Asebter amenzawi

Yenna-d Bedoui dakken adiwenni-nnes d wemtil-nnes almani ad d-yawi lfayda.

LezZAYER TAMANEɣT– Yenna-d uneɣlaf n tɣawsiwin n daxel, Nouredine Bedoui, ass n letniyen tameddit deg Ldzayer Tamaneɣt, dakken adiwenni-nnes (ḥiwar) d wemtil-nnes almani, Thomas de Maiziere, « yelha » imi iswi-nnes d asnefli (taṭwir) n wassaɣen ucriken deg yinurar yemgerraden, ladɣa win n yimenɣi mgal rrebrab d wembaddel n telɣa.

« Amyager-a yella-d igerrez s waṭas yerna iswi-nnes d asnefli n wassaɣen ucriken deg yinurar d yeḥricen yemgerraden, gar-asen taɣellist deg wayen yerza tawaɣit yeswaɣen akk amaḍal, tin n rrebrab », ɣef wakken ay d-yenna Mass Bedoui deg yiwet n tseɣrut (taṣriḥ) i tɣemsa deg tgara n udiwenni-nnes d uneɣlaf almani n tɣawsiwin n daxel.

Dɣa deg temsalt-a, yenna-d Mass Bedoui dakken rrebrab yettɣimi-d d tawaɣit izegren i tlisa, yernu yenṣeḥ-d s « wesdukkel n wussisen (maǧhudat) n wemɣiwan agraɣlan i lmend n yimenɣi mgal uxeṣṣar-a ».

« Nemsefham ad nesseǧhed amɛawen-nneɣ deg wayen yerzan ambaddel n telɣa (maɛlumat), asseǧhed n ussileɣ (takwin) deg tɣellist d ussali n weswir n wassaɣen-nneɣ akken ad neḥrez talwit d tɣellist deg tmura-nneɣ deg snat », ɣef wakken ay d-yenna Mass Bedoui.

Yenna-d daɣ dakken yebder-d, d uneɣlaf almani, tinqiḍin niḍen am yinig yeffɣen i lqanun, yerna iwekked-d ɣef wembaddel n telɣa deg wenrar-a.

Dɣa deg wayen yerzan aya, yenna-d Mass Bedoui dakken ula d Ldzayer la tettqabal ugur-a n yinig, ladɣa imi ay yessefk ad tɛass ugar n 8000 n tlisa yernu ad teḍmen taɣellist-nsent (amn).