ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵓⴳⴰⵔ ⵏ 170.000 ⵏ ⵢⵉⵎⴰⵏⵓⵏⴻⵏ ⴰⴷ ⵢⴻⴱⴷⵓⵏ ⴰⵍⵎⴰⴷ ⵏ ⵚⵚⴻⵏⵄⴰⵜ ⵙⴻⴳ ⵡⴰⵙⵙ ⵏ ⵍⵃⴻⴷⴷ ⴷ ⴰⵙⴰⵡⴻⵏ

ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ– ⵓⴳⴰⵔ ⵏ 170.000 ⵏ ⵢⵉⵎⴰⵏⵓⵏⴻⵏ (ⵎⵓⵜⴰⵔⴰⴱⴱⵉⵚⵉⵏ) ⵉⵎⴰⵢⵏⵓⵜⴻⵏ ⴰⴷ ⵢⴻⴱⴷⵓⵏ ⴰⵍⵎⴰⴷ-ⵏⵙⴻⵏ ⴰⵙⵙ ⵏ ⵍⵃⴻⴷⴷ ⴷⴻⴳ ⵢⵉⵖⴻⵔⴱⴰⵣⴻⵏ ⵏ ⵓⵙⵙⵉⵍⴻⵖ (ⵜⴰⴽⵡⵉⵏ) ⵉ ⵜⴻⴷⵡⵉⵍⵜ ⵏ ⴼⵓⵕⴰⵕ ⵏ 2016, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴰⵙⵙ ⵏ ⵍⴻⵅⵎⵉⵙ ⵓⵏⴻⵖⵍⴰⴼ ⵏ ⵓⵙⵙⵉⵍⴻⵖ, ⵎⵧⵀⴰⵎⴻⴷ ⵎⴻⴱⴰⵔⴽⵉ.

ⵎⴰⵙⵙ ⵎⴻⴱⴰⵔⴽⵉ, ⴰⵢ ⴷ-ⵢⴻⵍⵍⴰⵏ ⴷ ⵉⵏⴻⴱⴳⵉ ⵏ ⵡⴻⵏⵎⴰⴳⴻⵔ ⵏ ⵡⴻⵖⵎⵉⵙ ⴰⵢⴰⵍⵍⴰⵙ ⵏ ⴻⵍ ⵎⵧⵓⴷⵊⴰⵀⵉⴷ, ⵢⴻⵏⵏⴰ-ⴷ ⴷⴰⴽⴽⴻⵏ ⵓⴳⴰⵔ ⵏ 170.000 ⵏ ⵢⵉⵎⴰⵏⵓⵏⴻⵏ ⵉⵎⴰⵢⵏⵓⵜⴻⵏ (ⵙⴻⴳ ⵢⴰⵍ ⵚⵚⴻⵏⴼ) ⴰⴷ ⵢⴻⴱⴷⵓⵏ ⴰⵍⵎⴰⴷ ⴰⵙⵙ ⵏ ⵍⵃⴻⴷⴷ.

ⴰⵙⵙⵉⴳⴳⴻⵣ (ⵜⴰⵙⴵⵉⵍ) ⵢⴻⴱⴷⴰ ⴰⵙⵙ ⵏ 20 ⴼⵓⵕⴰⵕ ⵢⴻⵔⵏⵓ ⵙⵖⴻⵣⴼⴻⵏ ⵜⴰⵍⵍⵉⵜ-ⵏⵏⴻⵙ ⴰⵔⵎⴰ ⴷ 6 ⵎⴻⵖⵔⴻⵙ ⴰⴽⴽⴻⵏ ⴰⴷ ⴼⴽⴻⵏ ⵜⴰⵍⴻⵎⵎⵉⵥⵜ (ⴼⵓⵔⵚⴰ) ⵉ ⵢⵉⵍⴻⵎⵥⵉⵢⴻⵏ ⵢⴻⴱⵖⴰⵏ ⴰⴷ ⵍⴻⵎⴷⴻⵏ ⵚⵚⴻⵏⵄⴰⵜ ⴰⴽⴽⴻⵏ ⴰⴷ ⵙⵙⵉⴳⴳⵣⴻⵏ ⵉⵎⴰⵏ-ⵏⵙⴻⵏ.

