ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵓⵍⴰⵛ ⵎⴻⵃⵢⴰⴼ ⴷⴻⴳ ⵓⵙⴻⴽⴽⴻⵔ ⵏ ⵢⵉⴳⴻⵔⴷⴰⵏ ⴷⴻⴳ ⵍⴻⵣⵣⴰⵢⴻⵔ (ⵎⴻⵙⵍⴻⵎ)
ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⵜⴻⵏⵏⴰ-ⴷ ⵜⵏⴻⵖⵍⴰⴼⵜ ⵏ ⵜⴻⵎⵙⴻⵜⵍⴻⵍⵜ (ⵜⴰⴹⴰⵎⵓⵏ) ⵜⴰⵖⴻⵍⵏⴰⵡⵜ, ⵎⵧⵓⵏⵉⴰ ⵎⴻⵙⵍⴻⵎ, ⴰⵙⵙ ⵏ ⵍⴰⵕⴻⴱⵄⴰ, ⴷ ⴰⴽⴽⴻⵏ « ⵓⵍⴰⵛ ⴰⴽⴽ ⵉⵃⴻⵣⵣⵉⴱⴻⵏ ⵏ ⵎⴻⵃⵢⴰⴼ » ⴷⴻⴳ ⵓⵙⴻⴽⴽⴻⵔ (ⵎⵓⵄⴰⵎⴰⵍⴰ) ⵏ ⵢⵉⴳⴻⵔⴷⴰⵏ ⴷⴻⴳ ⵍⴻⵣⵣⴰⵢⴻⵔ.
ⵜⴰⵏⴻⵖⵍⴰⴼⵜ, ⴰⵢ ⴷ-ⵢⴻⵏⵏⴰⵏ ⴰⵢⴰ ⴷⴻⴳ ⵢⵉⵡⴻⵏ ⵏ ⵓⵎⵢⴰⴳⴻⵔ ⵉ ⵓⵇⴻⴷⴷⴻⵎ ⵏ ⵢⵉⴳⵎⴰⴹ ⵏ ⵜⵙⴻⵙⵜⴰⵏⵜ (ⵜⴰⵃⵇⵉⵇ) ⵖⴻⴼ ⵢⵉⴳⴻⵔⴷⴰⵏ ⵏ ⵢⵉⵎⵉⵏⵉⴳⴻⵏ ⴷ ⵡⴰⵔⵔⴰⵡ ⵏ ⵢⵉⵎⵉⵏⵉⴳⴻⵏ ⴰⵢ ⴷ-ⵢⵓⵙⴰⵏ ⵙⴻⴳ ⵜⵎⵓⵔⴰ ⵏ ⵓⵏⵥⵓⵍ ⵏ ⵓⵏⴻⵥⵔⵓⴼ, ⵜⵡⴻⴽⴽⴻⴷ-ⴷ ⴷ ⴰⴽⴽⴻⵏ ⵍⴻⵣⵣⴰⵢⴻⵔ ⵓⵔ ⵜⴻⵜⵜⴻⴳ ⴰⵔⴰ ⵎⴻⵃⵢⴰⴼ ⴳⴰⵔ ⵢⵉⴳⴻⵔⴷⴰⵏ ⵉⴷⵣⴰⵢⵔⵉⵢⴻⵏ ⴷ ⵢⵉⴳⴻⵔⴷⴰⵏ ⵉⴱⴻⵕⵕⴰⵏⵉⵢⴻⵏ.
ⵉ ⵍⵎⴻⵏⴷ ⵏ ⵡⴰⵢⴰ, ⵜⴻⵙⵎⴻⴽⵜⵉ-ⴷ ⴷ ⴰⴽⴽⴻⵏ ⵍⴻⵣⵣⴰⵢⴻⵔ ⵜⴻⵙⵄⴰ ⵍⴻⵇⵡⴰⵏⵉⵏ ⴰⵢ ⵢⴻⵜⵜⴰⴵⴵⴰⵏ « ⴰⴽⴽ ⵡⵉⴷ ⵢⴻⵍⵍⴰⵏ ⴷⴻⴳ ⵡⴰⴽⴰⵍ ⴰⴷⵣⴰⵢⵔⵉ ⴰⴷ ⴷ-ⵙⴼⴰⵢⴷⵉⵏ, ⴰⴽⴽⴻⵏ ⵉⵡⴰⵜⴰ, ⵙⴻⴳ ⵢⵉⵎⴻⵥⵍⴰ (ⵅⴰⴷⴰⵎⴰⵜ) ⴰⴷ ⵃⵡⵉⴵⴻⵏ ».
ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵉⵃⴻⵣⵣⵉⴱⴻⵏ ⵢⴻⵍⵍⴰⵏ ⵉ ⵍⴼⴰⵢⴷⴰ ⵏ ⵢⵉⴳⴻⵔⴷⴰⵏ ⴷⴻⴳ ⵍⴻⵣⵣⴰⵢⴻⵔ, ⵜⴻⵙⵎⴻⴽⵜⵉ-ⴷ ⵜⵏⴻⵖⵍⴰⴼⵜ ⴷ ⴰⴽⴽⴻⵏ ⴰⴽⴽ ⵉⴳⴻⵔⴷⴰⵏ ⵙⵄⴰⵏ ⴰⵣⵔⴻⴼ ⴰⴷ ⴰⴷⴼⴻⵏ ⵖⴻⵔ ⵓⵖⴻⵔⴱⴰⵣ ⴱⴰⵟⴻⵍ ⵢⴻⵔⵏⴰ ⴱⴻⵙⵙⵉⴼ ⴰⵔⵎⴰ ⴷ 16 ⵏ ⵢⵉⵙⴻⴳⴳⴰⵙⴻⵏ, ⴰⵎ ⵡⴰⴽⴽⴻⵏ ⴰⵢ ⵙⵄⴰⵏ ⴰⵣⵔⴻⴼ ⴰⴷ ⴳⴻⵏ ⴰⵙⵙⵉⵍⴻⵖ ⴰⵙⴰⴷⵓⵔⴰⵏ (ⵜⴰⴽⵡⵉⵏ ⵎⵉⵀⴰⵏⵉ) ⵙⴻⴳ 16 ⵏ ⵢⵉⵙⴻⴳⴳⴰⵙⴻⵏ ⴷ ⴰⵙⴰⵡⴻⵏ.
ⵏⵏⵉⴳ ⵡⴰⵢⴰ, ⵜⴻⵏⵏⴰ-ⴷ ⴷ ⴰⴽⴽⴻⵏ ⴰⵣⵔⴰⵡ (ⴷⵉⵔⴰⵙⴰ) ⵏ ⴱⴰⵟⴻⵍ ⵢⴻⵍⵍⴰ-ⴷ ⴷ « ⵉⵖⴻⵙ » ⵏ ⵜⵙⴻⵔⵜⵉⵜ ⵜⴰⵏⵎⴻⵜⵜⵉⵜ (ⵉⴵⵜⵉⵎⴰⵄⵉⵢⵢⴰ) ⴰⵢ ⵜⴻⴹⴼⴻⵔ ⵍⴻⵣⵣⴰⵢⴻⵔ ⵖⴻⵔ ⵢⵉⴷⵉⵙ ⵏ ⵜⵖⴰⵡⵙⵉⵡⵉⵏ ⵏⵉⴹⴻⵏ ⴰⵢ ⴷ-ⵜⴳⴰ ⵜⵎⵓⵔⵜ ⵉ ⵍⴼⴰⵢⴷⴰ ⵏ ⵓⵖⵔⴻⴼ ⴰⵎ ⵡⴰⵀⵉⵍⴻⵏ ⵏ ⵜⴳⴻⵣⵣⴰⵢⵜ, ⵜⵉⵃⴻⵎⵍⵉⵡⵉⵏ ⵏ ⵓⵙⵃⵓⵍⴼⵓ, ⴰⵎⵎⴰⵙⴻⵏ ⵏ ⵓⴷⴰⵡⵉ ⵢⴻⵎⵎⵓⵣⵣⴳⴻⵏ ⵉⵇⴻⵔⴱⴻⵏ ⵖⴻⵔ ⵢⵉⵎⴻⵣⴷⴰⵖⴻⵏ ⴷ ⵢⵉⵖⵙⵓⵔⴻⵏ ⵉⴷⴻⵍⵙⴰⵏⴻⵏ, ⴰⴷⴷⴰⵍⴰⵏⴻⵏ ⴷ ⵡⵉⴷ ⵏ ⵣⵣⵀⵓ.
