Asebter amenzawi
Surya: 142 n medden ay yemmuten deg txazzabiyin deg Dimecq
SAYEDA ZEINAB (Surya)– Ad ilin mmuten, ma ulac, 142 n yimdanen ass n lḥedd deg yiwen n uzrar n txazzabiyin ay d-terra tegrawt n Daɛec ɣef yiri-nnes, deg temnaḍin yellan ddaw leḥkem n unabaḍ (ḥukuma) asuri deg temdint n Dimecq, deg wakud aydeg Washington d Musku la xeddment akken ad d-yiki uḥbas n yimenɣi deg tmurt-a.
Ḥumṣ, tamdint tameqrant tis 3 n tmurt, tella-d deg-s txazzabit tameqrant akk seg 2011, d tin anda ay mmuten 59 n yimdanen ɣef leḥsab n yiwet n tuddsa tarnabaḍt (ɣayr ḥukumiyya). Ugar n 80 n yimdanen niḍen ay yemmuten deg yiwen n umqam aciɛi deg unẓul (ǧanub) n Dimecq, deg yiwet n txazzabit taslagt n tegrawt tarebrabt n Daɛec, ɣef leḥsab n tnegga n tɣemsa tunṣibt n Surya.
Deg Sayeda Zeinab, ay d-yusan 5 n yikilumitren deg unẓul n Dimecq yernu d amkan yesɛan azal ɣer Yiciɛiyen, 83 n yimdanen ay yettwenɣen deg txazzabyin, ɣef leḥsab n tnegga tasurit n Sana. Asanay (marṣad) Asuri n Yizerfan n Umdan yenna-d dakken 68 n yimdanen ay yemmuten deg txazzabit-nni yernu jerḥen 160 n wiyaḍ.
Ma ulac, 19 n yimdanen ay yellan deg tegnit n « tmettant tanusut (mawt sariri) », ɣef leḥsab n yiwet n tuddsa tarnabaḍt ay d-ibedren tiɣbula tisnajyanin seg unrar.
Asanay Asuri n Yizerfan n Umdan yenna-d yagi dakken tamdint n Sayeda Zeinab llant-d deg-s 4 n txazzabiyin, yiwet deg-sent tella-d s tkeṛṛust yendin, yernu mmuten medden deg yiwet seg-sent.
« Teṭṭerḍeq yiwet n tkeṛṛust yendin am wakken ay sṭerḍqen sin n yikamikazen iman-nsen ». Ma d aṭṭerḍeq wis 3, « ur neẓri ara ma d lbumba ay t-igan neɣ d takeṛṛust niḍen », ɣef wakken ay d-yenna Usanay.
Ma d tiliẓri n uwanak (dawla) asuri tenna-d dakken llant-d 3 n txazzabiyin, gar-asent yiwet s tkeṛṛust yendin d snat gan-tent yikamikazen deg uzniq n al-Tin, sdat umqam n Sayeda Zeinab.
« Tixazzabiyin-a llant-d akud n tuffɣa seg uɣerbaz, dɣa ɣef waya ay mmuten aṭas n yibalmuden », ɣef wakken ay d-tenna tliẓri tasurit.
