ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⴰⵢⵢⵓⵔ ⵏ ⵓⵎⵓⵏⵓⵍⵓⴳ: ⵜⵉⵖⵡⵉⵙⵜ ⵏ ⵜⵧⵓⵏⴻⵙ ⴰⵉⵜ-ⴰⵍⵉ ⵖⴻⴼ ⵍⵇⴻⵔⵃ ⵏ ⵜⵙⴻⴷⵏⴰⵏ
ⵇⵙⴻⵏⵟⵉⵏⴰ– ⴰⵎⵓⵏⵓⵍⵓⴳ ⵏ « ⵕⵕⴰⵃⵍⴰ » ⴰⵢ ⴷ-ⵜⵓⵔⴰⵔ, ⴰⵙⵙ ⵏ ⵍⴰⵕⴻⴱⵄⴰ ⵜⴰⵎⴻⴷⴷⵉⵜ ⴷⴻⴳ ⵇⵙⴻⵏⵟⵉⵏⴰ, ⵜⵧⵓⵏⴻⵙ ⴰⵉⵜ-ⴰⵍⵉ, ⴷ « ⵜⵉⵖⵡⵉⵙⵜ » ⵉ ⵍⵇⴻⵔⵃ ⴰⵙⵓⵙⴰⵎ ⴰⵢⴷⴻⴳ ⴷⴷⵔⴻⵏⵜ ⵜⵙⴻⴷⵏⴰⵏ, ⵢⴻⵔⵏⵓ ⵢⴻⵙⵙⴽⴻⵏ-ⴷ ⵡⴰⵢⴰ ⴷ ⴰⴽⴽⴻⵏ ⴰⵎⵓⵏⵓⵍⵓⴳ ⵢⴻⵜⵜⵡⴰⵙⵙⵏⴻⵏ, ⵙ ⵓⵎⴰⵜⴰ, ⵙ ⵜⴰⴹⵙⴰ, ⵢⴻⵣⵎⴻⵔ ⴷⴰⵖ ⴰⴷ ⵢⴻⵚⵍⴻⵃ ⵉ ⵓⵙⵙⴻⵡⵍⵉⵡⴻⵍ ⵏ ⵡⵓⵍⴰⵡⴻⵏ ⴷ ⵓⵅⴻⵎⵎⴻⵎ ⵖⴻⴼ ⴽⵔⴰ ⵏ ⵜⴻⵎⵙⴰⵍ.
ⴰⵀⴰⵏⴰⵢ (ⵄⴰⵔⴹ) ⵏ ⴰⵉⵜ-ⴰⵍⵉ ⵢⴻⴹⴹⴻⴼ ⵜⴰⵙⴰⵄⴻⵜ ⵢⴻⵔⵏⵓ ⵢⴻⵍⵍⴰ-ⴷ ⴰⵎⵣⵓⵏ ⴷ ⵜⴰⵎⵔⴰⵢⵜ ⴰⵢⴷⴻⴳ ⵉⵎⴼⴻⵕⵕⴵⴻⵏ ⵣⴻⵎⵔⴻⵏ ⴰⴷ ⵥⵔⴻⵏ ⵜⵉⵎⴻⵜⵜⵉ-ⵏⵙⴻⵏ ⴷ ⵡⴰⵎⴻⴽ ⴰⵢ ⵜⴻⵍⵍⴰ ⴷⴻⴳ-ⵙ ⵜⵎⴻⵟⵟⵓⵜ, ⵍⵇⴻⵔⵃ ⴰⵢⴷⴻⴳ ⵜⴻⵍⵍⴰ ⴷ ⵡⴰⵎⴻⴽ ⴰⵢ ⵜⴻⵜⵜⵃⵓⵍⴼⵓ ⴵⴵⴰⵏ-ⵜⵜ ⵡⵉⴷ ⴰⵢ ⵉⵣⴻⵎⵔⴻⵏ ⴰⴷ ⵜⵜ-ⵄⴰⵡⵏⴻⵏ ⴷⴻⴳ ⵡⴰⴽⵓⴷ ⴰⵢⴷⴻⴳ ⵜⴻⵜⵜⴻⵎⵄⴻⴱⴱⴰⵕ ⴷ ⵡⴰⵟⴰⵙ ⵏ ⵢⵉⵏⴻⵣⴳⵓⵎⴻⵏ.