ⴰⴽⴽⴻⵏ ⴰⴷ ⴷ-ⵢⵉⵍⵉ ⵡⵓⵖⴰⵍ-ⴰ ⵖⴻⵔ ⵡⴻⵍⵎⴰⴷ ⴷ ⵓⵔⴱⵉⵃ, ⵢⴻⵙⵙⴻⴱⴳⴻⵙ ⵡⴻⵖⵍⵉⴼ ⴰⴽⴽ ⵜⵜⴰⵡⵉⵍⴰⵜ ⵉⵡⴰⵜⴰⵏ: 1.230 ⵏ ⵢⵉⵖⴻⵔⴱⴰⵣⴻⵏ, ⴳⴰⵔ-ⴰⵙⴻⵏ 10 ⵏ ⵢⵉⵖⴻⵔⴱⴰⵣⴻⵏ ⵉⵎⴰⵢⵏⵓⵜⴻⵏ ⴷ 25.000 ⵏ ⵢⴻⵎⵙⵉⵍⵖⴻⵏ (ⵎⵓⴽⴰⵡⵡⵉⵏⵉⵏ), ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⵎⴻⴱⴰⵔⴽⵉ.

ⴰⵀⵉⵍ ⵏ ⵓⵙⵙⵉⵍⴻⵖ ⵉ ⵜⴻⴷⵡⵉⵍⵜ-ⴰ ⵏ ⴼⵓⵕⴰⵕ ⵏ 2016 ⵍⵍⴰⵏⵜ ⴷⴻⴳ-ⵙ 282 ⵏ ⵜⵎⴻⵣⵣⵓⴳⵉⵏ (ⵉⵅⵜⵉⵚⴰⵚⴰⵜ) ⵢⴻⵔⵣⴰⵏ 22 ⵏ ⵢⵉⴼⵓⵔⴽⴰ ⵏ ⵚⵚⴻⵏⵄⴰⵜ ⴰⵢⴷⴻⴳ ⵉⵎⴰⵏⵓⵏⴻⵏ ⵣⴻⵎⵔⴻⵏ ⴰⴷ ⴷ-ⴰⵡⵉⵏ ⵉⴳⴻⵔⴷⴰⵙⴻⵏ (ⵛⴰⵀⴰⴷⴰⵜ). ⵍⵍⴰⵏⵜ ⴷⴰⵖ 112 ⵏ ⵜⵎⴻⵣⵣⵓⴳⵉⵏ ⵢⴻⵔⵣⴰⵏ ⵉⵙⵙⵉⵍⵖⴻⵏ ⵉⵎⵙⵉⵖⵔⴻⵏ ⴰⵢⴷⴻⴳ ⵉⵎⴰⵏⵓⵏⴻⵏ ⵣⴻⵎⵔⴻⵏ ⴰⴷ ⴷ-ⴰⵡⵉⵏ ⵉⴳⴻⵔⴷⴰⵙⴻⵏ ⵏ ⵓⵙⵙⵉⵖⴻⵔ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴻⵖⵍⴰⴼ.

ⴰⵖⵍⵉⴼ ⵏ ⵓⵙⵙⵉⵍⴻⵖ ⵍⴰ ⵉⵅⴻⴷⴷⴻⵎ ⵙ ⵡⴻⵎⵄⴰⵡⴻⵏ ⴷ ⵜⴻⵕⵎⵉⵙⵉⵏ (ⵛⴰⵔⵉⴽⴰⵜ) ⵜⵉⴷⴰⵎⵙⴰⵏⵉⵏ ⵢⴻⵎⴳⴻⵔⵔⴰⴷⴻⵏ ⴰⴽⴽⴻⵏ ⴰⴷ ⴷ-ⵙⵙⴻⵣⴳⴻⵏ ⵉⵙⵙⵉⵍⵖⴻⵏ ⵖⴻⴼ ⵍⴻⵃⵙⴰⴱ ⵏ ⵡⴰⵢⴻⵏ ⴰⵢ ⵢⴻⵃⵡⴰⴵ ⵡⴻⵃⵔⵉⵛ ⵏ ⵜⴷⴰⵎⵙⴰ, ⴷⵖⴰ ⴷ ⴰⵢⴰ ⴰⴷ ⵢⴻⵙⵙⵉⴼⴻⵙⵙⴻⵏ ⵉ ⵢⵉⵍⴻⵎⵥⵉⵢⴻⵏ ⵢⴻⵙⵄⴰⵏ ⵉⴳⴻⵔⴷⴰⵙⴻⵏ ⴰⴷ ⴷ-ⴰⴼⴻⵏ ⴰⵅⴻⴷⴷⵉⵎ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴻⵖⵍⴰⴼ.