ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵉⵎⴹⴻⴱⴱⵔⴻⵏ ⵉⴼⵔⵉⵇⵉⵢⴻⵏ ⴷⴻⴳ ⴱⵓⵔⵓⵏⴷⵉ ⵉ ⵓⵙⴷⵓⵇⵇⴻⵙ ⵏ ⵍⴻⵎⵛⴰⵡⵕⴰⵜ

ⴱⵓⵊⵓⵎⴱⵓⵔⴰ– ⵢⴻⵡⵡⴻⴹ ⵓⵙⴻⵍⵡⴰⵢ ⵏ ⵜⴻⴼⵔⵉⵇⵜ ⵏ ⵡⴻⵏⵥⵓⵍ, ⵊⴰⵛⵧⴱ ⵣⵓⵎⴰ, ⴰⵙⵙ ⵏ ⵍⴻⵅⵎⵉⵙ ⵖⴻⴼ ⵢⵉⵖⴻⴼ ⵏ ⵢⵉⵡⴻⵜ ⵏ ⵜⵎⴰⴳⵍⴰ (ⵡⴰⴼⴷ) ⵏ ⵜⴷⵓⴽⵍⵉ ⵜⴰⴼⵔⵉⵇⵉⵜ, ⵖⴻⵔ ⴱⵓⵊⵓⵎⴱⵓⵔⴰ, ⵜⴰⵎⴰⵏⴻⵖⵜ ⵏ ⴱⵓⵔⵓⵏⴷⵉ, ⴰⴽⴽⴻⵏ ⴰⴷ ⵢⴻⵄⵕⴻⴹ ⴰⴷ ⴷ-ⵢⴻⵙⴷⵓⵇⵇⴻⵙ ⵍⴻⵎⵛⴰⵡⵕⴰⵜ ⵉ ⴼⴻⵔⵔⵓ ⵏ ⵜⴰⵍⵓⴼⵜ ⴰⵢ ⵉⵃⵓⵣⴰⵏ ⵜⴰⵎⵓⵔⵜ-ⴰ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵏⵏⴰⵏ ⵜⵜⴰⵡⵉⵍⴰⵜ ⵏ ⵢⵉⵙⴰⵍⴰⵏ.

ⵏⵏⵉⴳ ⵎⴰⵙⵙ ⵣⵓⵎⴰ, ⵢⴻⵍⵍⴰ ⴷⴰⵖ ⵓⵙⴻⵍⵡⴰⵢ ⴰⵎⵓⵔⵉⵟⴰⵏⵉ ⵎⵧⵀⴰⵎⴻⴷ ⵧⵓⵍⴷ ⴰⴱⴷⴻⵍ ⴰⵣⵉⵣ, ⴰⵙⴻⵍⵡⴰⵢ ⴰⵙⵉⵏⵉⴳⴰⵍⵉ ⵎⴰⵛⵀⵢ ⵙⴰⵍⵍ, ⵡⵉⵏ ⵏ ⴳⴰⴱⵓⵏ, ⴰⵍⵉ ⴱⵧⵏⴳⵧ ⵧⵏⴷⵉⵎⴱⴰ, ⴷ ⵓⵏⴻⵖⵍⴰⴼ ⴰⵎⴻⵏⵣⵓ ⵏ ⵉⵜⵢⵓⵒⵢⴰ, ⵀⴰⵉⵍⴻ ⵎⴰⵔⵉⴰⵎ ⴷⴻⵙⵙⴰⵍⴻⴳⵏ, ⵢⴻⵔⵏⵓ ⵉⵙⵡⵉ-ⵏⵙⴻⵏ ⴷ ⴰⵙⵙⴻⴼⵄⴻⵍ ⵏ ⵡⴰⵢⴻⵏ ⴰⵢ ⴷ-ⵏⵏⴰⵏ ⴷⴻⴳ ⵜⵇⴰⵛⵓⵛⵜ ⵏ ⵜⴷⵓⴽⵍⵉ ⵜⴰⴼⵔⵉⵇⵉⵜ ⴰⵢ ⴷ-ⵢⴻⵍⵍⴰⵏ ⴷⴻⴳ ⵜⴳⴰⵔⴰ ⵏ ⵢⴻⵏⵏⴰⵢⴻⵔ ⵢⴻⵣⵔⵉⵏ.

