Asebter amenzawi
Timsizwert n ussemres n yiselmaden terẓem i wakk wid yebɣan ad ttekkin
LEZZAYER TAMANEɣT – Tenna-d tneɣlaft n ussegmi aɣelnaw, Nouria Benghebrit, ass n ttlata deg Lezzayer Tamaneɣt, d akken « asnummed (idmaǧ) n yiselmaden ay la ixeddmen s leɛqed ur d-yettili ara srid, yernu timsizwert n ussemres n yiselmaden terẓem i medden akk ».
Deg yijifeṛ n yiwet n temlilit n uqeyyem n yiseqquma n tsuda n weswaḍ (taftic), tenna-d tneɣlaft d akken « ur d-yettili usnummed wala tuzwirt i yiselmaden la ixeddmen s leɛqed deg uḥric n ussegmi, acku timsizwert terẓem i medden akk », yernu twekked-d d akken « ttejṛiba ay d-kesben ad ten-teǧǧ ad d-rren ɣef tuttriwin n ukayad yuran ay yeḥwaǧen tamussni deg unrar n ummuzzeg (taxaṣṣuṣ) ».
Txebber-d daɣ tneɣlaft d akken « azemz n temsizwert ad d-teɣli deg tgara n Meɣres, maca werɛad ur tt-id-ssefran ara », am wakken ay d-terna d akken azemz-a ad d-yettunefk seg-a ɣef dduṛt.
Deg wayen yerzan tasestant (taḥqiq) n usseqdec n tehyufin deg uɣerbaz ay d-yettwabedren deg kra n ttawilat n yisalan, tenkeṛ Massa Benghebrit d akken aɣlif-nnes « iɛemmed ad d-tili tsestant-a, yernu tenna-d d akken ur tcikk ara akk tella-d tsestant-a deg tidet ».
Tenna-d tneɣlaft deg temsalt-a d akken « tasestant deg unrar teḥwaǧ aqader n tesnarrayt (manhaǧiyya) tussnant d uqbal n uɣlif n ussegmi ». D acu kan, tfuṛes tagnit-a akken ad d-tɛeyyen ɣef umihi (xaṭar) n tehyufin deg uɣerbaz, ula ma yiwen kan n ubalmud ay la tent-yesseqdacen.
Deg wayen yerzan afraq n tkarḍa n tmagit (huwiyya) tabyumitrit i wid ad yesɛeddin lbak, tenna-d tneɣlaft d akken mazal ixuṣṣ ccɣel-a deg kra n twilayin, yernu tenna-d d akken ad d-heyyin ahil s umɛawen d tmehliwin (mudiriyyat) n ussegmi d tedbelt akken ad frun uguren-a deg twilayin ay terza temsalt.
Deg wayen yerzan asselmed n tmaziɣt, tenna-d tneɣlaft d akken asselmed n tutlayt-a ur ixulef ara tamenḍawt (dustur), am wakken ay d-tesmekti d akken attan la tettwasselmad yagi deg 28 n twilayin.
Nnig waya, tenna-d d akken ulac akk kra n uḥezzib ay yettwaddmen deg wayen yerzan tirawt n tmaziɣt s ugemmay n tfinaɣ, s win n taɛṛabt neɣ s ulatini i usselmed n tutlayt-a, yernu tamsalt-a ad tefru asmi ad d-tennulfu Tkadimit n tutlayt tamaziɣt.
