ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵏⴻⵙⵙⴰⵔⴰⵎ ⵜⵉⵔⵣⵉ ⵏ ⴱⴰⵏ ⴽⵉ-ⵎⵧⵧⵏ ⴰⴷ ⵢⴻⵃⵕⴻⵙ ⵎⴻⵕⵕⵓⴽ ⴰⴷ ⵜⵇⴰⴷⴻⵔ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ (ⴰⵏⴻⵖⵍⴰⴼ ⴰⵎⴻⵏⵣⵓ)

ⴷⴰⵅⵍⴰ (ⵉⴳⵔⵉⵔⴻⵏ ⵏ ⵢⴻⵣⵔⴰⵣⴰⵖⴻⵏ ⵉⵚⴻⵃⵔⴰⵡⵉⵢⴻⵏ), 28 ⴼⵓⵕⴰⵕ 2016 – ⵢⴻⵏⵏⴰ-ⴷ ⵓⵏⴻⵖⵍⴰⴼ ⴰⵎⴻⵏⵣⵓ ⴰⵚⴻⵃⵔⴰⵡⵉ, ⴰⴱⴷⴻⵍⴽⴰⴷⴻⵔ ⵜⴰⵍⴻⴱ ⵧⵎⴰⵔ, ⴷⴰⴽⴽⴻⵏ ⵢⴻⵙⵙⴰⵔⴰⵎ ⵜⵉⵔⵣⵉ ⵏ ⵓⵎⴰⵔⵓ ⴰⵎⴰⵜⵓ ⵏ ⵢⴻⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ, ⴱⴰⵏ ⴽⵉ-ⵎⵧⵧⵏ, ⵖⴻⴼ ⵜⴻⵎⵏⴰⴹⵜ ⵏ ⵜⴻⴼⵔⵉⵇⵜ ⵏ ⵓⴳⴰⴼⴰ ⴰⴷ ⵉⵃⴻⵜⵜⴻⵎ ⵎⴻⵕⵕⵓⴽ ⴰⴷ ⵢⴻⵃⵕⴻⵙ ⵎⴻⵕⵕⵓⴽ ⴰⴽⴽⴻⵏ ⴰⴷ ⵜⵇⴰⴷⴻⵔ ⵉⵖⵜⴰⵙⴻⵏ (ⵇⴰⵔⴰⵔⴰⵜ) ⵏ ⵢⴻⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵉ ⵍⵎⴻⵏⴷ ⵏ ⵓⵙⵙⴻⴼⵄⴻⵍ ⵏ ⵡⴻⵣⵔⴻⴼ ⵏ ⵡⴻⵖⵔⴻⴼ ⴰⵚⴻⵃⵔⴰⵡⵉ ⵉ ⵓⴳⴳⵓⵛⵛⴻⵍⵎⴰⵏ (ⵜⴰⵇⵔⵉⵔ ⵎⴰⵚⵉⵔ).

ⴷⴻⴳ ⵢⵉⵡⴻⵜ ⵏ ⵜⵙⴻⵖⵔⵓⵜ (ⵜⴰⵚⵔⵉⵃ) ⴰⵢ ⴷ-ⵉⴳⴰ ⵉ ⵜⵏⴻⴳⴳⴰ ⵏ ⵢⵉⵙⴰⵍⴰⵏ ⵏ ⵍⴷⵣⴰⵢⴻⵔ, ⵢⴻⵏⵏⴰ-ⴷ ⵎⴰⵙⵙ ⵜⴰⵍⴻⴱ ⵧⵎⴰⵔ, ⴷⴰⴽⴽⴻⵏ « ⴰⵖⵔⴻⴼ ⴰⵚⴻⵃⵔⴰⵡⵉ ⵍⴰ ⵢⴻⵙⵙⴰⵔⴰⵎ ⴰⴷ ⵢⴻⵙⵙⴻⴼⵄⴻⵍ ⵓⵎⴰⵔⵓ ⴰⵎⴰⵜⵓ ⵏ ⵢⴻⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⴰⵢⴻⵏ ⴰⵢ ⴷ-ⵢⴻⴷⴷⴰⵏ ⴷⴻⴳ ⵓⵕⴰⴱⵓⵍ-ⵏⵏⴻⵙ ⵏ 2014, ⴰⵢⴷⴻⴳ ⴰⵢ ⴷ-ⵉⵡⴻⴽⴽⴻⴷ ⴷⴰⴽⴽⴻⵏ ⵢⴻⵙⵙⴻⴼⴽ ⴰⴷ ⴷ-ⵉⵍⵉⵏⵜ ⵜⴻⴳⵔⴰⵢⵉⵏ (ⵅⵓⵍⴰⵚⴰⵜ) ⵢⴻⵔⵏⵓ ⴰⴷ ⴷ-ⵜⵜⵓⵏⴻⴼⴽⴻⵏ ⵢⴻⴼⵔⴰⵏⴻⵏ ⵉⵎⴰⵢⵏⵓⵜⴻⵏ ⵍⴻⵎⵎⴻⵔ ⵓⵔ ⴷ-ⵜⵜⵉⵍⵉⵏ ⴰⵔⴰ ⵢⵉⵙⵓⵔⵉⴼⴻⵏ ⵖⴻⵔ ⵙⴷⴰⵜ ⴷⴻⴳ 2015 ».

