ » [ⴷⴰⵄⴻⵛ]) ⴼⵔⵓⵔⵅⴻⵏⵜ. ⵙ ⵡⴰⵢⴰ, ⵢⴻⵍⵍⴰ ⵓⵙⵙⵉⵔⴻⵎ ⴰⴷ ⴷ-ⵜⵓⵖⴰⵍ ⵜⴰⵍⵡⵉⵜ ⴷⴻⴼⴼⵉⵔ 5 ⵏ ⵢⵉⵙⴻⴳⴳⴰⵙⴻⵏ ⵏ ⵛⵛⵡⴰⵍ ⴰⵢ ⴷ-ⵢⴻⵍⵍⴰⵏ ⵙⴻⴳ ⵡⴰⵙⵎⵉ ⴰⵢ ⵢⴻⵖⵍⵉ ⵢⵉⵎⴹⴻⴱⴱⴻⵔ ⵎⴰⴰⵎⴰⵔ ⴻⵍ-ⴳⵓⴻⴷⴷⴰⴼⵉ.

ⵙⴻⵎⵎⵓⵙ (5) ⵏ ⵢⵉⵙⴻⴳⴳⴰⵙⴻⵏ ⴰⵢⴰ ⵙⴻⴳ ⵡⴰⵙⵎⵉ ⴰⵢ ⵏⴻⴽⵔⴻⵏⵜ ⵜⵎⴻⵙⴱⴰⵏⵉⵢⵉⵏ ⴷⴻⴳ ⵍⵉⴱⵢⴰ ⵉ ⵓⵙⵙⴻⵖⵍⵉ ⵏ ⵓⴷⴰⴱⵓ, ⵙⴰⴽⴽⵉⵏ, ⴷⴻⴼⴼⵉⵔ ⴽⵔⴰ ⵏ ⵡⴰⵢⵢⵓⵔⴻⵏ, ⵢⴻⵖⵍⵉ ⴻⵍ-ⴳⵓⴻⴷⴷⴰⴼⵉ ⵙⴻⴳ ⵓⴷⴰⴱⵓ ⴷⴻⴼⴼⵉⵔ ⵎⴰ ⵢⴻⵃⴽⴻⵎ 42 ⵏ ⵢⵉⵙⴻⴳⴳⴰⵙⴻⵏ ⵜⴰⵎⵓⵔⵜ. ⴻⵍ-ⴳⵓⴻⴷⴷⴰⴼⵉ ⵏⵖⴰⵏ-ⵜ ⴰⵙⵙ ⵏ 20 ⵜⵓⴱⴻⵕ ⴷⴻⴳ ⵙⵉⵔⵜ, ⵎⴰⵛⴰ ⵙⴻⴳ ⵢⵉⵎⵉⵔ-ⵏⵏⵉ ⵖⴻⵔ ⵡⴰⵙⵙ-ⴰ, ⵜⴰⴳⵏⵉⵜ ⵜⴽⴻⵎⵎⴻⵍ ⵜⴻⵅⵚⴻⵔ ⴷⴻⴳ ⵍⵉⴱⵢⴰ ⴰⵎⴰ ⵙⴻⴳ ⵢⵉⴷⵉⵙ ⴰⵙⴻⵔⵜⵉ, ⴰⵎⴰ ⵙⴻⴳ ⵡⵉⴷ ⵏ ⵜⵖⴻⵍⵍⵉⵙⵜ (ⴰⵎⵏ), ⵜⴰⴷⴰⵎⵙⴰ ⴷ ⵜⵎⴻⴷⴷⵓⵔⵜ ⵏ ⵎⴻⴷⴷⴻⵏ.

ⴰⵙⵙ-ⴰ, ⵍⵉⴱⵢⴰ ⵜⴻⴱⴹⴰ ⴷ ⵉⵃⵔⵉⵛⴻⵏ ⵢⴻⵔⵏⴰ ⵍⵍⴰⵏ ⴷⴻⴳ-ⵙ ⵙⵉⵏ ⵏ ⵢⵉⵏⴰⴱⴰⴹⴻⵏ ⵉⵅⵚⵉⵎⴻⵏ. ⴰⵎⴻⵣⵡⴰⵔⵓ ⴷ ⵡⵉⵏ ⵏ ⵟⵓⴱⵔⵓⵇ (ⴷⴻⴳ ⵓⴳⵎⵓⴹ [ⵛⴰⵔⵇ]) ⵢⴻⵔⵏⵓ ⴷ ⵡⵉⵏ ⴰⵢⵢⴻⵙ ⵢⴻⵙⵜⴻⵄⵕⴻⴼ ⵓⵎⵖⵉⵡⴰⵏ (ⵎⵓⴵⵜⴰⵎⴰⵄ) ⴰⴳⵔⴰⵖⵍⴰⵏ. ⵎⴰ ⴷ ⵡⵉⵙ ⵙⵉⵏ ⴷ ⵡⵉⵏ ⵏ ⵟⵔⴰⴱⵍⴻⵙ ⴰⵢ ⵜⵜⵃⵓⴷⴷⵓⵏⵜ ⵜⴻⵎⵍⵉⵛⵉⵏ ⵜⵉⵎⵙⴻⵍⵍⵃⵉⵏ.

