Asebter amenzawi
Yuɣal-d ussirem ɣer Libya s uheyyi n unabaḍ amaynu
LEZZAYER TAMANEɣT - Ḥaren melmi ad ẓren Yilibiyen anabaḍ-nsen (ḥukuma) amaynu yebda axeddim akken ad yefru taluft deg tmurt-a ay yebḍan aydeg tigrawin tirebrabin (ladɣa tagrawt ay isemman i yiman-nnes « Awanak Islama » [Daɛec]) frurxent. S waya, yella ussirem ad d-tuɣal talwit deffir 5 n yiseggasen n ccwal ay d-yellan seg wasmi ay yeɣli yimḍebber Maamar El-Gueddafi.
Semmus (5) n yiseggasen aya seg wasmi ay nekrent tmesbaniyin deg Libya i usseɣli n udabu, sakkin, deffir kra n wayyuren, yeɣli El-Gueddafi seg udabu deffir ma yeḥkem 42 n yiseggasen tamurt. El-Gueddafi nɣan-t ass n 20 Tubeṛ deg Sirt, maca seg yimir-nni ɣer wass-a, tagnit tkemmel texṣer deg Libya ama seg yidis aserti, ama seg wid n tɣellist (amn), tadamsa d tmeddurt n medden.
Ass-a, Libya tebḍa d iḥricen yerna llan deg-s sin n yinabaḍen ixṣimen. Amezwaru d win n Ṭubruq (deg ugmuḍ [carq]) yernu d win ayyes yesteɛṛef umɣiwan (muǧtamaɛ) agraɣlan. Ma d wis sin d win n Ṭrables ay ttḥuddunt temlicin timsellḥin.
Imir-a, amaḍal akk atan yettṛaju deg umni (barlaman) n Ṭubruq akken ad yedɣer (yuṣawwit) akken ad yeqbel anabaḍ n tdukli taɣelnawt ay d-yekcef Useqqamu Aselwayan Alibi ass n lḥedd, deffir lemcawṛat ɣezzifen yernu weɛṛent.
S waya, aheyyi n unabaḍ-a d tagnit ay yessefk ad tt-faṛsen Yilibiyen akken ad d-ssuffɣen tamurt-nsen seg urway, ɣef wakken ay d-yenna Martin Kobler, amazun n Yiɣlanen Yeddukklen i Libya, ay la ixeddmen akken ad yefru taluft n tmurt-a s lemɛawna n umɣiwan agraɣlan d tmura tinaragin (ǧara), gar-asent Lezzayer.
Adɣar (taṣwir) ɣef unabaḍ-a yettwawexxer acḥal d tikkelt, imi iwamniyen (barlamaniyyin) n Ṭubruq « bɣan ad ẓren ahil yerna ad sqerdcen » ɣef yineɣlafen-nni ay d-yettwassumren i unabaḍ-a, ɣef wakken ay d-yenna yiwen n uwamni, Khalifa al-Deghari.
Naqal, amni n Ṭubruq yessefra ad yedɣer ɣef unabaḍ-a dduṛt-a, maca imir-a yenna-d dakken adɣar-a yettwawexxer ɣer wass n ttlata.
Anabaḍ-a amaynu ad yesɛu 18 n yineɣlafen, gar-asen 5 n yineɣlafen n uwanak (dawla) d 3 n tsednan yellan d igensasen (mumattilin) n wakk tigrawin tisertiyin n tmurt.
Ma d Aseqqamu Aselwayan llan deg-s 9 n yimaslaḍen (aɛḍa’) seg tegrawin tilibiyin yemxaṣamen yernu d Fayez al-Sarraj ay d aselway-nnes. Mi ad iɛeddi unabaḍ-a, d al-Sarraj ad yuɣalen d aneɣlaf amenzu n Libya, s uqader n umtawa (ittifaq) ay d-yellan gar Yilibiyen ass n 17 Dujembeṛ 2015.