ⴰⵎⵙⵓⴷⴻⵎ (ⵛⴰⵅⵚⵉⵢⵢⴰ) ⵏ ⵓⵎⵓⵏⵓⵍⵓⴳ-ⴰ ⴷ ⵢⵉⵡⴻⵜ ⵏ ⵜⵎⴻⵟⵟⵓⵜ ⵉⵙⴻⵎ-ⵏⵏⴻⵙ « ⵕⵕⴰⵃⵍⴰ » ⵏⴻⵖ « ⵜⵉⵏ ⵉⴳⵓⴵⴵⴻⵏ », ⵢⴻⵔⵏⵓ ⵙ ⵜⴻⵖⵣⴻⴼ ⵏ ⵓⵎⵓⵏⵓⵍⵓⴳ, ⵢⴻⵍⵍⴰ-ⴷ ⴷⴰⵖ ⵓⵥⴰⵡⴰⵏ ⵏ ⵍⴻⵃⵣⴻⵏ ⵙ ⵜⴳⵉⵟⴰⵔ ⵏ ⵀⵧⵛⵉⵏⴻ ⴱⴻⵏⵛⵀⴻⵎⵉⵙⵙⴰ. ⴰⵎⵙⵓⴷⴻⵎ-ⴰ ⴰⴷ ⴷ-ⵢⴻⵃⴽⵓ ⴰⵎⴻⵣⵔⵓⵢ ⵏ ⵓⴷⴻⴷⴷⵉ ⴰⵎⴻⵇⵔⴰⵏ, ⵓⵇⵔⵉⵃ ⵏ ⵜⵎⴻⵟⵟⵓⵜ ⵔⵇⵉⵇⴻⵏ ⵓⵔ ⵢⵓⴼⵉⵏ ⴰⵔⴰ ⵜⴰⵢⵔⵉ, ⵜⵉⵏ ⵃⵏⵉⵏⴻⵏ ⵢⴻⵣⴳⴰⵏ ⵜⴻⵜⵜⴰⵖ ⵜⵉⵢⵉⵜⵉⵡⵉⵏ, ⵜⵉⵏ ⵢⴻⵙⵄⴰⵏ ⵏⵏⴻⵢⵢⴰ ⵎⴰⵛⴰ ⵜⴻⵣⴳⴰ ⵜⴻⵜⵜⵡⴰⴽⴻⵍⵍⴰⵅ, ⵜⵉⵏ ⵢⴻⴱⵖⴰⵏ ⴰⴷ ⴷ-ⵜⴰⴼ ⴰⴱⵔⵉⴷ-ⵏⵏⴻⵙ ⴷⴻⴳ ⵜⵎⴻⴷⴷⵓⵔⵜ, ⵎⴰⵛⴰ ⵙⵄⴻⵔⵇⴻⵏ-ⴰⵙ ⴰⴽⴽ ⵉⴱⵔⵉⴷⴻⵏ.
« ⵕⵕⴰⵃⵍⴰ » ⵜⴻⵃⴽⴰ-ⴷ ⵖⴻⴼ ⵜⴱⴻⵔⴽⴰⵏⵉⵏ, ⵖⴻⴼ ⵜⵎⴻⴷⴷⵓⵔⵜ ⵏ ⵍⵇⴻⵔⵃ ⴰⵢ ⴷ-ⵢⴻⴱⴷⴰⵏ ⴷⴻⴳ ⵡⴻⵅⵅⴰⵎ ⵏ ⴱⴰⴱⴰ-ⵙ, ⴷⴻⴳ ⵜⵡⴰⵛⵓⵍⵜ ⵜⴰⵙⴻⵎⵎⴰⴹⵜ ⵓⵔ ⴰⵙ-ⵢⴻⴼⴽⵉⵏ ⴰⵔⴰ ⵜⴰⵢⵔⵉ, ⴰⵏⴷⴰ ⴷⵉⵎⴰ ⵉⵖⴰⴹ-ⵉⵜⵜ ⵍⵃⴰⵍ ⵖⴻⴼ ⵎⴻⵃⵢⴰⴼ ⴰⵢ ⴷ-ⵢⴻⵜⵜⵉⵍⵉⵏ ⴳⴰⵔ ⵢⴻⵇⵛⵉⵛⴻⵏ ⴷ ⵜⴻⵇⵛⵉⵛⵉⵏ.
