Asebter amenzawi

Ugar n 4 n yimelyaṛen n m3 n waman ay yettwajemɛen deg wuggugen n tmurt

LEZZAYER TAMANEɣT– Ixebber-aɣ-d weɣlif n teɣbula n waman dakken Ldzayer tejmeɛ 4,62 n yimelyaṛen n yimitren igasasen (m3) n waman deg 65 n wuggugen (sudud) deg wakk timnaḍin n tmurt, yernu afmiḍi (nisba) n taceṛt n wuggugen tewweḍ ɣer 67,56%.

Igefran ay d-iwten seg melmi kan rnan-d azal n 8 n yimelyunen n yimitren igasasen (m3) n waman, yernu 60% seg waman-a ttwajemɛen-d deg temnaḍt tagmuḍant (carqiyya) n tmurt.

Deg wayen yerzan aswir n waman s temnaḍin, tamnaḍt n tlemmast n tmurt tesɛa 12 n wuggugen yernu tejmeɛ-d 1,4 d amelyun n yimitren igasasen n waman ussan-a, dɣa s waya ay yewweḍ ubleɣ (ḥaǧm) n waman-nnes ɣer wugar n 1,04 d amelyaṛ n yimitren igasasen (afmiḍi n taceṛt n 64,42%).

Deg temnaḍt n yiɣzer n Cclef (ataram), igefran ineggura rnan-d 760.000 n yimitren igasasen (m3) n waman ay yettwajemɛen deg 17 n wuggugen, yernu d aya ay yessawḍen lɛewla n waman ɣer 898,42 n yimelyunen n yimitren igasasen (afmiḍi n taceṛt n 52,56%).

Ma d tamnaḍt n utaram (ɣarb) n tmurt tejmeɛ-d 569.000 n yimitren igasasen (m3) n waman deg 13 n wuggugen. Lɛewla-nnes n waman tewweḍ ɣer 667,23 n yimelyunen n yimitren igasasen n waman, yernu afmiḍi-nnes n taceṛt yewweḍ ɣer 65,92%.

Ma d tamnaḍt n wegmuḍ tejmeɛ-d 5,2 n yimelyunen n yimitren igasasen (m3) n waman deg 23 n wuggugen, yernu tewweḍ lɛewla-nnes n waman ɣer 2 n yimelyaṛen n yimitren igasasen s wefmiḍi n taceṛt n 80,10%.

Afmiḍi n taceṛt n wuggugen la yettwaɣellaten deg tmurt ad yernu mi ad d-yefsi wedfel ay d-iwten deg wussan yezrin, dɣa d aya ad yernun ad yessemɣer lɛewla n waman deg wussan ay d-yetteddun.