ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵢⴰⵎⴰⵏ: 45 ⵏ ⵢⴻⵎⴷⴰⵏⴻⵏ ⴰⵢ ⵢⴻⵎⵎⵓⵜⴻⵏ ⴷⴻⴳ ⵜⵓⵎⵎⵖⴰ ⵜⴰⴳⴻⵏⵡⴰⵏⵜ ⵖⴻⴼ ⵢⵉⵡⴻⵏ ⵏ ⵙⵙⵓⵇ

ⵄⴰⴷⴻⵏ – 45 ⵏ ⵢⵉⵖⴰⵔⵉⵎⴻⵏ (ⵎⴰⴷⴰⵏⵉⵢⵢⵉⵏ) ⴰⵢ ⵢⴻⵎⵎⵓⵜⴻⵏ ⴰⵙⵙ ⵏ ⵙⵙⴻⴱⵜ ⴷⴻⴳ ⵜⵢⵉⵜⵉⵡⵉⵏ ⵜⵉⴳⴻⵏⵡⴰⵏⵉⵏ ⴰⵢ ⴳⴰⵏ ⵢⵉⵙⴰⴼⴰⴳⴻⵏ ⵏ ⵜⴻⵎⵙⵉⵙⵉⵜ (ⵜⴰⵃⴰⵍⵓⴼ) ⵜⴰⵄⵕⴰⴱⵜ ⵢⴻⵍⵍⴰⵏ ⴷⴷⴰⵡ ⵕⵕⴰⵢ ⴰⵙⴰⵄⵓⴷⵉ, ⵢⴻⵔⵏⵓ ⵢⴻⵍⵍⴰ-ⴷ ⵡⴰⵢⴰ ⵎⵉ ⵢⴻⵜⵜⵡⴻⵜ ⵢⵉⵡⴻⵏ ⵏ ⵙⵙⵓⵇ ⴷⴻⴳ ⵓⴳⴰⴼⴰ ⵚⴻⵏⵄⴰ, ⵜⴰⵎⴰⵏⴻⵖⵜ ⵜⴰⵢⴰⵎⴰⵏⵉⵜ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵜⵏⴻⴳⴳⴰ ⵏ ⵛⵛⵉⵏⵡⴰ ⵜⴰⵎⴰⵢⵏⵓⵜ.

ⵢⵉⵡⴻⵏ ⵙⴻⴳ ⵢⵉⵎⴻⵣⴷⴰⵖⴻⵏ ⵏ ⵡⴻⴳⵎⴰⵎ-ⵏⵏⵉ (ⵃⴰⵢⵢ) ⴰⵢ ⵢⴻⵜⵜⴻⵡⵜⴻⵏ ⵢⴻⵏⵏⴰ-ⴷ ⴷ ⴰⴽⴽⴻⵏ ⴰⵟⴰⵙ ⵏ ⵜⵓⵎⵎⵖⵉⵡⵉⵏ ⵜⵉⴳⴻⵏⵡⴰⵏⴻⵏ (ⴵⴰⵡⵡⵉⵢⵢⴰ) ⴰⵢ ⵉⵃⵓⴽⵕⴻⵏ ⵙⵔⵉⴷ ⵎⴻⴷⴷⴻⵏ ⵢⴻⵍⵍⴰⵏ ⴷⴻⴳ ⵢⵉⵡⴻⵏ ⵏ ⵙⵙⵓⵇ ⵢⴻⵞⵞⵓⵕⴻⵏ ⴷ ⵍⵖⴰⵛⵉ ⴷⴻⴳ ⵜⴻⵎⵏⴰⴹⵜ ⵏ ⵏⴻⵀⵎ, ⴷⴻⴳ ⵜⵏⴻⴱⴹⵉⵜ (ⵎⵓⵇⴰⵟⴰⵄⴰ) ⵏ ⵚⴻⵏⵄⴰ, ⵢⴻⵔⵏⵓ ⵜⵉⵢⵉⵜⵉⵡⵉⵏ-ⴰ ⵙⵙⴰⵡⴹⴻⵏⵜ ⵖⴻⵔ ⵜⵎⴻⵜⵜⴰⵏⵜ ⵏ 45 ⵏ ⵢⵉⵖⴰⵔⵉⵎⴻⵏ ⴷ ⵡⴻⵊⵔⴰⵃ ⵏ 50 ⵏ ⵡⵉⵢⴰⴹ.

ⵏⵏⴰⵏ-ⴷ ⴽⵔⴰ ⵏ ⵢⵉⵏⴰⴳⴰⵏ ⴷ ⴰⴽⴽⴻⵏ « ⵜⴰⴱⴻⵔⵔⴰⵡⵜ-ⵏⵏⵉ (ⵇⴰⵚⴼ) ⵜⴰⴳⴻⵏⵡⴰⵏⵜ ⵜⵃⵓⴽⴻⵕ, ⵏⴰⵇⴰⵍ, ⵢⵉⵡⴻⵏ ⵏ ⵙⵙⵓⵇ ⴰⵖⴻⵔⴼⴰⵏ ⴷⴻⴳ ⵏⴻⵀⵎ », ⵙⴰⴽⴽⵉⵏ ⵜⴻⴱⴷⴰ ⵜⴻⴽⴽⴰⵜ ⵓⵍⴰ ⴷ ⵡⵉⴷ ⴰⵢ ⴷ-ⵢⵓⵙⴰⵏ ⴰⴷ ⴷ-ⵙⵙⵓⴽⴽⵙⴻⵏ ⵎⴻⴷⴷⴻⵏ.

