Asebter amenzawi

Yessefk ad ttwaqeblen yigerdan yesɛan ttawil n lemɛawna n tmesliwt deg yiɣerbazen n tmurt

SSƐIDA– Tenna-d tneɣlaft n ussegmi aɣelnaw, Nouria Benghebrit, ass n lḥedd deg Ssɛida, d akken ttejṛiba n ussidef n yigerdan yesɛan ttawil n lemɛawna n tmesliwt yessefk ad d-tili deg wakk iɣerbazen imenza seg-a ɣer sdat.

Tesseqsa tneɣlaft ɣef tegnit n 6 n yigerdan yesɛan ttawil n lemɛawna n tmesliwt yernu zerrwen deg uɣerbaz amenzu n Abdelhamid Ibn Badis deg Ssɛida, yerna tenna-d d akken yessefk ad tettwazreɛ ttejṛiba-a deg wakk iɣerbazen n tmurt.

Deg yiwen n umyager d tɣemsa deg ṛṛadyu tamnaḍant n Ssɛida, tenna-d Massa Benghebrit d akken aɣlif-nnes la d-yessebdad tigrawin n uxeddim i uzraw (dirasa) n wamek ad ttwasnummden yigerdan imeɛdaṛ ɣer yidis n yigerdan niḍen deg yiɣerbazen.

Tenna-d daɣ d akken aɣlif-nnes la ixeddem d tmehliwin (mudiriyyat) n ussegmi n twilayin niḍen akken ad d-ḥesben swaswa acḥal n yigerdan ay yesɛan ttawilat n lemɛawna n tmesliwt.

Nnig waya, tenna-d tneɣlaft d akken yestenya uɣlif n ussegmi amtawa (ittifaq) d uɣlif n temsetlelt (taḍamun) taɣelnawt akken ad d-ssidfen imeɣdawalen, imsensegmiyen d yimesnafsiyen deg yiɣerbazen imenza akken ad d-lhun d yigerdan yesɛan ttawilat n lemɛawna n tmesliwt, yerna tḥettet-d d akken yessefk ad yemɛawan uɣlif n ussegmi, win n temsetlelt taɣelnawt d kra n tiddukliwin akken ad sselhun asnummed n yigerdan-a deg uɣerbaz.