Asebter amenzawi

Yessefk ad ssnen yimsulta amek ad asen-ddun i wid yuḍnen SIDA

LEZZAYER TAMANEɣT– Nnan-d kra n yimazzagen (muxtaṣṣin) n tdawsa ass n lexmis deg Lezzayer Tamaneɣt d akken imsulta (riǧal curṭa) yessefk ad ssnen amek ad ddun d yimuḍinen n SIDA mi ad ttgen lecɣal-nsen deg unrar, akken ur ten-id-ineṭṭeḍ ara waḍḍan-a.

Deg tgermant-nnes (mudaxal) i lmend n wass n usḥulfu ay tga Tɣellist (amn) n twilayt n Lezzayer s umɛawen d tiddukliwin n « El-Hayat » d « Aids-Algerie », i lmend n uḥezzeb ɣef SIDA deg temsulta, tenna-d tdukturt Asma Saad Djaballah d akken « imsulta yezmer ad ten-id-yenṭeḍ waḍḍan-a ɣef lǧal n uxeddim-nsen, dɣa ɣef waya ay yessefk ad d-yili usḥulfu ɣef waya ».

Dɣa tebder-d tignatin aydeg kra n yimsulta yenṭeḍ-iten-id waḍḍan-a deg umkan aydeg tella tejrimt neɣ mi ad ttgen ccɣel-nsen d wid yesseqdacen tihyufin.

Seg yidis-nnes, yenna-d Uduktur Abdelhakim Belamri d akken ameẓlu (maṣlaḥa) n tigawt tanmettit n Tmehla Tamatut n Tɣellist Taɣelnawt theyya-d ahil n ussileɣ (takwin) i yimsulta akken ad lemden amek ad asen-ddun i wid yuḍnen SIDA, yerna amur ameqran seg wahil-a yerza timliliyin n usḥulfu.

Dɣa yenna-d d akken imsulta simal la ttakin i yimihiten (axṭar) n taluft-a yerna mazal asḥulfu yettkemmil i lfayda n yixeddamen n temsulta.