Asebter amenzawi

Tagermant taserdasant deg Libya yessefk ad teṛju assuter sɣur unabaḍ alibi (Mogherini)

PARIS– Tenna-d, ass n lḥedd, tneɣlaft n tɣawsiwin n uzɣar n Tdukli Tuṛufit, Federica Mogherini, dakken Uṛufiyen ur yessefk ara ad d-tili tgermant (tadaxxul) taserdasant deg tmurt-a arma yessuter-itt-id unabaḍ alibi uzrif i lmend n yimenɣi mgal tegrawt tarebrabt ay isemman i yiman-nnes « Awanak Islaman » (Daɛec).

« Aɣlab n Daɛec s tidet ur yezmir ad d-yili ala s ubrid n unabaḍ alibi uzrif ad d-yelhun s tɣellist-nnes (amn) i yiman-nnes », ɣef wakken ay d-tenna Massa Mogherini deg yiwet tdiwennit d uɣmis ayallas afṛensis n Le Journal du Dimanche.

« Deg Libya, d Ilibiyen ay yessefken ad qablen tuggza-a (tahdid) s timmad-nsen, ula ma aɣref alibi atan yefcel, yernu yessefk ad ifak urway-a », ɣef wakken ay d-terna.

« Acḥal n wayyuren aya seg wasmi ay nebded ɣer yidis n wussisen (maǧhudat) i ussebded n unabaḍ n umtawa aɣelnaw. Ussan ay d-yetteddun ad ilin s wazal-nsen, imi ad d-yili udɣar (taṣwit) n umni i uqbal n unabaḍ amaynu. Ma nebɣa ad ten-nɛawen, yessefk ad neg deg-sen laman, acku ifen-aɣ akken ay ssnen tamurt. D nitni ay yessefken ad d-ssutren lemɛawna i yimenɣi mgal Daɛec », ɣef wakken ay d-tenna.

Aneɣlaf amenzu alibi, Fayez al-Sarraj, yefka, ass n ssebt, i umni (barlaman) n Ṭubruq, ahil n uxeddim n unabaḍ-nnes amaynu akken ad deɣren fell-as yimazanen (nuwwab) ass n ttlata.

Terna-d Massa Mogherini dakken « Tuṛuft tewjed ad tɛawen (Libya) deg uheyyi n tsuda (mu’assasat), ladɣa iɣallen n temsulta (curṭa) d tɣellist, asseǧhed n tɣiwanin tilibiyin yellan d aẓeḍḍa ameqran akk n wufrinen deg tmurt ma yeḥwaǧ-it unabaḍ amaynu ».

Tenna-d Mogherini aya yiwen wass deffir tyitiwin ay gan Yiwanaken Yeddukklen « ɣef kra n yideggen iseddiyen deg Sabrata ay ibeɛden 70 n yikilumitren ɣef Ṭrables, anda ay mmutren 49 n yimdanen.

Anabaḍ alibi ayyes yesteɛṛef umɣiwan (muǧtamaɛ) agraɣlan iwet-d deg tyita-a tagenwant tamarikanit, yerna yenna-d dakken aya d arkaḍ n tnaya (siyada) talibit.