ⵉⵎⵉⵔ-ⴰ, ⴰⵎⴰⴹⴰⵍ ⴰⴽⴽ ⴰⵜⴰⵏ ⵢⴻⵜⵜⵕⴰⵊⵓ ⴷⴻⴳ ⵓⵎⵏⵉ (ⴱⴰⵔⵍⴰⵎⴰⵏ) ⵏ ⵟⵓⴱⵔⵓⵇ ⴰⴽⴽⴻⵏ ⴰⴷ ⵢⴻⴷⵖⴻⵔ (ⵢⵓⵚⴰⵡⵡⵉⵜ) ⴰⴽⴽⴻⵏ ⴰⴷ ⵢⴻⵇⴱⴻⵍ ⴰⵏⴰⴱⴰⴹ ⵏ ⵜⴷⵓⴽⵍⵉ ⵜⴰⵖⴻⵍⵏⴰⵡⵜ ⴰⵢ ⴷ-ⵢⴻⴽⵛⴻⴼ ⵓⵙⴻⵇⵇⴰⵎⵓ ⴰⵙⴻⵍⵡⴰⵢⴰⵏ ⴰⵍⵉⴱⵉ ⴰⵙⵙ ⵏ ⵍⵃⴻⴷⴷ, ⴷⴻⴼⴼⵉⵔ ⵍⴻⵎⵛⴰⵡⵕⴰⵜ ⵖⴻⵣⵣⵉⴼⴻⵏ ⵢⴻⵔⵏⵓ ⵡⴻⵄⵕⴻⵏⵜ.

ⵙ ⵡⴰⵢⴰ, ⴰⵀⴻⵢⵢⵉ ⵏ ⵓⵏⴰⴱⴰⴹ-ⴰ ⴷ ⵜⴰⴳⵏⵉⵜ ⴰⵢ ⵢⴻⵙⵙⴻⴼⴽ ⴰⴷ ⵜⵜ-ⴼⴰⵕⵙⴻⵏ ⵢⵉⵍⵉⴱⵉⵢⴻⵏ ⴰⴽⴽⴻⵏ ⴰⴷ ⴷ-ⵙⵙⵓⴼⴼⵖⴻⵏ ⵜⴰⵎⵓⵔⵜ-ⵏⵙⴻⵏ ⵙⴻⴳ ⵓⵔⵡⴰⵢ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵔⵜⵉⵏ ⴽⵧⴱⵍⴻⵔ, ⴰⵎⴰⵣⵓⵏ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵉ ⵍⵉⴱⵢⴰ, ⴰⵢ ⵍⴰ ⵉⵅⴻⴷⴷⵎⴻⵏ ⴰⴽⴽⴻⵏ ⴰⴷ ⵢⴻⴼⵔⵓ ⵜⴰⵍⵓⴼⵜ ⵏ ⵜⵎⵓⵔⵜ-ⴰ ⵙ ⵍⴻⵎⵄⴰⵡⵏⴰ ⵏ ⵓⵎⵖⵉⵡⴰⵏ ⴰⴳⵔⴰⵖⵍⴰⵏ ⴷ ⵜⵎⵓⵔⴰ ⵜⵉⵏⴰⵔⴰⴳⵉⵏ (ⴵⴰⵔⴰ), ⴳⴰⵔ-ⴰⵙⴻⵏⵜ ⵍⴻⵣⵣⴰⵢⴻⵔ.

ⴰⴷⵖⴰⵔ (ⵜⴰⵚⵡⵉⵔ) ⵖⴻⴼ ⵓⵏⴰⴱⴰⴹ-ⴰ ⵢⴻⵜⵜⵡⴰⵡⴻⵅⵅⴻⵔ ⴰⵛⵃⴰⵍ ⴷ ⵜⵉⴽⴽⴻⵍⵜ, ⵉⵎⵉ ⵉⵡⴰⵎⵏⵉⵢⴻⵏ (ⴱⴰⵔⵍⴰⵎⴰⵏⵉⵢⵢⵉⵏ) ⵏ ⵟⵓⴱⵔⵓⵇ « ⴱⵖⴰⵏ ⴰⴷ ⵥⵔⴻⵏ ⴰⵀⵉⵍ ⵢⴻⵔⵏⴰ ⴰⴷ ⵙⵇⴻⵔⴷⵛⴻⵏ » ⵖⴻⴼ ⵢⵉⵏⴻⵖⵍⴰⴼⴻⵏ-ⵏⵏⵉ ⴰⵢ ⴷ-ⵢⴻⵜⵜⵡⴰⵙⵙⵓⵎⵔⴻⵏ ⵉ ⵓⵏⴰⴱⴰⴹ-ⴰ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵢⵉⵡⴻⵏ ⵏ ⵓⵡⴰⵎⵏⵉ, ⴽⵀⴰⵍⵉⴼⴰ ⴰⵍ-ⴷⴻⴳⵀⴰⵔⵉ.