ⵏⵏⵉⴳ ⵡⴰⵢⴰ, ⵢⴻⵏⵏⴰ-ⴷ ⴷⴰⴽⴽⴻⵏ ⵉⵚⴻⵃⵔⴰⵡⵉⵢⴻⵏ ⴹⴻⵎⵄⴻⵏ ⴰⴷ ⵜⵉⵍⵉ ⵜⴻⵔⵣⵉ ⵏ ⴱⴰⵏ ⴽⵉ-ⵎⵧⵧⵏ ⴷ « ⴱⴻⴷⴷⵓ ⵏ ⵜⴰⵍⵍⵉⵜ ⵜⴰⵎⴰⵢⵏⵓⵜ ⵉ ⵜⵙⴻⵔⵜⵉⵜ ⴷ ⵡⴰⴷⴷⵓⴷⴻⵏ ⵏ ⵜⵓⴷⴷⵙⴰ ⵏ ⵢⴻⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵜⴰⵎⵙⴰⵍⵜ ⵜⴰⵚⴻⵃⵔⴰⵡⵉⵜ, ⴰⴽⴽⴻⵏ ⵓⵔ ⵜⴻⵜⵜⴽⴻⵎⵎⵉⵍ ⴰⵔⴰ ⵜⴻⴳⵏⵉⵜ ⴰⵢⴷⴻⴳ ⵓⵍⴰⵛ ⴰⵎⴳⴻⵔⵔⴰⴷ ⴳⴰⵔ ⵡⵉⵏ ⵉⴹⴻⵍⵎⴻⵏ ⴷ ⵡⵉⵏ ⵢⴻⵜⵜⵡⴰⴹⴻⵍⵎⴻⵏ ».

« ⵓⵍⴰ ⵎⴰ ⵔⵔⴱⴰⵟ ⵎⴰⵣⴰⵍ-ⵉⵜⵜ ⵜⵓⴳⵉ ⴰⵔ ⵉⵎⵉⵔ-ⴰ ⴰⴷ ⵢⴻⵔⵣⵓ ⴱⴰⵏ ⴽⵉ-ⵎⵧⵧⵏ ⵖⴻⴼ ⵎⴻⵕⵕⵓⴽ ⴷ ⵢⵉⴽⴰⵍⴻⵏ ⵢⴻⵜⵜⵡⴰⴹⴹⴼⴻⵏ, ⵜⵓⴷⴷⵙⴰ ⵏ ⵢⴻⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵜⴻⴹⴹⴻⴼ ⴷⴻⴳ ⵜⴻⵔⵣⵉ ⵏ ⵓⵎⴰⵔⵓ-ⵏⵏⴻⵙ ⴰⵎⴰⵜⵓ ⴰⴷ ⴷ-ⵢⵉⵍⵉⵏ ⴷⴻⴳ 5 ⵎⴻⵖⵔⴻⵙ ⴰⵢ ⴷ-ⵢⴻⵜⵜⴻⴷⴷⵓⵏ ⵖⴻⴼ ⵢⵉⴽⴰⵍⴻⵏ ⵢⴻⵜⵜⵡⴰⵙⵍⴻⵍⵍⵉⵏ ⴷ ⵢⵉⴳⵔⵉⵔⴻⵏ ⵏ ⵢⴻⵣⵔⴰⵣⴰⵖⴻⵏ (ⵍⴰⴵⵉ’ⵉⵏ) ⵉⵚⴻⵃⵔⴰⵡⵉⵢⴻⵏ ⵎⵉ ⴰⴷ ⵉⴼⴰⴽ ⵜⵉⵔⵣⵉ-ⵏⵏⴻⵙ ⵖⴻⴼ ⵎⵓⵔⵉⵟⴰⵏⵢⴰ ⴷ ⵍⴷⵣⴰⵢⴻⵔ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ.

