Asebter amenzawi

Sin n yimelyunen n yimazwaren ad yettekkin deg yikayaden n useggas-a (taneɣlaft)

SSƐIDA – Tenna-d tneɣlaft n ussegmi aɣelnaw, Nouria Benghebrit, ass n ssebt tameddit deg Ssɛida, d akken ad ilin 2 n yimelyunen n yimazwaren ad yesɛeddin ikayaden yemgerraden aseggas-a n 2016.

Massa Benghebrit tga tirzi n sin n wussan ɣef twilayt-a yerna twekked-d, deg yiwet n temlilit d tsudut n yimaswaḍen deg tnarit (maktab) n tmehla (mudiriyya) n ussegmi n Ssɛida d akken « ikayaden n useggas-a, ayɣef ad d-isigg Udiwan Aɣelnaw n Yimsizewren d Yikayaden, ad d-ilin deg tegnit n lɛafya ».

Deg wayen yerzan amsizwer n ussemres (tacɣil), tenna-d tneɣlaft d akken aɣlif-nnes yeɣtes (qarrara) « ad d-yerr ikayaden yuran d wid n wawal » yernu ur d-yettili ara waya s ussefqed kan n yikaramen.

Nnig waya, tḥettet-d ɣef yimaswaḍen n 3 n yiswiren n ussegmi akken ad sfeɛlen arkawal (mitaq) n tezdeg n ṣṣenɛa deg uḥric n ussegmi, ladɣa imi aheyyi n urkawal-a yeḍḍef akud d aɣezfan, am wakken ay yessefk ad ḍefren iselmaden, ad asen-bedden i lmendad, ad ten-wehhin yerna ad sfeɛlen ahilen n uḥric-nsen.

Tessefqed Massa Benghebrit, deg terzi-nnes, ɣef kra n yimukan n ussegmi deg twilayt-a, yerna tessers aẓru amezwaru deg lebni n yiwet n tesnawit (tanawiyya) n 800 n yimukan deg tɣiwant n Yub (Ssɛida), d tin umi d-ḥazen 314 n yimelyunen n yidinaṛen.

Deg terzi-nnes, tḥettet-d d akken yessefk ad reẓmen tazeqqa n yisaragen deg tesnawit-a akken ad zemrent tiddukliwin n tɣiwant ad ttgent irmuden (nacaṭat) idelsanen am umezgun d uẓawan.

Tessefqed daɣ tneɣlaft, deg tɣiwant-nni, acanṭi n lebni n yiwet n tegrawt taɣurbizt ay yewwḍen qêr 70% s lebni.