Asebter amenzawi

Abuciḍan n Winston yenɣa 42 n yemdanen deg tegzirin n Fiji

SUVA (Fiji), – Nnan-d yiduba n tegzirin n Fiji, ass n laṛebɛa, d akken abuciḍan n Winston, yellan d abuciḍan ameqran akk deg umezruy n tmurt-a, yegla s 42 n tmeddurin.

« 42 n yimdanen ay d-yettwawekkden mmuten, yernu mazal imeẓla (maṣaliḥ) n ussukkes la ttaznen tiɣlamin akken ad ɛawnen imdanen ay yenḍerren deg temnaḍin yemgerraden n tegzirin n Fiji », ɣef wakken ay d-yenna Dan Gavidi, amutlay n unabaḍ (ḥukuma) deg Twitter.

ɣef leḥsab n umasay (mas’ul) n Umidag Azewwaɣ i Ugaraw Amelwi, Ahmad Sami, tacrawt-a la tettimɣur ɣef leḥsab n yisalan ay la d-yettawḍen seg yimukan ibeɛden.

Abuciḍan n Winston iwet-d tigzirin n Fiji deg yiḍ n 20 ɣer 21 Fuṛaṛ s waḍu ay yewwḍen ɣer 325 n yikilumitren deg tsaɛet, yernu yessedrem aṭas n lbenyanat am wakken ay iḥettem imezdaɣen ad rewlen ɣer wammasen n tuɛjilin.

D wa ay d abuciḍan n taggayt tis 5 awḥid ay iḥuzan tigzirin n Fiji aydeg zedɣen 900.000 n yimezdaɣen. Tadamsa n tmurt-a tettkel s waṭas ɣef tmerrit (siyaḥa).

Lemɛawna i wid yenḍerren seg ubuciḍan-a la d-tettaweḍ ɣer tegzirt tagejdant n Viti Levu, d acu kan, kra seg tuddar ay yenḍerren ugar zgant-d deg tegzirin tubɛidin wuɣur werɛad ur ddin ara yemsukksen.

Ma d aneɣlaf amenzu, Voreqe Bainimarama, iger-d tiɣri ass n ttlata i wid yenḍerren akken ad ṣebren. « Neẓra tagnit-nwen yesseḥzanen d lxelɛa aydeg tellam kenwi d twaculin-nwen (…) maca s yisem-inu d aneɣlaf amenzu, bɣiɣ ad teẓrem d akken ur netthenni ara arma newweḍ ɣer-wen ».