ⵢⴻⵔⵏⴰ-ⴷ ⴷⴰⴽⴽⴻⵏ ⴰⵏⵀⵉⵍ (ⵏⵉⴹⴰⵎ) ⴰⵎⴻⵕⵕⵓⴽⵉ « ⵢⴻⴱⵖⴰ ⴰⴷ ⴷ-ⵢⵉⵍⵉ ⵓⵙⵙⵉⴳⴻⵍ (ⵜⴰⵄⵍⵉⵇ) ⵏⴻⵖ ⴰⵡⴻⵅⵅⴻⵔ ⵏ ⵜⴻⵔⵣⵉ-ⴰ ⵏ ⵢⴻⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ, ⵎⴰⵛⴰ ⵉⵏⴻⴳⴳⵓⵔⴰ-ⴰ ⵄⴻⵡⵡⵍⴻⵏ ⴰⴷ ⴷ-ⵜⵉⵍⵉ ⵜⴻⵔⵣⵉ-ⵏⵏⵉ ⴷⴻⴳ ⵡⴰⴽⵓⴷ-ⵏⵏⵉ ⴰⵢ ⵙⵙⴻⴼⵔⴰⵏ, ⵓⵍⴰ ⵎⴰ ⵜⵓⴳⵉ ⵎⴻⵕⵕⵓⴽ, ⵢⴻⵔⵏⵓ ⴰⵢⴰ ⴷ ⴰⵎⴰⵢⵏⵓ, ⵉⵎⵉ ⴷⴻⴳ ⵡⴰⵢⴻⵏ ⴰⴽⴽⴰ ⵢⴻⵣⵔⵉⵏ, ⵜⵓⴷⴷⵙⴰ ⵏ ⵢⴻⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⴷⵉⵎⴰ ⵜⴻⵍⵍⴰ ⵜⴻⵜⵜⵕⴰⵊⵓ ⵜⵜⴻⵙⵔⵉⵃ ⵏ ⵎⴻⵕⵕⵓⴽ ⴰⴽⴽⴻⵏ ⴰⴷ ⵜⴻⴳ ⴽⵔⴰ, ⵎⴰⵛⴰ ⴰⵙⵙ-ⴰ, ⵜⵓⴷⴷⵙⴰ-ⴰ ⵜⴻⵜⵜⵡⴰⵙⵙⴻⵇⵏⴻⵄ ⴷⴰⴽⴽⴻⵏ ⵢⴻⵙⵙⴻⴼⴽ ⴰⴷ ⵜⵜⵡⴰⵔⴻⵥⵎⴻⵏ ⵢⴻⴱⵔⵉⴷⴻⵏ ⵉⵎⴰⵢⵏⵓⵜⴻⵏ ⵉ ⵜⴰⵍⵡⵉⵜ, ⵍⴰⴷⵖⴰ ⴷⴻⴳ ⵜⴻⵙⵡⵉⵄⵜ-ⴰ ⴰⵢⴷⴻⴳ ⵜⵜ-ⵜⴻⵃⵡⴰⴵ ⵜⴻⵎⵏⴰⴹⵜ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵎⴰⵙⴰⵢ-ⴰ ⴰⵚⴻⵃⵔⴰⵡⵉ.