Asebter amenzawi

Taɣerdayt: takerrazt n lbaṭaṭa tesɛa azekka yelhan deg Lemniɛa

TAɣERDAYT– Tenna-d tmehla (mudiriyya) n yimeẓla n tkerrazt, ass n lexmis, d akken takerrazt n lbaṭaṭa deg Lemniɛa (anẓul n Tɣerdayt) terbeḥ yernu la d-tettakf lɣella n 300 n yiqenṭaren deg uqeṭṭar.

Tajumma (misaḥa) ay yettunefken i lbaṭaṭa teḍḍef azal n 100 n yiqeṭṭaren, gar-asen 12 n yiqeṭṭaren i lbaṭaṭa n tsemhuyt (mawsim) d 90 n yiqeṭṭaren i lbaṭaṭa n tgara n tsemhuyt, ɣef wakken ay aɣ-d-nnan.

D acu kan, mazal tajumma-a meẓẓiyet ɣef leḥsab n lɣella tameqrant ay la d-tettakf tkerrazt-a ay d-yebdan deg yiseggasen n 2000 deg twilayt n Tɣerdayt, ɣef wakken ay d-yenna umasay n taddadanin deg tmehla n yimeẓla n tkerrazt, Khaled Djebrit.

Temẓi n tjumma-a ssebba-nnes d tugdi n yikerrazen seg lexṣara, ladɣa imi, deg tsemhuyt yezrin, ur ssawḍen ara ad ssenzen lɣella-nsen. S waya, aṭas n yikerrazen ay yesmenyafen ad sfullḥen imendi (irden iquranen, akbal d temẓin) d ulegguẓ d ufeqqus ay fessusen ugar i ussenzi,

Tamnaḍt n Lemniɛa, deg wenẓul n Tɣerdayt, d tamnaḍt iwatan i wesfulleḥ n lxeḍra imi ay ggten din waman ddaw tmurt, ɣef wakken ay d-yenna Mass Djebrit, yernu yenna-d d akken ccetlat n lbaṭaṭa ay la sfulliḥen deg temnaḍt-a (desiree, pamela d elite) sɛant lbenna yelhan.