Asebter amenzawi

Yaman: 45 n yemdanen ay yemmuten deg tummɣa tagenwant ɣef yiwen n ssuq

ƐADEN – 45 n yiɣarimen (madaniyyin) ay yemmuten ass n ssebt deg tyitiwin tigenwanin ay gan yisafagen n temsisit (taḥaluf) taɛṛabt yellan ddaw ṛṛay asaɛudi, yernu yella-d waya mi yettwet yiwen n ssuq deg ugafa Ṣenɛa, tamaneɣt tayamanit, ɣef wakken ay d-tenna tnegga n Ccinwa Tamaynut.

Yiwen seg yimezdaɣen n wegmam-nni (ḥayy) ay yettewten yenna-d d akken aṭas n tummɣiwin tigenwanen (ǧawwiyya) ay iḥukṛen srid medden yellan deg yiwen n ssuq yeččuṛen d lɣaci deg temnaḍt n Nehm, deg tnebḍit (muqaṭaɛa) n Ṣenɛa, yernu tiyitiwin-a ssawḍent ɣer tmettant n 45 n yiɣarimen d wejraḥ n 50 n wiyaḍ.

Nnan-d kra n yinagan d akken « taberrawt-nni (qaṣf) tagenwant tḥukeṛ, naqal, yiwen n ssuq aɣerfan deg Nehm », sakkin tebda tekkat ula d wid ay d-yusan ad d-ssukksen medden.

Deg wakud-nni, tenna-d terga n tliẓri n Masirah, yeqqnen ɣer yimeɣnasen iḥutiyen, d akken « ugar n 25 n yiɣarimen ay yettwenɣen yernu jerḥen 30 n wiyaḍ deg tyitiwin tigenwanin ay d-yellan sɣur yiɣallen n utɛeddi yellan ddaw ṛṛay asaɛudi ɣef ssuq n Nehm ».

Imenɣiyen imsellḥen qessiḥen mazal ttkemmilen gar yiɣallen ibedden ɣer unabaḍ d yiɣewwaɣen (mutamarridin) iciɛiyen iḥutiyen deg temnaḍt n Nehm d temnaḍin niḍen ay d-yezzin ɣef tmaneɣt Ṣenɛa.

Ur yewwiḍ ara 50 n yikilumitren ay yellan, imir-a, gar yiɣallen n unabaḍ (ḥukuma) ay ttɛawanen Yisaɛudiyen, d tmaneɣt tayamanit n Ṣenɛa, yernu ssawḍen yiɣallen-a ad ɛawden ad ḍḍfen kra n yimukan iserdasanen deg temnaḍt n Nehm d yedraren-nnes d-yezgan nnig tmaneɣt, ula ma tamaneɣt s timmad-nnes mazal-itt gar yifassen n yiɣewwaɣen.