ⵏⴰⵇⴰⵍ, ⴰⵎⵏⵉ ⵏ ⵟⵓⴱⵔⵓⵇ ⵢⴻⵙⵙⴻⴼⵔⴰ ⴰⴷ ⵢⴻⴷⵖⴻⵔ ⵖⴻⴼ ⵓⵏⴰⴱⴰⴹ-ⴰ ⴷⴷⵓⵕⵜ-ⴰ, ⵎⴰⵛⴰ ⵉⵎⵉⵔ-ⴰ ⵢⴻⵏⵏⴰ-ⴷ ⴷⴰⴽⴽⴻⵏ ⴰⴷⵖⴰⵔ-ⴰ ⵢⴻⵜⵜⵡⴰⵡⴻⵅⵅⴻⵔ ⵖⴻⵔ ⵡⴰⵙⵙ ⵏ ⵜⵜⵍⴰⵜⴰ.

ⴰⵏⴰⴱⴰⴹ-ⴰ ⴰⵎⴰⵢⵏⵓ ⴰⴷ ⵢⴻⵙⵄⵓ 18 ⵏ ⵢⵉⵏⴻⵖⵍⴰⴼⴻⵏ, ⴳⴰⵔ-ⴰⵙⴻⵏ 5 ⵏ ⵢⵉⵏⴻⵖⵍⴰⴼⴻⵏ ⵏ ⵓⵡⴰⵏⴰⴽ (ⴷⴰⵡⵍⴰ) ⴷ 3 ⵏ ⵜⵙⴻⴷⵏⴰⵏ ⵢⴻⵍⵍⴰⵏ ⴷ ⵉⴳⴻⵏⵙⴰⵙⴻⵏ (ⵎⵓⵎⴰⵜⵜⵉⵍⵉⵏ) ⵏ ⵡⴰⴽⴽ ⵜⵉⴳⵔⴰⵡⵉⵏ ⵜⵉⵙⴻⵔⵜⵉⵢⵉⵏ ⵏ ⵜⵎⵓⵔⵜ.

ⵎⴰ ⴷ ⴰⵙⴻⵇⵇⴰⵎⵓ ⴰⵙⴻⵍⵡⴰⵢⴰⵏ ⵍⵍⴰⵏ ⴷⴻⴳ-ⵙ 9 ⵏ ⵢⵉⵎⴰⵙⵍⴰⴹⴻⵏ (ⴰⵄⴹⴰ’) ⵙⴻⴳ ⵜⴻⴳⵔⴰⵡⵉⵏ ⵜⵉⵍⵉⴱⵉⵢⵉⵏ ⵢⴻⵎⵅⴰⵚⴰⵎⴻⵏ ⵢⴻⵔⵏⵓ ⴷ ⴼⴰⵢⴻⵣ ⴰⵍ-ⵙⴰⵔⵔⴰⵊ ⴰⵢ ⴷ ⴰⵙⴻⵍⵡⴰⵢ-ⵏⵏⴻⵙ. ⵎⵉ ⴰⴷ ⵉⵄⴻⴷⴷⵉ ⵓⵏⴰⴱⴰⴹ-ⴰ, ⴷ ⴰⵍ-ⵙⴰⵔⵔⴰⵊ ⴰⴷ ⵢⵓⵖⴰⵍⴻⵏ ⴷ ⴰⵏⴻⵖⵍⴰⴼ ⴰⵎⴻⵏⵣⵓ ⵏ ⵍⵉⴱⵢⴰ, ⵙ ⵓⵇⴰⴷⴻⵔ ⵏ ⵓⵎⵜⴰⵡⴰ (ⵉⵜⵜⵉⴼⴰⵇ) ⴰⵢ ⴷ-ⵢⴻⵍⵍⴰⵏ ⴳⴰⵔ ⵢⵉⵍⵉⴱⵉⵢⴻⵏ ⴰⵙⵙ ⵏ 17 ⴷⵓⵊⴻⵎⴱⴻⵕ 2015.