ⴰⵎⴰⵔⵓ ⴰⵎⴰⵜⵓ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ, ⴱⴰⵏ ⴽⵉ-ⵎⵧⵧⵏ, ⴰⵢ ⵢⴻⵔⵣⴰⵏ ⵓⵍⴰ ⴷ ⵏⴻⵜⵜⴰ ⵖⴻⴼ ⴱⵓⵊⵓⵎⴱⵓⵔⴰ ⵓⵙⵙⴰⵏ ⵏ ⵍⴻⵜⵏⵉⵢⴻⵏ ⴷ ⵜⵜⵍⴰⵜⴰ, ⵢⴻⵏⵏⴰ-ⴷ ⴷⴰⴽⴽⴻⵏ ⴰⵙⴻⵍⵡⴰⵢ ⵏ ⴱⵓⵔⵓⵏⴷⵉ, ⵒⵉⴻⵔⵔⴻ ⵏⴽⵓⵔⵓⵏⵣⵉⵣⴰ, ⵢⴻⴹⵎⴻⵏ-ⴰⵙ ⴷⴰⴽⴽⴻⵏ ⴰⴷ ⴷ-ⵉⵍⵉⵏⵜ ⵍⴻⵎⵛⴰⵡⵕⴰⵜ ⴰⵢⴷⴻⴳ ⴰⴷ ⵜⵜⴻⴽⴽⵉⵏ ⴰⴽⴽ ⵢⴻⵅⵚⵉⵎⴻⵏ.

ⵉⵏⴻⵄⵕⵓⴹⴻⵏ ⴰⴽⴽ ⴰⵢ ⴷ-ⵢⴻⵍⵍⴰⵏ ⵉ ⵓⵙⴷⵓⵇⵇⴻⵙ ⵏ ⵍⴻⵎⵛⴰⵡⵕⴰⵜ ⵓⵔ ⵙⵙⴰⵡⴹⴻⵏ ⵖⴻⵔ ⵡⴰⵛⴻⵎⵎⴰ, ⵉⵎⵉ ⴰⵏⴰⴱⴰⴹ (ⵃⵓⴽⵓⵎⴰ) ⵏ ⴱⵓⵔⵓⵏⴷⵉ ⵢⵓⴳⵉ ⴰⴷ ⵢⴻⵎⵛⵉⵡⴻⵕ ⴷ ⴽⵔⴰ ⵙⴻⴳ ⵢⵉⵅⵚⵉⵎⴻⵏ-ⵏⵏⴻⵙ.

« ⵓⵙⴰⵏ-ⴷ ⵢⵉⵖⴼⴰⵡⴻⵏ ⵏ ⵓⵡⴰⵏⴰⴽ (ⵉⴼⵔⵉⵇⵉⵢⴻⵏ) ⴰⴷ ⵛⵉⵡⵕⴻⵏ ⴰⵏⴰⴱⴰⴹ ⴷ ⵢⵉⴷⵉⵙⴰⵏ ⵏⵉⴹⴻⵏ ⴰⵢ ⵜⴻⵔⵣⴰ ⵜⴻⵎⵙⴰⵍⵜ ⴰⴽⴽⴻⵏ ⴰⴷ ⴷ-ⵔⵔⴻⵏ ⵍⴻⵎⵛⴰⵡⵕⴰⵜ ⴰⵢⴷⴻⴳ ⴰⴷ ⵜⵜⴻⴽⴽⵉⵏ ⴰⴽⴽ ⵢⵉⴷⵉⵙⴰⵏ ⴷⴻⴳ ⴱⵓⵔⵓⵏⴷⵉ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ ⵢⵉⵡⴻⵏ ⵏ ⵓⴷⵉⵒⵍⵓⵎⴰⵜⵉ ⴰⴼⵔⵉⵇⵉ ⴷⴻⴳ ⴱⵓⵊⵓⵎⴱⵓⵔⴰ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵔⵏⴰ ⴷⴰⴽⴽⴻⵏ ⵜⴰⵙⵡⵉⵄⵜ-ⴰ, « ⵓⵔ ⴷ-ⵢⴻⵜⵜⵉⵍⵉ ⴰⵔⴰ ⵡⴰⵡⴰⵍ ⵖⴻⴼ ⵓⴼⵔⴰⵇ ⵏ ⵢⵉⵖⴰⵍⵍⴻⵏ ⵉⴼⵔⵉⵇⵉⵢⴻⵏ ⴷⴻⴳ ⴱⵓⵔⵓⵏⴷⵉ ».

ⵜⴰⴷⵓⴽⵍⵉ ⵜⴰⴼⵔⵉⵇⵉⵜ ⵜⴻⵖⵜⴻⵙ (ⵇⴰⵔⵔⴰⵔⴰⵜ) ⵏⴰⵇⴰⵍ, ⴷⴻⴳ ⴷⵓⵊⴻⵎⴱⴻⵕ, ⴰⴷ ⵜⴻⴼⵔⴻⵇ 5.000 ⵏ ⵢⵉⵙⴻⵔⴷⴰⵙⴻⵏ ⴷⴻⴳ ⴱⵓⵔⵓⵏⴷⵉ, ⴰⴽⴽⴻⵏ ⴰⴷ ⵢⴻⵃⴱⴻⵙ ⵛⵛⵡⴰⵍ. ⴷ ⴰⵛⵓ ⴽⴰⵏ, ⵢⵓⴳⵉ ⵓⵙⴻⵍⵡⴰⵢ ⵏⴽⵓⵔⵓⵏⵣⵉⵣⴰ ⴷ ⵡⴰⵟⴰⵙ ⵏ ⵢⵉⵎⴹⴻⴱⴱⵔⴻⵏ ⵉⴼⵔⵉⵇⵉⵢⴻⵏ ⴰⵢⴰ ⴷⴻⴳ ⵜⵇⴰⵛⵓⵛⵜ ⴰⵢ ⴷ-ⵢⴻⵍⵍⴰⵏ ⴷⴻⴳ ⵜⴳⴰⵔⴰ ⵏ ⵢⴻⵏⵏⴰⵢⴻⵔ, ⴷⵖⴰ ⴷ ⴰⵢⴰ ⴰⵢ ⵢⴻⵙⵙⴰⵡⴹⴻⵏ ⵜⴰⴷⵓⴽⵍⵉ ⵜⴰⴼⵔⵉⵇⵉⵜ ⴰⴷ ⵜⴻⴱⵟⴻⵍ ⵜⴰⴽⵜⵉ-ⴰ.

ⴱⵓⵔⵓⵏⴷⵉ ⵜⴻⵣⴷⴻⵔ ⴷⴻⴳ ⵛⵛⵡⴰⵍ ⴷ ⴰⵎⴻⵇⵔⴰⵏ ⵙⴻⴳ ⵡⴰⵙⵎⵉ ⴰⵢ ⴷ-ⵢⴻⵏⵏⴰ ⵓⵙⴻⵍⵡⴰⵢ ⵏⴽⵓⵔⵓⵏⵣⵉⵣⴰ ⴷⴰⴽⴽⴻⵏ ⴰⴷ ⴷ-ⵢⴻⵙⵙⴻⵔⵙ ⵉⵎⴰⵏ-ⵏⵏⴻⵙ ⵖⴻⵔ ⵜⴻⴼⵔⴰⵏⵉⵏ ⵏ ⵢⴻⴱⵔⵉⵔ ⵏ 2015 ⴰⴽⴽⴻⵏ ⴰⴷ ⵢⴻⵃⴽⴻⵎ ⵉ ⵜⵉⴽⴽⴻⵍⵜ ⵜⵉⵙ 3.