ⴷⴻⴳ ⵡⴰⴽⵓⴷ-ⵏⵏⵉ, ⵜⴻⵏⵏⴰ-ⴷ ⵜⴻⵔⴳⴰ ⵏ ⵜⵍⵉⵥⵔⵉ ⵏ ⵎⴰⵙⵉⵔⴰⵀ, ⵢⴻⵇⵇⵏⴻⵏ ⵖⴻⵔ ⵢⵉⵎⴻⵖⵏⴰⵙⴻⵏ ⵉⵃⵓⵜⵉⵢⴻⵏ, ⴷ ⴰⴽⴽⴻⵏ « ⵓⴳⴰⵔ ⵏ 25 ⵏ ⵢⵉⵖⴰⵔⵉⵎⴻⵏ ⴰⵢ ⵢⴻⵜⵜⵡⴻⵏⵖⴻⵏ ⵢⴻⵔⵏⵓ ⵊⴻⵔⵃⴻⵏ 30 ⵏ ⵡⵉⵢⴰⴹ ⴷⴻⴳ ⵜⵢⵉⵜⵉⵡⵉⵏ ⵜⵉⴳⴻⵏⵡⴰⵏⵉⵏ ⴰⵢ ⴷ-ⵢⴻⵍⵍⴰⵏ ⵙⵖⵓⵔ ⵢⵉⵖⴰⵍⵍⴻⵏ ⵏ ⵓⵜⵄⴻⴷⴷⵉ ⵢⴻⵍⵍⴰⵏ ⴷⴷⴰⵡ ⵕⵕⴰⵢ ⴰⵙⴰⵄⵓⴷⵉ ⵖⴻⴼ ⵙⵙⵓⵇ ⵏ ⵏⴻⵀⵎ ».

ⵉⵎⴻⵏⵖⵉⵢⴻⵏ ⵉⵎⵙⴻⵍⵍⵃⴻⵏ ⵇⴻⵙⵙⵉⵃⴻⵏ ⵎⴰⵣⴰⵍ ⵜⵜⴽⴻⵎⵎⵉⵍⴻⵏ ⴳⴰⵔ ⵢⵉⵖⴰⵍⵍⴻⵏ ⵉⴱⴻⴷⴷⴻⵏ ⵖⴻⵔ ⵓⵏⴰⴱⴰⴹ ⴷ ⵢⵉⵖⴻⵡⵡⴰⵖⴻⵏ (ⵎⵓⵜⴰⵎⴰⵔⵔⵉⴷⵉⵏ) ⵉⵛⵉⵄⵉⵢⴻⵏ ⵉⵃⵓⵜⵉⵢⴻⵏ ⴷⴻⴳ ⵜⴻⵎⵏⴰⴹⵜ ⵏ ⵏⴻⵀⵎ ⴷ ⵜⴻⵎⵏⴰⴹⵉⵏ ⵏⵉⴹⴻⵏ ⴰⵢ ⴷ-ⵢⴻⵣⵣⵉⵏ ⵖⴻⴼ ⵜⵎⴰⵏⴻⵖⵜ ⵚⴻⵏⵄⴰ.

ⵓⵔ ⵢⴻⵡⵡⵉⴹ ⴰⵔⴰ 50 ⵏ ⵢⵉⴽⵉⵍⵓⵎⵉⵜⵔⴻⵏ ⴰⵢ ⵢⴻⵍⵍⴰⵏ, ⵉⵎⵉⵔ-ⴰ, ⴳⴰⵔ ⵢⵉⵖⴰⵍⵍⴻⵏ ⵏ ⵓⵏⴰⴱⴰⴹ (ⵃⵓⴽⵓⵎⴰ) ⴰⵢ ⵜⵜⵄⴰⵡⴰⵏⴻⵏ ⵢⵉⵙⴰⵄⵓⴷⵉⵢⴻⵏ, ⴷ ⵜⵎⴰⵏⴻⵖⵜ ⵜⴰⵢⴰⵎⴰⵏⵉⵜ ⵏ ⵚⴻⵏⵄⴰ, ⵢⴻⵔⵏⵓ ⵙⵙⴰⵡⴹⴻⵏ ⵢⵉⵖⴰⵍⵍⴻⵏ-ⴰ ⴰⴷ ⵄⴰⵡⴷⴻⵏ ⴰⴷ ⴹⴹⴼⴻⵏ ⴽⵔⴰ ⵏ ⵢⵉⵎⵓⴽⴰⵏ ⵉⵙⴻⵔⴷⴰⵙⴰⵏⴻⵏ ⴷⴻⴳ ⵜⴻⵎⵏⴰⴹⵜ ⵏ ⵏⴻⵀⵎ ⴷ ⵢⴻⴷⵔⴰⵔⴻⵏ-ⵏⵏⴻⵙ ⴷ-ⵢⴻⵣⴳⴰⵏ ⵏⵏⵉⴳ ⵜⵎⴰⵏⴻⵖⵜ, ⵓⵍⴰ ⵎⴰ ⵜⴰⵎⴰⵏⴻⵖⵜ ⵙ ⵜⵉⵎⵎⴰⴷ-ⵏⵏⴻⵙ ⵎⴰⵣⴰⵍ-ⵉⵜⵜ ⴳⴰⵔ ⵢⵉⴼⴰⵙⵙⴻⵏ ⵏ ⵢⵉⵖⴻⵡⵡⴰⵖⴻⵏ.