ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵓⴳⴰⵔ ⵏ 4 ⵏ ⵢⵉⵎⴻⵍⵢⴰⵕⴻⵏ ⵏ ⵎ3 ⵏ ⵡⴰⵎⴰⵏ ⴰⵢ ⵢⴻⵜⵜⵡⴰⵊⴻⵎⵄⴻⵏ ⴷⴻⴳ ⵡⵓⴳⴳⵓⴳⴻⵏ ⵏ ⵜⵎⵓⵔⵜ

ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ– ⵉⵅⴻⴱⴱⴻⵔ-ⴰⵖ-ⴷ ⵡⴻⵖⵍⵉⴼ ⵏ ⵜⴻⵖⴱⵓⵍⴰ ⵏ ⵡⴰⵎⴰⵏ ⴷⴰⴽⴽⴻⵏ ⵍⴷⵣⴰⵢⴻⵔ ⵜⴻⵊⵎⴻⵄ 4,62 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⵎⵉⵜⵔⴻⵏ ⵉⴳⴰⵙⴰⵙⴻⵏ (ⵎ3) ⵏ ⵡⴰⵎⴰⵏ ⴷⴻⴳ 65 ⵏ ⵡⵓⴳⴳⵓⴳⴻⵏ (ⵙⵓⴷⵓⴷ) ⴷⴻⴳ ⵡⴰⴽⴽ ⵜⵉⵎⵏⴰⴹⵉⵏ ⵏ ⵜⵎⵓⵔⵜ, ⵢⴻⵔⵏⵓ ⴰⴼⵎⵉⴹⵉ (ⵏⵉⵙⴱⴰ) ⵏ ⵜⴰⵛⴻⵕⵜ ⵏ ⵡⵓⴳⴳⵓⴳⴻⵏ ⵜⴻⵡⵡⴻⴹ ⵖⴻⵔ 67,56%.

ⵉⴳⴻⴼⵔⴰⵏ ⴰⵢ ⴷ-ⵉⵡⵜⴻⵏ ⵙⴻⴳ ⵎⴻⵍⵎⵉ ⴽⴰⵏ ⵔⵏⴰⵏ-ⴷ ⴰⵣⴰⵍ ⵏ 8 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⵎⵉⵜⵔⴻⵏ ⵉⴳⴰⵙⴰⵙⴻⵏ (ⵎ3) ⵏ ⵡⴰⵎⴰⵏ, ⵢⴻⵔⵏⵓ 60% ⵙⴻⴳ ⵡⴰⵎⴰⵏ-ⴰ ⵜⵜⵡⴰⵊⴻⵎⵄⴻⵏ-ⴷ ⴷⴻⴳ ⵜⴻⵎⵏⴰⴹⵜ ⵜⴰⴳⵎⵓⴹⴰⵏⵜ (ⵛⴰⵔⵇⵉⵢⵢⴰ) ⵏ ⵜⵎⵓⵔⵜ.

ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⴰⵙⵡⵉⵔ ⵏ ⵡⴰⵎⴰⵏ ⵙ ⵜⴻⵎⵏⴰⴹⵉⵏ, ⵜⴰⵎⵏⴰⴹⵜ ⵏ ⵜⵍⴻⵎⵎⴰⵙⵜ ⵏ ⵜⵎⵓⵔⵜ ⵜⴻⵙⵄⴰ 12 ⵏ ⵡⵓⴳⴳⵓⴳⴻⵏ ⵢⴻⵔⵏⵓ ⵜⴻⵊⵎⴻⵄ-ⴷ 1,4 ⴷ ⴰⵎⴻⵍⵢⵓⵏ ⵏ ⵢⵉⵎⵉⵜⵔⴻⵏ ⵉⴳⴰⵙⴰⵙⴻⵏ ⵏ ⵡⴰⵎⴰⵏ ⵓⵙⵙⴰⵏ-ⴰ, ⴷⵖⴰ ⵙ ⵡⴰⵢⴰ ⴰⵢ ⵢⴻⵡⵡⴻⴹ ⵓⴱⵍⴻⵖ (ⵃⴰⴵⵎ) ⵏ ⵡⴰⵎⴰⵏ-ⵏⵏⴻⵙ ⵖⴻⵔ ⵡⵓⴳⴰⵔ ⵏ 1,04 ⴷ ⴰⵎⴻⵍⵢⴰⵕ ⵏ ⵢⵉⵎⵉⵜⵔⴻⵏ ⵉⴳⴰⵙⴰⵙⴻⵏ (ⴰⴼⵎⵉⴹⵉ ⵏ ⵜⴰⵛⴻⵕⵜ ⵏ 64,42%).

