Asebter amenzawi

Aneẓruf Utrim: Meṛṛuk la tɛeṛṛeḍ ad tergel abrid i terzi n umaru amatu n Yiɣlanen Yeddukklen

LEZZAYER TAMANEɣT– Yenna-d usdawan aṣeḥrawi Mustapha Baba Sayed, yesselmaden deg Tesdawit n Lezzayer Tamaneɣt tis 3, ass n ttlata deg Lezzayer, dakken yesḥassef imi Meṛṛuk ur tt-yeɛjib ara lḥal ɣef terzi n umaru amatu n Yiɣlanen Yeddukklen, Ban Ki-moon, ɣef tmura n temnaḍt akken ad yefru taluft n Uneẓruf Utrim.

Mi d-yella d inebgi n unmager n uɣmis ayallas n DK-news, yenna-d uselmad-a aṣeḥṛawi dakken « anhil (niḍam) ameṛṛuki yewweḍ armi ay as-yefka ccuruḍ i umaru amatu n Yiɣlanen Yeddukklen yerna iḥudd-as-d timnaḍin ayɣef ad yerzu », akken ad d-yeg iɛewwiqen i terzi n umaru amatu ad yeg deg Meɣres ay d-yetteddun, ladɣa ɣef yikalen iṣeḥrawiyen yettwaḍḍfen.

Anhal ameṛṛuki yella yeḍmeɛ ad d-tili tirzi-a deffir ussuffeɣ n uṛabul n Useqqamu n Tɣellist (amn) ɣef uɛawed n lewṣaya n Minurso (Tuɣdaḍt n Yiɣlanen Yeddukklen i Tsefrant deg Uneẓruf Utrim), ɣef wakken ay d-yenna usdawan-a aṣeḥrawi.

Nnig waya, yenna-d uselmad-a daɣ dakken d Fṛansa ay d ssebba tameqrant deg yiɛewwiqen-a ay d-yellan deg ubrid n yiṣeḥrawiyen, yernu yetthem-itt s « tuqqna n tiṭ ɣef wayen ay la tetteg Meṛṛuk ».

« Fṛansa turar dduṛ deg wakk tiwuɣa d yiɛewwiqen ay d-yersen deg ubrid n uɣref aṣeḥrawi », ɣef wakken ay d-yenna.

Yenna-d, seg yidis niḍen, dakken « tamsalt taṣeḥrawit tella tezmer ad tefru s ubrid uḥṛic yernu d uṣwib, s uxemmem ɣef nnfeɛ n yiɣerfan n Lmeɣreb » ay yebɣan tadukli gar tmura-nsen.

Mass Baba Sayed iwekked-d dakken aɣref aṣeḥrawi yenna-d, acḥal d tikkelt, dakken yewjed s tidet akken ad yettekki deg lebni n Lmeɣreb d uḥuddu-nnes seg yimihiten (axṭar) uffiɣen ay la t-yettḥakaṛen.