Asebter amenzawi

Qsenṭina 2015: Saber Ayeche, d anaẓur ameɛduṛ yettekksen ḍḍiq seg lxaṭer deg umezgun

QSENṬINA– Yessken-d Saber Ayeche, ass n laṛebɛa, s umunulug-nnes n « Aɛessas », deg Umezgun Amnaḍan n Qsenṭina, d akken ula ameɛduṛ ur yelli ara d amdan « iweḥlen » deg yiwen umkan, wanag yezmer ad yessewliwel akk amaḍal s ccɣel-nnes ifazen.

S umunulug n « Lɛessas », anaẓur Saber Ayeche yesseḍs-d imfeṛṛǧen ɣef kra n temsal n tmeddurt, yerna ula ma d ameɛduṛ ay yella, ur yufi ara akk aɛewwiq akken ad yeg ccɣel-nnes.

Azeffan-a (fannan kumidi) yelha-d, deg umunulug-nnes, s yiwet n temsalt yeqqnen ɣer tegnit-nnes n umeɛduṛ, yeglem-d (waṣafa) tameddurt n yal ass aydeg yella umeɛduṛ, yir tamuɣli n medden d tmuɣliwin tucciḍin ayyes ten-ttwalin « wid iṣeḥḥan », yerna ula ma tamsalt-a qerrḥet, maca yessaweḍ Ayeche ad d-yesseḍs yes-s agdud segmi ay yebda umunulug armi ay ifuk.

Ahanay (ɛarḍ) n Ayeche yella-d deg udlag (dikur) d aḥerfi aydeg tella tdabut n tnarit d ukersi. Yebda Ayeche amunulug-nnes s tuttra n wamek ay yezmer ad yuɣal umeɛduṛ d aɛessas deg kra n teṛmist.

Sdat ugdud yeṛwan taḍsa, yeḥka-d Ayeche, seg tnarit-nnes (maktab) amek « ay yexleɛ yiwen n umakar » mi yudef ɣer teṛmist-nni (carika) akken ad d-yakir, sakkin yufa aɛessas d ameɛduṛ, yerna ɣas akken, yugad, yerwel.

Yebder-d daɣ uzeffan tagnit rqiqen aydeg ddren yimeɛdaṛ d cwiṭ-nni n yidrimen n lemɛawna ay asen-ttakfen.

Deg umunulug-nnes yeččuṛen d attihi d uqeṣṣer, aydeg llant kra n tenqiḍin n teqseḥ, iwet-d uzeffan deg « wid iṣeḥḥan » ur yegguman ad ḥesben ameɛduṛ d amdan « n menwala », ay izemren ad iḥemmel, ad yekṛeh neɣ ad yerfu am wakk wiyaḍ.

S umunulug-nnes aydeg yerwi taqaɛet, yessken-d Ayeche amek imeɛdaṛ terra-ten tmara ad qqimen d « imattaren » yezgan ssuturen lemɛawna d yizefan, yerna yesseḍlem imasayen (mas’ulin) ay yerran « ass n umeɛduṛ » d ass n « ufulkluṛ » akken ad d-sluffẓen ayen « ay d-kesben » zuna yimeɛdaṛ, tili acemma ur izad.

Deffir umunulug-nni, yenna-d Saber Ayeche d akken ahanay n taḍsa yella-d d ttawil i « truẓi n yifergan d ussiweḍ n tebṛatin ».