ⴷⴻⴳ ⵜⴻⵎⵏⴰⴹⵜ ⵏ ⵢⵉⵖⵣⴻⵔ ⵏ ⵛⵛⵍⴻⴼ (ⴰⵜⴰⵔⴰⵎ), ⵉⴳⴻⴼⵔⴰⵏ ⵉⵏⴻⴳⴳⵓⵔⴰ ⵔⵏⴰⵏ-ⴷ 760.000 ⵏ ⵢⵉⵎⵉⵜⵔⴻⵏ ⵉⴳⴰⵙⴰⵙⴻⵏ (ⵎ3) ⵏ ⵡⴰⵎⴰⵏ ⴰⵢ ⵢⴻⵜⵜⵡⴰⵊⴻⵎⵄⴻⵏ ⴷⴻⴳ 17 ⵏ ⵡⵓⴳⴳⵓⴳⴻⵏ, ⵢⴻⵔⵏⵓ ⴷ ⴰⵢⴰ ⴰⵢ ⵢⴻⵙⵙⴰⵡⴹⴻⵏ ⵍⵄⴻⵡⵍⴰ ⵏ ⵡⴰⵎⴰⵏ ⵖⴻⵔ 898,42 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⵎⵉⵜⵔⴻⵏ ⵉⴳⴰⵙⴰⵙⴻⵏ (ⴰⴼⵎⵉⴹⵉ ⵏ ⵜⴰⵛⴻⵕⵜ ⵏ 52,56%).

ⵎⴰ ⴷ ⵜⴰⵎⵏⴰⴹⵜ ⵏ ⵓⵜⴰⵔⴰⵎ (ⵖⴰⵔⴱ) ⵏ ⵜⵎⵓⵔⵜ ⵜⴻⵊⵎⴻⵄ-ⴷ 569.000 ⵏ ⵢⵉⵎⵉⵜⵔⴻⵏ ⵉⴳⴰⵙⴰⵙⴻⵏ (ⵎ3) ⵏ ⵡⴰⵎⴰⵏ ⴷⴻⴳ 13 ⵏ ⵡⵓⴳⴳⵓⴳⴻⵏ. ⵍⵄⴻⵡⵍⴰ-ⵏⵏⴻⵙ ⵏ ⵡⴰⵎⴰⵏ ⵜⴻⵡⵡⴻⴹ ⵖⴻⵔ 667,23 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⵎⵉⵜⵔⴻⵏ ⵉⴳⴰⵙⴰⵙⴻⵏ ⵏ ⵡⴰⵎⴰⵏ, ⵢⴻⵔⵏⵓ ⴰⴼⵎⵉⴹⵉ-ⵏⵏⴻⵙ ⵏ ⵜⴰⵛⴻⵕⵜ ⵢⴻⵡⵡⴻⴹ ⵖⴻⵔ 65,92%.

ⵎⴰ ⴷ ⵜⴰⵎⵏⴰⴹⵜ ⵏ ⵡⴻⴳⵎⵓⴹ ⵜⴻⵊⵎⴻⵄ-ⴷ 5,2 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⵎⵉⵜⵔⴻⵏ ⵉⴳⴰⵙⴰⵙⴻⵏ (ⵎ3) ⵏ ⵡⴰⵎⴰⵏ ⴷⴻⴳ 23 ⵏ ⵡⵓⴳⴳⵓⴳⴻⵏ, ⵢⴻⵔⵏⵓ ⵜⴻⵡⵡⴻⴹ ⵍⵄⴻⵡⵍⴰ-ⵏⵏⴻⵙ ⵏ ⵡⴰⵎⴰⵏ ⵖⴻⵔ 2 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⵎⵉⵜⵔⴻⵏ ⵉⴳⴰⵙⴰⵙⴻⵏ ⵙ ⵡⴻⴼⵎⵉⴹⵉ ⵏ ⵜⴰⵛⴻⵕⵜ ⵏ 80,10%.

ⴰⴼⵎⵉⴹⵉ ⵏ ⵜⴰⵛⴻⵕⵜ ⵏ ⵡⵓⴳⴳⵓⴳⴻⵏ ⵍⴰ ⵢⴻⵜⵜⵡⴰⵖⴻⵍⵍⴰⵜⴻⵏ ⴷⴻⴳ ⵜⵎⵓⵔⵜ ⴰⴷ ⵢⴻⵔⵏⵓ ⵎⵉ ⴰⴷ ⴷ-ⵢⴻⴼⵙⵉ ⵡⴻⴷⴼⴻⵍ ⴰⵢ ⴷ-ⵉⵡⵜⴻⵏ ⴷⴻⴳ ⵡⵓⵙⵙⴰⵏ ⵢⴻⵣⵔⵉⵏ, ⴷⵖⴰ ⴷ ⴰⵢⴰ ⴰⴷ ⵢⴻⵔⵏⵓⵏ ⴰⴷ ⵢⴻⵙⵙⴻⵎⵖⴻⵔ ⵍⵄⴻⵡⵍⴰ ⵏ ⵡⴰⵎⴰⵏ ⴷⴻⴳ ⵡⵓⵙⵙⴰⵏ ⴰⵢ ⴷ-ⵢⴻⵜⵜⴻⴷⴷⵓⵏ.