ⵜⵧⵓⵏⴻⵙ ⵜⵡⴻⵜ-ⴷ ⴷⴰⵖ ⴷⴻⴳ ⴷⴷⵓⵕ ⵏ ⵢⴻⵎⵎⴰ-ⵙ ⴷ ⵡⵉⵏ ⵏ ⵜⴻⵎⵖⴰⵔⵜ-ⵏⵏⴻⵙ, ⵙⴰⴽⴽⵉⵏ ⵜⵉⵖⵡⵉⵙ ⵖⴻⴼ ⵓⵏⴻⵣⴳⵓⵎ ⵎⴻⵖⵖⵔⴻⵏ ⵏ ⵣⵣⵡⴰⴵ ⵓⵃⵜⵉⵎ, ⴰⵎ ⵡⴰⴽⴽⴻⵏ ⴰⵢ ⴷ-ⵜⴻⵙⵙⴰⵡⴻⵍ ⵖⴻⴼ ⵍⵃⵉⴼ ⵏ ⵜⵎⴻⵟⵟⵓⵜ ⵢⴻⴱⵔⴰⵏ, ⴷ-ⵢⴻⵡⵡⵉⵏ ⵜⴰⵇⵛⵉⵛⵜ ⴷⴻⴳ ⵢⵉⵔⵉ-ⵏⵏⴻⵙ ⴷⴻⴳ ⵜⵎⴻⵜⵜⵉ ⴰⵢⴷⴻⴳ ⵜⴻⵡⵄⴻⵕ ⵜⵎⴻⴷⴷⵓⵔⵜ ⵢⴻⵔⵏⵓ ⵓⵍⴰⵛ ⵕⵕⴻⵃⵎⴰ.
ⵜⴰⵎⴻⵟⵟⵓⵜ-ⴰ ⵜⵡⴰⵍⴰ ⵢⴻⵍⵍⵉ-ⵙ ⴷ ⴰⵙⵙⵉⵔⴻⵎ, ⵢⴻⵔⵏⵓ ⴰⵣⴰⵎⵓⵍ ⵏ ⵡⴰⵢⴰ ⴷ ⵢⵉⵡⴻⵜ ⵏ ⵜⵇⴻⵏⴷⵓⵔⵜ ⵜⴰⵎⴻⵥⵢⴰⵏⵜ ⵉⵄⴻⵍⵍⵇⴻⵏ. ⵎⵉ ⵜⵄⴰⵡⴻⴷ ⵣⵣⵡⴰⴵ, ⵜⴻⴹⴹⴻⴼ ⴷⴻⴳ ⵡⴻⵔⴳⴰⵣ-ⵏⵏⴻⵙ ⴰⵎⴰⵢⵏⵓ ⴰⵢ ⴰⵙ-ⴷ-ⵉⴱⴰⵏⴻⵏ ⵃⵏⵉⵏ ⵓⴳⴰⵔ, ⵎⴰⵛⴰ, ⴷⴻⴳ ⵜⴳⴰⵔⴰ, ⵓⵔ ⵜⴻⵜⵜⵄⴻⴹⴹⵉⵍ ⴰⵔⴰ ⴰⴷ ⵜⵥⴻⵔ ⴷ ⴰⴽⴽⴻⵏ ⵙ ⴽⵔⴰ ⵜⵄⴻⵜⵜⴻⴱ ⵢⴻⴷⴷⴰ ⴱⴰⵟⴻⵍ, ⵉⵎⵉ ⵓⵍⴰ ⴷ ⵢⴻⵍⵍⵉ-ⵙ-ⵏⵏⵉ ⴰⴷ ⵉⵄⴻⴷⴷⵉ ⴼⴻⵍⵍ-ⴰⵙ ⵍⴱⴰⵟⴻⵍ.
ⴷⴻⴳ ⵜⴳⴰⵔⴰ ⵏ ⵓⵀⴰⵏⴰⵢ-ⴰ, ⵜⴻⵏⵏⴰ-ⴰⵖ-ⴷ ⵜⵧⵓⵏⴻⵙ ⴰⵉⵜ-ⴰⵍⵉ, ⴷ ⴰⴽⴽⴻⵏ ⴰⵎⵓⵏⵓⵍⵓⴳ-ⵏⵏⴻⵙ ⵜⴻⵄⵕⴻⴹ ⴰⴷ ⴷ-ⵜⴻⵙⵙⴽⴻⵏ ⵢⴻⵙ-ⵙ ⵜⵉⵖⴰⵡⵙⵉⵡⵉⵏ ⵜⵓⵇⵔⵉⵃⵉⵏ ⵢⴻⵍⵍⴰⵏ ⴷⴻⴳ ⵜⵎⴻⵜⵜⵉ ⴰⴽⴽⴻⵏ ⴰⴷ ⵅⴻⵎⵎⴻⵎⴻⵏ ⴼⴻⵍⵍ-ⴰⵙⴻⵏⵜ ⵎⴻⴷⴷⴻⵏ ⵙ ⵡⵓⴳⴰⵔ ⵏ ⵜⴻⵍⵇⴻⵢ.
