Asebter amenzawi
Tamettant n Haikel: Maṣer d umaḍal aɛṛab sṛuḥen argaz d ameqran deg tɣemsa (Bouteflika)
LezZAYER TAMANEƔT– Yuzen, ass n laṛebɛa, uselway n tegduda, Abdelaziz Bouteflika, yiwet n tebṛat n uɛezzi i umtil-nnes amaṣri Abdelfettah al-Sissi, i lmend n wawwaḍ ɣer leɛfu n Ṛebbi n uneɣmas d umaru amaṣri Mohamed Hassanine Haikel, yerna yenna-d uselway n tegduda dakken s ṛṛwaḥ n Haikel, Maṣer d umaḍal aɛṛab sṛuḥen argaz yellan d « taqacuct deg tɣemsa ». « S leḥzen d ameqran ay iḥuzan ul-inu s telqey ay iyi-d-yewweḍ yisali n tmettant n umaru d uneɣmas ameqran Mohamed Hassanine Haikel. Deg teswiɛt-a n lqerḥ, ttɛezziɣ-k s kečč, s warraw n uɣref amaṣri, s yisem n uɣref d unabaḍ (ḥukuma) n Ldzayer d yisem-inu udmawan, yerna deɛɛuɣ Bab n Lqedra ad as-yerẓeq ṛṛeḥma yerna ad t-yemmager deg lǧennet-nnes tawewɛant », ɣef wakken ay d-yenna uselway Bouteflika deg yizen-nnes (risala). « Maṣer d uɣlan aɛṛab sṛuḥen argaz yellan d taqacuct deg tmussni d tɣemsa, d win ay yefkan tameddurt-nnes i tmurt-nnes d uɣlan aɛṛab. Argaz-a yettmeyyiz timsal yerna yekkat seg wul ɣef tlufa tuzrifin (carɛiyya) deg umaḍal. Hassanine Haikel yura-d aṭas n yidlisen yesnernan timmeṛkantit n temkarḍiyin (makatib) taɛṛabin d umaḍal yerna yella d tala s wazal-nnes deg tmussni i tsuta ay d-yetteddun », ɣef wakken ay d-yenna uselway n tegduda. « Ttarraɣ tajmilt i wazalen-nnes iheggaren (nabila), imenzayen-nnes d ttejṛiba-nnes tasertant, yerna ttqadareɣ isem-nnes ad d-yeqqimen yenqec i lebda deg ccfawat-nneɣ ɣef wakk ayen ay d-yewwi deg uxemmem asertan d uxebber deg umaḍal aɛṛab », ɣef wakken ay d-yenna uselway Bouteflika. « Ldzayer teḥzen ɣef ṛṛwaḥ n urgaz-a ameqran yellan d ameddakel n uselway ameṛḥum Jamal Abdennaser, yerna mazal tecfa ɣef ubdad-nnes ɣer yidis n yimenɣiyen uzrifen deg Tefriqt d umaḍal, d ubdad-nnes aruwtil (ɣayr macruṭ) yezgan ɣer yidis n Tegrawla Tadzayrit turbiḥt d yizerfan n uɣref adzayri », ɣef wakken ay d-yenna uselway n tegduda. « Ttarraɣ tajmilt i urgaz-a yellan d taqacuct yerna ttɛezziɣ seg wul tawacult-nnes, wid ay as-yettilin d Maṣer akken ma tella, tin ay d-yurwen, s teɣzef n umezruy-nnes, imdanen ay d-yufraren, wid yellan d ul n uɣlan aɛṛab », ɣef wakken ay d-yerna uselway Bouteflika. « Ṛṛwaḥ n urgaz-a yesseḥzen-iyi s telqey, am wakken ay yesseḥzen aggagen (mutaqqafin) d yineɣmasen n umaḍal aɛṛab », ɣef wakken ay d-iwekked uselway n tegduda, ay yedɛan Bab n Lqedran ad yeṛḥem win yemmuten yerna ad d-yazen ṣṣber i twacult-nnes d yimeddukal-nnes ama deg Maṣer, ama deg umaḍal aɛṛab neɣ deg umaḍal akken ma yella.
