Asebter amenzawi

Surya: la yettaẓ yigen ɣer tmaneɣt n Daɛec deg Raqqa

DIMECQ – Yessaweḍ yigen (ǧayc) asuri ad yeḍḍef, ass n ssebt, kra n yiḥricen seg ubrid yeqqnen tinebḍit (muqaṭaɛa) n Ḥalab ɣer tin n Raqqa ay yuɣalen d ul n tegrawt tarebrabt ay isemman i yiman-nnes Awanak Islaman (Daɛec) ɣef wakken ay d-tenna terga n tliẓri taɣelnawt tasurit.

Ssawḍen yiɣallen isuriyen ad ḍḍfen abrid ay yezrin ɣef al-Ma’amel d uzadur agenwan n Kweris, deg ugmuḍ (carq) n Ḥalab, ɣef wakken ay d-tenna terga-a.

Yuɣ lḥal, yenna-d yagi Usanay (marṣad) Asuri n Yizerfan n Umdan, azal n dduṛt aya, d akken igen asuri yella yessewjad iman-nnes akken ad yaẓ ɣer tnebḍit n Raqqa.

Asanay-a, ay la ixeddmen deg Tgelda Yeddukklen, yenna-d d akken igen asuri la yetteddu s tɣawla akken ad yeḍḍef abrid amazzal n uneẓruf yellan sdat temdint n Athraya, ay ibeɛden s kra kan n yikilumitren ɣef tnebḍit n Raqqa.

Tiddit ɣer Raqqa ad teǧǧ igen asuri ad iɛawed ad yeḍḍef, i tikkelt tamezwarut, tamdint-a seg wasmi ay teḍḍef tegrawt-a tarebrabt azadur agenwan n Tabaqa deg 2014, yellan naqal d amkan aneggaru ay as-d-yeqqimen i unabaḍ (ḥukuma) asuri deg temdint-a.